ജെൻ സികൾ ഇപ്പോൾ കൊറിയൻ ഫുഡ് വൈബിലാണ്! എന്താണ് ഈ കെ ഫുഡ് ക്രെയ്‌സിന് പിന്നിൽ!

കൊറിയൻ സംഗീതവും സിനിമകളും നൽകിയ വലിയ സ്വാധീനം നമ്മുടെ ഭക്ഷണത്തിലും കാണാം. സ്പൂണിന് പകരം ചോപ്സ്റ്റിക്സ് ഉപയോഗിക്കാനും, എരിവുള്ള കിംചി പരീക്ഷിക്കാനും ഇന്ന് മലയാളി യുവാക്കൾക്ക് വലിയ താല്പര്യമാണ്. ഇത് വെറുമൊരു ഭക്ഷണമല്ല…

കേരളത്തിലെ ഏത് കഫേയിലോ റെസ്റ്റോറന്റിലോ പോയാലും ഇപ്പോൾ ഒരു കാര്യം കോമൺ ആണ്. സ്പൈസി ആയിട്ടുള്ള നൂഡിൽസും കറുത്ത നിറത്തിലുള്ള സോസിൽ മുങ്ങിയ ചിക്കൻ വിങ്‌സും പിന്നെ, കയ്യിൽ രണ്ട് ചോപ്‌സ്റ്റിക്കുമായി ഇരിക്കുന്ന ഒരു കൂട്ടം യുവാക്കളെയും കാണാം. മലയാളിക്ക് പണ്ട് ചൈനീസ് ഭക്ഷണത്തോടായിരുന്നു താല്പര്യമെങ്കിൽ ഇന്ന് കഥ മാറി. ജെൻ സി എന്ന് വിളിക്കപ്പെടുന്ന ഇന്നത്തെ തലമുറയുടെ ഭക്ഷണ ശീലങ്ങൾ ഇപ്പോൾ 'കെ-ഫുഡ്' അഥവാ കൊറിയൻ ഭക്ഷണങ്ങൾക്ക് പിന്നാലെയാണ്. ഒരു ചെറിയ ട്രെൻഡ് എന്നതിലുപരി വലിയൊരു കൾച്ചറൽ ഷിഫ്റ്റ് തന്നെയാണ് ഇതിലൂടെ സംഭവിക്കുന്നത്.

എന്തുകൊണ്ടാണ് നമ്മുടെ നാട്ടിലെ കുട്ടികൾക്ക് പെട്ടെന്ന് കൊറിയൻ ഭക്ഷണത്തോടു ഇത്രയും 'അഡിക്ഷൻ' ഉണ്ടായത് എന്ന് ചോദിച്ചാൽ അതിന് ഒരൊറ്റ ഉത്തരമേയുള്ളൂ, അത് കൊറിയൻ പോപ്പ് കൾച്ചറാണ്. ബിടിഎസ്, ബ്ലാക്ക് പിങ്ക് തുടങ്ങിയ മ്യൂസിക് ബാൻഡുകളും വൻ ഹിറ്റായ കെ-ഡ്രാമകളുമാണ് കൊറിയൻ ഭക്ഷണത്തെ നമ്മുടെ അടുക്കളകളിലേക്ക് എത്തിച്ചത്. സ്ക്രീനിൽ തങ്ങളുടെ പ്രിയപ്പെട്ട താരങ്ങൾ സ്പൈസി നൂഡിൽസ് കഴിക്കുന്നതും കിംച്ചി ആസ്വദിക്കുന്നതും കാണുമ്പോൾ അത് ഒന്നു പരീക്ഷിച്ചു നോക്കാൻ ഏതൊരു ആളും ആഗ്രഹിക്കും. അവിടെ നിന്നാണ് ഈ ഫുഡ് ട്രെൻഡിന്റെ തുടക്കം.

