ഗോവയ്ക്ക് പറക്കാൻ ഇനി 'ലോട്ടറി' അടിക്കണം! ടിക്കറ്റിന് തീവില; ക്രിസ്മസ്-ന്യൂ ഇയർ പ്ലാൻ പൊളിയുമോ?

ക്രിസ്മസ്-ന്യൂ ഇയർ അവധിക്കാലത്ത് ഗോവയിലേക്കുള്ള വിമാന ടിക്കറ്റ് നിരക്കിൽ വൻ വര്‍ധന. ഈ നിരക്ക് വർധനവ് ഗോവയിൽ അവധി ആഘോഷിക്കാൻ പദ്ധതിയിട്ടവരെ കാര്യമായി ബാധിച്ചിട്ടുണ്ട്. 

തിരുവനന്തപുരം: ക്രിസ്മസ്-ന്യൂ ഇയർ അവധിക്കാലം ആഘോഷിക്കാൻ ​ഗോവയിലേയ്ക്ക് പറക്കാൻ പ്ലാൻ ചെയ്തവർക്ക് കനത്ത തിരിച്ചടി. ​ഗോവയിലേയ്ക്കുള്ള വിമാന ടിക്കറ്റ് നിരക്ക് കുത്തനെ ഉയരുന്ന കാഴ്ചയാണ് ഇപ്പോൾ കാണാനാകുന്നത്. ഡിസംബർ പകുതി മുതൽ ജനുവരി ആദ്യ വാരം വരെ ടിക്കറ്റ് നിരക്കുകളിൽ വലിയ വർധനയാണ് വിമാനക്കമ്പനികൾ വരുത്തിയിരിക്കുന്നത്. ഇതോടെ ക്രിസ്മസ് - ന്യൂ ഇയർ അവധിക്കാലം ​ഗോവയിൽ അടിച്ചുപൊളിക്കാൻ പ്ലാൻ ചെയ്തവർക്ക് വലിയ നിരാശയാണ് ഉണ്ടായിരിക്കുന്നത്.

സാധാരണ 3,000 രൂപ മുതൽ 5,000 രൂപ മാത്രം ചെലവിൽ കൊച്ചിയിൽ നിന്ന് ഗോവയിലേയ്ക്ക് പറക്കാമായിരുന്നു. എന്നാൽ, ഈ സ്ഥാനത്ത് ഇപ്പോൾ ഏതാണ്ട് 12,000 - 15,000 രൂപയാണ് ​കൊച്ചി-​ഗോവ വിമാന ടിക്കറ്റ് നിരക്ക്. അതായത് മൂന്നിരട്ടിയിലധികമാണ് നിരക്കിലെ വർധന. ഇത് സാധാരണക്കാരെയാണ് ഏറ്റവും കൂടുതൽ ബാധിക്കുക.

ക്രിസ്മസിനോട് അടുത്ത ദിവസങ്ങളിലും ന്യൂ ഇയറിനോട് അടുത്ത ദിവസങ്ങളിലും പ്രധാന ആഘോഷ കേന്ദ്രങ്ങളിലേക്കുള്ള യാത്രകളെയാണ് ഈ നിരക്ക് വർധനവ് വലിയ രീതിയിൽ ബാധിക്കുന്നത്. ക്രിസ്മസും തുടർന്ന് വരുന്ന ന്യൂ ഇയറും ​ഗോവയിലെ ടൂറിസം മേഖലയെ സംബന്ധിച്ച് ഏറെ പ്രധാനമാണ്. മലയാളികളും ഈ സമയം കൂടുതലായി ​ഗോവയിലെത്താറുണ്ട്.

ദില്ലി, മുംബൈ, ബെംഗളൂരു തുടങ്ങിയ മറ്റ്‌ പ്രധാന ഇന്ത്യൻ ന​ഗരങ്ങളിലേയ്ക്കുള്ള ആഭ്യന്തര യാത്രയ്ക്കും ഈ സമയം ചെലവേറും. ഈ റൂട്ടുകളിലെല്ലാം നിരക്ക് വർധനവ് പ്രകടമാണ്. ആഭ്യന്തര യാത്രകൾക്ക് പുറമെ വിദേശ യാത്രകൾക്കും വിമാനക്കമ്പനികൾ ടിക്കറ്റ് നിരക്കുകൾ കുത്തനെ വർധിപ്പിച്ചിട്ടുണ്ട്.