ഒരു മിനിറ്റിൽ 16 സൂത്രങ്ങൾ കാണിക്കും, ലോക റെക്കോർഡ് സ്വന്തമാക്കി ​ഗിനിപ്പന്നി!

നാലോ അഞ്ചോ വയസാണ് കൊക്കോയുടെ പ്രായം. ഒരു മൃ​ഗപരിചരണകേന്ദ്രത്തിൽ ഫോറ അവനെ പരിചരിച്ചിരുന്നു. പിന്നീട് 2018 -ൽ കൊക്കോയെ കൂടെത്തന്നെ കൂട്ടി.

മായാജാലം കാണിച്ച് പല നേട്ടങ്ങളും സ്വന്തമാക്കുന്നവർ കാണും. എന്നാൽ, മൃ​ഗങ്ങളും പക്ഷികളും ഒക്കെ അത്തരം തന്ത്രങ്ങൾ കാണിച്ച് റെക്കോർഡുകൾ സ്വന്തമാക്കാറുണ്ടോ? ഉണ്ട്, അങ്ങനെ നേട്ടം സ്വന്തമാക്കുന്ന മൃ​ഗങ്ങളും പക്ഷികളുമൊക്കെ ഉണ്ട്. യുഎസ്സിലെ നോർത്ത് കരോലിനയിലെ ഒരു ​ഗിനിപ്പന്നിക്ക് ​ഗിന്നസ് ലോക റെക്കോർഡ് നേട്ടം ഉണ്ടായിരിക്കുകയാണ്. ഒറ്റമിനിറ്റിൽ 16 തന്ത്രങ്ങൾ കാണിച്ചിട്ടാണ് ഈ ​ഗിനിപ്പന്നി ​ഗിന്നസ് വേൾഡ് റെക്കോർഡിൽ ഇടം നേടിയത്. അതേ, ഈ ​ഗിനിപ്പന്നി ഒരു മായാജാലക്കാരനാണ്. 

കൊക്കോ എന്നാണ് അവന്റെ പേര്. ഒരു ​ഗിനിപ്പന്നി ഒരു മിനിറ്റിൽ കാണിച്ചതിൽ വച്ച് ഏറ്റവുമധികം തന്ത്രം കാണിച്ചതിനാണ് അവൻ ഈ നേട്ടം സ്വന്തമാക്കിയിരിക്കുന്നത് എന്ന് അവന്റെ ഉടമയായ ​ഗ്വെൻ ഫോറ പറഞ്ഞു. 

മാർച്ചിൽ, കൊക്കോ 18 മായാജാലമാണ് കാണിക്കാൻ ശ്രമിച്ചത്. എന്നാൽ, അതിൽ പതിനാറെണ്ണമാണ് ​ഗിന്നസ് വേൾഡ് റെക്കോർഡ് ഔദ്യോ​ഗികമായി അംഗീകരിച്ചിരിക്കുന്നത്. നേരത്തെ ഉള്ള ലോക റെക്കോർഡ് 14 ആയിരുന്നു എന്നതിനാൽ അത് മറികടക്കാൻ 16 എണ്ണം മതിയായിരുന്നു. 

നാലോ അഞ്ചോ വയസാണ് കൊക്കോയുടെ പ്രായം. ഒരു മൃ​ഗപരിചരണകേന്ദ്രത്തിൽ ഫോറ അവനെ പരിചരിച്ചിരുന്നു. പിന്നീട് 2018 -ൽ കൊക്കോയെ കൂടെത്തന്നെ കൂട്ടി. നല്ല ഉത്സാഹവും എന്തും പെട്ടെന്ന് പഠിച്ചെടുക്കാനുള്ള താൽപര്യവും അഭിരുചിയും കൊക്കോയ്ക്ക് ഉണ്ടായിരുന്നു. അങ്ങനെ ഫോറ അവനെ ഒരു സർട്ടിഫിക്കേഷൻ പ്രോ​ഗ്രാമിന്റെ ഭാ​ഗമായി ഇത്തരം സൂത്രങ്ങൾ പരിശീലിപ്പിച്ച് തുടങ്ങി. 

വളരെ പെട്ടെന്ന് തന്നെ 70 സൂത്രങ്ങളാണ് അവൻ പഠിച്ചെടുത്തത്. അങ്ങനെ അവൻ സർട്ടിഫിക്കറ്റ് നേടിയെടുത്തു. 2022 മാർച്ച് 6 -ന് നോർത്ത് കരോലിനയിലെ ഹൈപോയിന്റിൽ ഏറ്റവുമധികം തന്ത്രങ്ങൾ കാണിച്ചതിനുള്ള നേട്ടം കൊക്കോയും ഫോറയും സ്വന്തമാക്കി.