കൊറിയൻ ഭക്ഷണങ്ങളിൽ ജെൻ സിയുടെ ഏറ്റവും വലിയ ഫേവറിറ്റ് 'റാംയൂൺ' അഥവാ ഇൻസ്റ്റന്റ് നൂഡിൽസ് ആണ്. സാധാരണ നമ്മൾ കഴിക്കുന്ന നൂഡിൽസിനേക്കാൾ കട്ടികൂടിയതും അത്യാവശ്യം നല്ല എരിവുള്ളതുമാണ് ഈ നൂഡിൽസുകൾ. സോഷ്യൽ മീഡിയയിൽ തരംഗമായ 'സ്പൈസി നൂഡിൽസ് ചലഞ്ച്' വഴിയാണ് ഇതിന് ഇത്രയും പോപ്പുലാരിറ്റി കിട്ടിയത്. ചുവന്ന നിറത്തിലുള്ള ആ എരിവുള്ള നൂഡിൽസ് കയ്യിൽ പിടിച്ച് ചോപ്സ്റ്റിക്സ് ഉപയോഗിച്ച് കഴിക്കുന്നത് ഒരു സ്റ്റൈൽ സ്റ്റേറ്റ്‌മെന്റ് ആയിപ്പോലും ഇന്ന് മാറിയിട്ടുണ്ട്. സൂപ്പർ മാർക്കറ്റുകളിൽ ഇപ്പോൾ റെഡി ടു ഈറ്റ് വിഭാഗത്തിൽ ഏറ്റവും കൂടുതൽ വിറ്റഴിക്കപ്പെടുന്നതും ഇത്തരം കൊറിയൻ നൂഡിൽസ് ബ്രാൻഡുകളാണ്.

മറ്റൊരു പ്രധാന ഐറ്റമാണ് 'കിംച്ചി' . കാബേജ് പുളിപ്പിച്ചെടുത്ത ഒരു തരം സൈഡ് ഡിഷ് ആണിത്. കൊറിയൻ ഭക്ഷണത്തിന്റെ ആത്മാവ് എന്ന് കിംച്ചിയെ വിളിക്കാം. തുടക്കത്തിൽ മലയാളികൾക്ക് ഇതിന്റെ പുളിപ്പും മണവും അല്പം കൗതുകം ഉണ്ടാക്കിയെങ്കിലും ഹെൽത്ത് കോൺഷ്യസ് ആയ ഇന്നത്തെ തലമുറ ഇതിനെ പെട്ടെന്ന് ഏറ്റെടുത്തു. പ്രോബയോട്ടിക്സ് ധാരാളം അടങ്ങിയ കിംച്ചി ദഹനത്തിനും സ്കിന്നിനും നല്ലതാണെന്ന തിരിച്ചറിവാണ് ഇതിനെ ഒരു സൂപ്പർ ഫുഡ് ആക്കി മാറ്റിയത്. കൂടാതെ കൊറിയൻ സ്റ്റൈൽ ഫ്രൈഡ് ചിക്കനും ഇന്ന് വിപണി കീഴടക്കുകയാണ്. നമ്മുടെ നാടൻ ഫ്രൈഡ് ചിക്കനിൽ നിന്നും വ്യത്യസ്തമായി ഡബിൾ ഫ്രൈ ചെയ്തതും ക്രിസ്പി ആയതുമായ ഈ ചിക്കനിൽ തേനും സോയ സോസും ചേർത്തുള്ള ആ ഒരു 'സ്വീറ്റ് ആൻഡ് സ്പൈസി' കോമ്പിനേഷൻ യുവാക്കൾക്ക് വല്ലാത്തൊരു വൈബ് ആണ് നൽകുന്നത്.

റൈസ് കേക്കുകൾ അഥവാ 'ടുക്ബോകി' (Tteokbokki) ആണ് മറ്റൊരു വിഭവം. ച്യൂയി ആയ ഈ റൈസ് കേക്കുകൾ എരിവുള്ള ഗോച്ചുജാങ് (Gochujang) സോസിൽ വേവിച്ചെടുക്കുന്നതാണ്. കൊറിയൻ സ്ട്രീറ്റ് ഫുഡ് വീഡിയോകളിൽ ഇത് കാണാത്തവർ ചുരുക്കമായിരിക്കും. ഇതിനോടൊപ്പം തന്നെ പറയേണ്ട ഒന്നാണ് 'ബിബിംബാപ്പ്' (Bibimbap). പലതരം പച്ചക്കറികളും ഇറച്ചിയും മുട്ടയും റൈസും ചേർത്ത് ഒരു ബൗളിൽ മിക്സ് ചെയ്ത് കഴിക്കുന്ന ഈ വിഭവം ഒരു കംപ്ലീറ്റ് മീൽ ആണ്. ഹെൽത്തി ആയ ഫുഡ് ഓപ്ഷൻ തിരയുന്നവർക്ക് ബിബിംബാപ്പ് ആണ് ഇപ്പോൾ മെയിൻ ചോയ്‌സ്.

