81 കോടി ഇന്ത്യക്കാരുടെ ആധാര് വിവരങ്ങള് ചോര്ത്തിയ സംഭവത്തില് മൂന്ന് പേര് അറസ്റ്റിലായി
Synopsis
ഐസിഎംആറിന്റെ ഡേറ്റാ ബേസില് നിന്നാണ് വിവരങ്ങള് ചോര്ത്തിരിക്കുന്നതെന്ന് റിപ്പോര്ട്ടുകള് വന്നതിന് പിന്നാലെ സംഭവത്തില് അന്വേഷണം സിബിഐ ഏറ്റെടുക്കുകയും ചെയ്തിരുന്നു.
ന്യുഡല്ഹി: 81 കോടി ഇന്ത്യക്കാരുടെ ആധാർ വിവരങ്ങൾ ചോർത്തി സംഭവത്തിത്തിൽ മൂന്നുപേർ അറസ്റ്റിലായി. ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ (ഐ.സി.എം.ആര്) വിവരങ്ങളാണ് ചോർത്തിയതെന്ന് പ്രതികൾ ദില്ലി പൊലീസിനോട് പറഞ്ഞു. അമേരിക്കയിലെ ഫെഡറല് ബ്യൂറോ ഓഫ് ഇന്വെസ്റ്റിഗേഷന് (എഫ്.ബി.ഐ) വിവരങ്ങളും ചോർത്തിയെന്ന് പ്രതികൾ പറഞ്ഞു.
81.5 കോടി ഇന്ത്യക്കാരുടെ വ്യക്തി വിവരങ്ങള് ഡാര്ക്ക് വെബിലൂടെ പുറത്തുവന്നുവെന്നാണ് റിപ്പോര്ട്ടുകള് വിശദമാക്കിയിരുന്നത്. ഇന്ത്യയുടെ ചരിത്രത്തിലെ ഏറ്റവും വലിയ ഡാറ്റാ ചോര്ച്ചയാണിതെന്നും സാങ്കേതിക രംഗത്തുള്ളവര് വിശേഷിപ്പിച്ചു. സൂചന. ഐസിഎംആറിന്റെ ഡേറ്റാ ബേസില് നിന്നാണ് വിവരങ്ങള് ചോര്ത്തിരിക്കുന്നതെന്ന് റിപ്പോര്ട്ടുകള് വന്നതിന് പിന്നാലെ സംഭവത്തില് അന്വേഷണം സിബിഐ ഏറ്റെടുക്കുകയും ചെയ്തിരുന്നു.
ചോർന്ന വിവരങ്ങള് ഡാര്ക്ക് വെബില് പരസ്യം ചെയ്ത വിവരം 'pwn0001' എന്ന ഹാക്കറാണ് പൊതു ജനശ്രദ്ധയില് പെടുത്തിയത്. ആധാര്, പാസ്പോര്ട്ട് വിശദാംശങ്ങള്, കൂടാതെ ദശലക്ഷക്കണക്കിന് ഇന്ത്യക്കാരുടെ പേരുകള്, ഫോണ് നമ്പറുകള്, താല്ക്കാലികവും സ്ഥിരവുമായ വിലാസങ്ങള് എന്നിവ ചോര്ന്ന വിവരങ്ങളില് ഉള്പ്പെടുന്നുണ്ടെന്നും ഹാക്കര് വിശദീകരിച്ചു. കൊവിഡ്-19 പരിശോധനയ്ക്കിടെ ഐസിഎംആര് ശേഖരിച്ച വിവരങ്ങളാണ് ചോർന്നതെന്നാണ് ഹാക്കര് അവകാശപ്പെടുന്നത്. കേരളത്തിലെ നിരവധി പേരുടെ വിവരങ്ങളും ചോർന്നതായി സ്ക്രീൻ ഷോട്ടുകളിൽ വ്യക്തമായിരുന്നു.
സൈബര് സുരക്ഷയിലും ഇന്റലിജന്സിലും വൈദഗ്ധ്യമുള്ള അമേരിക്കന് ഏജന്സിയായ റെസെക്യൂരിറ്റിയാണ് ഡാറ്റാ ലംഘനത്തിനെ കുറിച്ച് പ്രാഥമിക കണ്ടെത്തല് നടത്തിയത്. ചോര്ന്ന വിവരങ്ങളില് ഇന്ത്യന് പൗരന്മാരുടെ സ്വകാര്യ വിവരങ്ങളുള്ള 1,00,000 ഫയലുകളുണ്ടെന്ന് ഗവേഷകര് പറഞ്ഞു. കമ്പ്യൂട്ടര് എമര്ജന്സി റെസ്പോണ്സ് ടീം ഓഫ് ഇന്ത്യയും ഡാറ്റ ചോര്ച്ചയെ കുറിച്ച് ഐസിഎംആറിന് മുന്നറിയിപ്പ് നല്കിയിരുന്നു. രാജ്യത്തെ കൊവിഡ് പരിശോധനാ വിവരങ്ങള് നാഷണല് ഇന്ഫോര്മാറ്റിക്സ് സെന്റര്, ഐസിഎംആര്, കേന്ദ്ര ആരോഗ്യ മന്ത്രാലയം എന്നിങ്ങനെ വിവിധ സര്ക്കാര് സ്ഥാപനങ്ങളുടെ പക്കലാണ് ഉള്ളത്.
ഏഷ്യാനെറ്റ് ന്യൂസ് ലൈവ് യുട്യൂബില് കാണാം...