കോടീശ്വരനെന്ന് കേൾക്കുന്നതേ ഇഷ്ടമല്ല, സ്വത്ത് ദാനം ചെയ്ത 86 -കാരൻ, ഒരിക്കൽ കഴി‍ഞ്ഞത് കാട്ടിലും മലയിലും, കഴിച്ചത് കാറ്റ് ഫുഡ്

2005 -ൽ പുറത്തിറങ്ങിയ അദ്ദേഹത്തിൻ ആത്മകഥയാണ് 'ലെറ്റ് മൈ പീപ്പിൾ ഗോ സർഫിംഗ്: ദി എഡ്യൂക്കേഷൻ ഓഫ് എ റിലക്റ്റന്റ് ബിസിനസ്മാൻ'. അതിൽ പണം ലാഭിക്കാൻ വേണ്ടി താൻ ചെയ്ത ഏറ്റവും കഠിനമായ ചില കാര്യങ്ങളെക്കുറിച്ച് ചൗനാർഡ് വിശദമായി പറയുന്നുണ്ട്.

കോടീശ്വരൻ എന്ന വിളി കേൾക്കുന്നത് ഇഷ്ടപ്പെടാത്ത ആരെങ്കിലും ഉണ്ടാവുമോ? അതേ, അങ്ങനെ ഒരാളുണ്ട്. അതാണ് പാറ്റഗോണിയയുടെ സ്ഥാപകനായിരുന്ന, 86 -കാരനായ യോവോൺ ചൗനാർഡ്. ഫോർബ്സിന്റെ 2017 -ലെ ശതകോടീശ്വരന്മാരുടെ പട്ടികയിൽ തന്റെ പേര് ഉൾപ്പെടുത്തിയപ്പോൾ സന്തോഷിക്കുന്നതിന് പകരം അദ്ദേഹം വളരെയധികം രോഷാകുലനാവുകയാണത്രെ ചെയ്തത്. മാത്രമല്ല, തന്റെ കമ്പനി ഉപേക്ഷിക്കാനും അദ്ദേഹം തീരുമാനിച്ചു. കമ്പനിയിലെ തന്റെ മുഴുവൻ ഉടമസ്ഥാവകാശവും ഒരു ട്രസ്റ്റിലേക്കും ഒരു നോൺ പ്രോഫിറ്റ് ഓർ​ഗനൈസേഷനിലേക്കും അദ്ദേഹം മാറ്റുകയായിരുന്നു.

ഇപ്പോൾ അദ്ദേഹം ഒരു കോടീശ്വരനല്ല, വളരെ ലളിതമായ ജീവിതമാണ് അദ്ദേഹം നയിക്കുന്നത്. എന്നാൽ, ഈ ലളിതമായ ജീവിതമാണ് അദ്ദേഹത്തിന് ഇഷ്ടം എന്നാണ് പറയുന്നത്. ജീവിതകാലം മുഴുവനും മലകയറാനിഷ്ടപ്പെട്ടിരുന്ന ചൗനാർഡ് വർഷങ്ങളോളം ഘോരവനങ്ങളിൽ ഉറങ്ങുകയും അത്യാവശ്യത്തിനുള്ള സാധനങ്ങൾ മാത്രം കഴിച്ച് ജീവിക്കുകയും ചെയ്തിരുന്നു.

2005 -ൽ പുറത്തിറങ്ങിയ അദ്ദേഹത്തിൻ ആത്മകഥയാണ് 'ലെറ്റ് മൈ പീപ്പിൾ ഗോ സർഫിംഗ്: ദി എഡ്യൂക്കേഷൻ ഓഫ് എ റിലക്റ്റന്റ് ബിസിനസ്മാൻ'. അതിൽ പണം ലാഭിക്കാൻ വേണ്ടി താൻ ചെയ്ത ഏറ്റവും കഠിനമായ ചില കാര്യങ്ങളെക്കുറിച്ച് ചൗനാർഡ് വിശദമായി പറയുന്നുണ്ട്. പൂച്ചകൾക്ക് വേണ്ടിയുള്ള ഭക്ഷണം കഴിച്ചതും ചാർക്കോൾ വാട്ടർ കുടിച്ചതുമെല്ലാം അതിൽ പെടുന്നു. 1957 -ൽ, താനും സുഹൃത്തുക്കളും മെക്സിക്കോയിലെ ഒരു കുടിലിൽ താമസിക്കുകയും പഴങ്ങളും മത്സ്യവും മാത്രം കഴിച്ച് ജീവിച്ചതെങ്ങനെയാണെന്നും അദ്ദേഹം പറയുന്നു. ഒരു പള്ളിയിൽ നിന്നുള്ള മെഴുകുതിരിയാണ് അവർ തങ്ങളുടെ സർഫ് ബോർഡ് വാക്സായി ഉപയോ​ഗിച്ചത്.

മലകയറാനും മറ്റും പോകുമ്പോൾ മോശം കാലാവസ്ഥയും മോശം വെള്ളം കുടിക്കുന്നതും മറ്റും തന്നെയും സുഹൃത്തുക്കളെയും രോ​ഗികളാക്കിയിരുന്നു. എന്നാൽ, മരുന്ന് വാങ്ങാൻ പണമുണ്ടായിരുന്നില്ല എന്നും ചൗനാർഡ് പറയുന്നു. ഇങ്ങനെയൊക്കെ ജീവിച്ചതിനാൽ തന്നെ കോടീശ്വരനായത് തന്നെ സന്തോഷിപ്പിച്ചിട്ടില്ല എന്നാണ് അദ്ദേഹത്തിന്റെ പക്ഷം. അതിനാൽ തന്നെ ലളിതമായ ജീവിതമാണ് തനിക്ക് പ്രിയമെന്നും പരിചിതമെന്നും അദ്ദേഹം പറയുന്നു.