ഭക്ഷണം കഴിക്കുന്നത് വെറുമൊരു വിശപ്പടക്കൽ മാത്രമല്ല, അതൊരു എക്സ്പീരിയൻസ് കൂടിയാണെന്ന് വിശ്വസിക്കുന്നവരാണ് ജെൻ സി. കൊറിയൻ ഭക്ഷണങ്ങൾ കഴിക്കുമ്പോൾ അവർ ഉപയോഗിക്കുന്ന ചോപ്സ്റ്റിക്സും അവിടുത്തെ സ്പെഷ്യൽ ടേബിൾ മാനേഴ്സും ഒക്കെ അവർക്ക് ഒരു ഗ്ലോബൽ ഫീലിംഗ് നൽകുന്നു. കൊച്ചിയിലും തിരുവനന്തപുരത്തും കോഴിക്കോട്ടും ഒക്കെ ഇപ്പോൾ കൊറിയൻ കഫേകൾ വർദ്ധിച്ചു വരുന്നതും ഇതുകൊണ്ട് തന്നെയാണ്. വീക്കെൻഡുകളിൽ ഇത്തരം കഫേകളിൽ ക്യൂ നിൽക്കുന്ന തിരക്ക് കണ്ടാൽ തന്നെ അറിയാം ഈ കെ-ഫുഡ് ഫീവർ എത്രത്തോളമുണ്ടെന്ന്.

കൊറിയൻ വിഭവങ്ങൾ ഹെൽത്തി ആണെന്ന കാര്യത്തിലും ആർക്കും സംശയമില്ല. എണ്ണയിൽ വറുത്ത പലഹാരങ്ങളേക്കാൾ സ്റ്റീം ചെയ്തതും പുളിപ്പിച്ചതുമായ വിഭവങ്ങൾക്കാണ് കൊറിയൻ ഫുഡിൽ പ്രാധാന്യം. പച്ചക്കറികളുടെ അമിതമായ ഉപയോഗം ചർമ്മത്തിന്റെ ആരോഗ്യത്തിനും നല്ലതാണ്. 'ഗ്ലാസ് സ്കിൻ' എന്ന ബ്യൂട്ടി ട്രെൻഡിന് പിന്നിലും ഇത്തരം ഹെൽത്തി ഭക്ഷണരീതികൾ ഉണ്ടെന്ന് ഇവർ വിശ്വസിക്കുന്നു. അതുകൊണ്ട് തന്നെ ജങ്ക് ഫുഡ് കഴിക്കുന്നതിനേക്കാൾ സന്തോഷത്തോടെ കൊറിയൻ ഡിഷുകൾ തിരഞ്ഞെടുക്കാൻ ഇന്നത്തെ തലമുറ തയ്യാറാവുന്നു.

ഇന്ത്യൻ സുഗന്ധവ്യഞ്ജനങ്ങളും കൊറിയൻ ടേസ്റ്റും തമ്മിലുള്ള ഒരു സാമ്യവും ഈ ജനപ്രീതിക്ക് കാരണമായിട്ടുണ്ട്. മലയാളികൾക്ക് പൊതുവെ എരിവുള്ള ഭക്ഷണങ്ങളോട് ഒരു പ്രത്യേക ഇഷ്ടമുണ്ട്. കൊറിയൻ ഭക്ഷണത്തിലെ മുളകിന്റെ ഉപയോഗം ആ ടേസ്റ്റ് ബഡ്സിനെ സാറ്റിസ്ഫൈ ചെയ്യാൻ സഹായിക്കുന്നു. യൂട്യൂബിലും ഇൻസ്റ്റാഗ്രാമിലും ഫുഡ് വ്ലോഗേഴ്സ് ചെയ്യുന്ന 'മുകബാംഗ്' (Mukbang) വീഡിയോകൾ കണ്ടാണ് പലരും പുതിയ വിഭവങ്ങൾ പരീക്ഷിക്കുന്നത്. ഭക്ഷണം കഴിക്കുന്നത് മറ്റുള്ളവരെ കാണിക്കുന്ന ഈ വീഡിയോകൾക്ക് വലിയൊരു വ്യൂവർഷിപ്പ് ആണ് ഇന്നുള്ളത്.

ചുരുക്കത്തിൽ കൊറിയൻ ഫുഡ് എന്നത് വെറുമൊരു തരംഗമല്ല, അതൊരു കൾച്ചറൽ റെവല്യൂഷൻ ആണ്. സ്പൈസി നൂഡിൽസിൽ തുടങ്ങി ബിബിംബാപ്പിൽ എത്തിനിൽക്കുന്ന ഈ ജേർണി ഇനിയും വളരും എന്ന് ഉറപ്പാണ്.