മോഡലിം​ഗ് ഉപേക്ഷിച്ച് വൈദികനാവാൻ ഇറ്റലിയിലെ സുന്ദരൻ യുവാവ്; കമന്റുകളുമായി സോഷ്യൽ മീഡിയ 

സാന്‍റിനിയുടെ മോഡലിം​ഗിൽ നിന്നും മറ്റുമുള്ള ചിത്രത്തോടൊപ്പം ഒരു പള്ളിയിൽ സാന്റിനി മുട്ടുകുത്തിയിരിക്കുന്ന ചിത്രവും വീഡിയോയിൽ കാണാം.

ഇറ്റലിയിലെ വളരെ സുന്ദരനായൊരു യുവാവ് തന്റെ മോ‍ഡലിം​ഗ് കരിയർ അവസാനിപ്പിച്ച് വൈദികനാവാൻ ഒരുങ്ങുന്നു. 21 -കാരനായ എഡോർഡോ സാന്റിനിയാണ് മോഡലിം​ഗ് അവസാനിപ്പിക്കുന്നത്. താൻ മറ്റൊരു യാത്രയിലേക്കുള്ള മുന്നൊരുക്കത്തിലാണ് എന്നാണ് മോഡലായ യുവാവ് പറയുന്നത്. 

വളരെ ചെറുപ്പത്തിൽ തന്നെ ഒരു താരമായി മാറാനുള്ള ആ​ഗ്രഹം സാന്റിനിയിൽ ഉണ്ടായിരുന്നു. അതിനാൽ തന്നെ നാടകത്തിലും ഡാൻസിലും എല്ലാം സജീവമായി ഉണ്ടായിരുന്ന ആളുമാണ് സാന്റിനി. എന്നാൽ, ഇപ്പോൾ വിശ്വാസത്തിന്റെയും സേവനത്തിന്റെയും ആത്മീയതയുടേയും പാതയിലേക്ക് തിരിയുകയാണ് സാന്റിനി എന്നാണ് പറയുന്നത്. 

ഇൻസ്റ്റ​ഗ്രാമിൽ ഷെയർ ചെയ്ത ഒരു വീഡിയോയിൽ സാന്റിനി തന്നെ താൻ തന്റെ മോഡലിം​ഗ് കരിയർ അവസാനിപ്പിക്കാൻ പോവുകയാണ് എന്ന് വെളിപ്പെടുത്തുന്നുണ്ട്. താൻ തന്റെ മോഡലിം​ഗ് വർക്ക്, അഭിനയം, ഡാൻസ് എന്നിവ അവസാനിപ്പിക്കാൻ പോവുന്നു. എന്നാൽ, ഞാനെന്റെ പാഷനുപേക്ഷിക്കുന്നില്ല. വേറിട്ട രീതിയിൽ അവ തന്നോടൊപ്പം ഉണ്ടാകും. അവ താനിനി ദൈവത്തിന് നൽകാൻ പോകുന്നു എന്നാണ് സാന്റിനി വീഡിയോയിൽ പറയുന്നത്. 

സാന്‍റിനിയുടെ മോഡലിം​ഗിൽ നിന്നും മറ്റുമുള്ള ചിത്രത്തോടൊപ്പം ഒരു പള്ളിയിൽ സാന്റിനി മുട്ടുകുത്തിയിരിക്കുന്ന ചിത്രവും വീഡിയോയിൽ കാണാം. ചെറുപ്പം മുതൽ തന്നെ താൻ തന്റെ മനസ്സിൽ ഒരു ചോദ്യം കൊണ്ടുനടന്നിരുന്നു. പലതരം ഭയങ്ങൾ പക്ഷേ എന്നെ അതിൽ നിന്നും തടഞ്ഞു. ആ ചോദ്യം ചോദിക്കാനും അതിനുള്ള ഉത്തരം കണ്ടെത്താൻ സഹായിക്കുകയും ചെയ്യുന്ന നിരവധി ചെറുപ്പക്കാരെ താൻ കണ്ടുമുട്ടി. അവരാണ് എനിക്ക് ഈ വഴി തെരഞ്ഞെടുക്കാൻ പ്രചോദനമായത് എന്നും സാന്റിനി പറയുന്നു. 

മോഡലിം​ഗ് കരിയർ അവസാനിപ്പിക്കുന്നു എന്ന് കാണിച്ച് സാന്റിനി ഷെയർ ചെയ്തിരിക്കുന്ന വീഡിയോയ്ക്ക് നിരവധിപ്പേരാണ് കമന്റുകൾ നൽകിയിരിക്കുന്നത്. 

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം