ഇതൊക്കെയാണ് ജീവിതത്തോടുള്ള ആർജ്ജവം; വയസ് 108, ലോകത്തിലെ ഏറ്റവും പ്രായം ചെന്ന പെൺബാർബർ

ആ പ്രതികൂല സാഹചര്യങ്ങളിൽ ഒന്നും തന്നെ അവർ തളർന്നില്ല. 1953 -ൽ അവർ നകഗാവയിലേക്ക് മടങ്ങുകയും മറ്റൊരു ബാർബർഷോപ്പ് തുറക്കുകയും ചെയ്തു.

ലോകത്തിലെ ഏറ്റവും പ്രായം കൂടിയ വനിതാ ബാർബറായി 108 വയസുള്ള ജപ്പാൻകാരിയെ തെരഞ്ഞെടുത്ത് ​ഗിന്നസ് വേൾഡ് റെക്കോർ‌ഡ്സ്. ഷിറ്റ്സുയി ഹകോയിഷി എന്ന സ്ത്രീ കഴിഞ്ഞ 94 വർഷങ്ങളായി ഈ ജോലി ചെയ്യുകയാണ്. ഈ 108 -ാം വയസ്സിലും അത് തുടരുകയും ചെയ്യുന്നു. 

മാർച്ച് 5 -നാണ് ടോച്ചിഗി പ്രിഫെക്ചറിലെ നകഗാവയിൽ നടന്ന ചടങ്ങിൽ ഹകോയിഷിക്ക് ഗിന്നസ് വേൾഡ് റെക്കോർഡിൽ നിന്നുള്ള ഈ അംഗീകാരം ലഭിച്ചത്. അവിടെ തന്നെയാണ് ഇപ്പോഴും അവർ തന്റെ ബാർബർഷോപ്പ് നടത്തുന്നത്. 1931 -ലാണ്, സ്വന്തം ജന്മനാട് വിട്ട് ഷിറ്റ്സുയി ടോക്കിയോയിലെ ഒരു ചെറിയ സലൂണിലേക്ക് അപ്രന്റീസായി വന്നത്. അതായിരുന്നു അവരുടെ കരിയറിന്റെ തുടക്കം. 20 -ാം വയസ്സിൽ അവർ തന്റെ ബാർബർ ലൈസൻസ് നേടി. 

1939 -ൽ ഷിറ്റ്സുയിയും ഭർത്താവും ടോക്യോയിൽ സ്വന്തം ബാർബർ തുടങ്ങി. എന്നാൽ, രണ്ടാം ലോക മഹായുദ്ധം അവരുടെ ജീവിതത്തെ ദുരിതത്തിലേക്ക് നയിച്ചു. ആ സമയത്താണ് അവരുടെ ഭർത്താവ് മരിക്കുന്നതും അവരുടെ സലൂൺ വ്യോമാക്രമണത്തിൽ തകരുന്നതും. 

എന്നാൽ, ആ പ്രതികൂല സാഹചര്യങ്ങളിൽ ഒന്നും തന്നെ അവർ തളർന്നില്ല. 1953 -ൽ അവർ നകഗാവയിലേക്ക് മടങ്ങുകയും മറ്റൊരു ബാർബർഷോപ്പ് തുറക്കുകയും ചെയ്തു. അവിടെ സ്ഥിരമായി വരുന്ന വിശ്വസ്തരായ ഒരുപാട് ആളുകളുണ്ട്. ഈ ജോലി നിർത്താൻ താൻ ഉദ്ദേശിക്കുന്നില്ല എന്നാണ് ഷിറ്റ്സുയി പറയുന്നത്. 

ഇതുകൊണ്ടൊന്നും തീരുന്നില്ല ഷിറ്റ്സുയിയുടെ നിശ്ചയദാർഢ്യം. 2020 -ലെ ടോക്യോ ഒളിംപിക്സിൽ ദീപശിഖയേന്താനായി അവർക്ക്. അതിനായി കഠിനമായ പരിശ്രമവും അവർ നടത്തിയിരുന്നു. ആ അനുഭവത്തെ കുറിച്ച് ഏറെ അഭിമാനത്തോടെയാണ് ഷിറ്റ്സുയി പറയുന്നത്. 108 -ാം വയസ്സിലും ജീവിതത്തെ ഇത്രയേറെ പൊസിറ്റീവായി കാണുന്ന ഷിറ്റ്സുയി ആർക്കും പ്രചോദനമാണ്. 

ഏഷ്യാനെറ്റ് ന്യൂസ് ലൈവ് കാണാം