ടോൾ അടയ്ക്കേണ്ട, ഫാസ്‍ടാഗ് നിയമങ്ങളിൽ നിർണായക മാറ്റം; ഇളവ് ലഭിക്കുന്നവർ അറിയണം ഈ മാറ്റം

വികലാംഗർക്ക് ടോൾ ഇളവ് ലഭിക്കുന്ന ഡിസ്കൗണ്ട് ഫാസ്ടാഗിന്റെ കാലാവധി സംബന്ധിച്ച നിയമങ്ങൾ കേന്ദ്ര സർക്കാർ പരിഷ്കരിച്ചു. പുതിയ വ്യവസ്ഥകൾ പ്രകാരം വൈകല്യത്തിന്റെ ശതമാനം അനുസരിച്ച് ഫാസ്ടാഗിന് 3 മുതൽ 5 വർഷം വരെ സാധുത ലഭിക്കും. ഇതോടെ ഓരോ വർഷവും ഫാസ്ടാഗ് പുതുക്കേണ്ടി വരുന്ന ബുദ്ധിമുട്ട് ഒഴിവാകും.

രാജ്യത്തെ ഹൈവേകളിലും എക്സ്പ്രസ് വേകളിലും ദിവസേന യാത്ര ചെയ്യുന്ന ലക്ഷക്കണക്കിന് വാഹനങ്ങൾക്ക് ബാധകമായ ഫാസ്ടാഗ് സംവിധാനത്തിൽ പുതിയ മാറ്റം. വികലാംഗർക്ക് ടോൾ ഇളവ് ലഭിക്കുന്ന ഡിസ്‍കൌണ്ട് ഫാസ്‍ടാഗിന്റെ കാലാവധി സംബന്ധിച്ച നിയമങ്ങളാണ് കേന്ദ്ര റോഡ് ഗതാഗത, ഹൈവേ മന്ത്രാലയം പരിഷ്‍കരിച്ചത്. പുതിയ വ്യവസ്ഥകൾ ഇന്ന് മുതൽ പ്രാബല്യത്തിൽ വരും. വികലാംഗർക്ക് ടോൾ പ്ലാസകളിലൂടെ കൂടുതൽ എളുപ്പത്തിൽ യാത്ര ചെയ്യാൻ സാധിക്കുന്ന തരത്തിലാണ് പുതിയ സംവിധാനം ഒരുക്കിയിരിക്കുന്നത്. മുമ്പ് ഇളവുള്ള ഫാസ്ടാഗ് ഓരോ വർഷവും പുതുക്കേണ്ടി വന്നിരുന്നു. ഇതിനായി വീണ്ടും അപേക്ഷയും ആവശ്യമായ രേഖകളും സമർപ്പിക്കേണ്ട സാഹചര്യമുണ്ടായിരുന്നു. പുതിയ നിയമത്തോടെ ഈ വാർഷിക പുതുക്കൽ ഒഴിവാകും.

വൈകല്യത്തിന്റെ ശതമാനം അനുസരിച്ച് കാലാവധി

പുതിയ നിയമപ്രകാരം ഡിസ്കൗണ്ട് ഫാസ്ടാഗിന്റെ സാധുത വ്യക്തിയുടെ വൈകല്യത്തിന്റെ ശതമാനത്തെ അടിസ്ഥാനമാക്കിയായിരിക്കും നിശ്ചയിക്കുക. വൈകല്യം 70% മുതൽ 100% വരെ ഉള്ള യോഗ്യരായ വ്യക്തികൾക്ക് ലഭിക്കുന്ന ഡിസ്കൗണ്ട് ഫാസ്ടാഗിന് 5 വർഷം സാധുതയുണ്ടാകും. അതേസമയം 40%ന് മുകളിൽ, 70%ൽ താഴെ വൈകല്യമുള്ള യോഗ്യരായ വ്യക്തികൾക്ക് 3 വർഷം സാധുത ലഭിക്കും.

ഇനി എല്ലാ വർഷവും അപേക്ഷിക്കേണ്ട

പുതിയ സംവിധാനം പ്രാബല്യത്തിൽ വരുന്നതോടെ അർഹരായ വ്യക്തികൾക്ക് എല്ലാ വർഷവും ഫാസ്ടാഗ് പുതുക്കുന്നതിനുള്ള നടപടിക്രമങ്ങൾ പൂർത്തിയാക്കേണ്ടി വരില്ല. 3 അല്ലെങ്കിൽ 5 വർഷത്തെ സാധുത അവസാനിച്ച ശേഷം മാത്രമേ ആവശ്യമായ രേഖകൾ സഹിതം വീണ്ടും അപേക്ഷിക്കേണ്ടതുള്ളൂ. അപേക്ഷ ഓൺലൈനായോ ഓഫ്‌ലൈനായോ സമർപ്പിക്കാം. ഇതോടെ ടോൾ ഇളവ് ലഭിക്കുന്നതിന് ഓരോ വർഷവും നടത്തേണ്ടിയിരുന്ന പേപ്പർവർക്കും മറ്റ് നടപടിക്രമങ്ങളും കുറയും.

ടോൾ ഇളവിന് ഈ നിബന്ധനകൾ ബാധകം

എല്ലാ വാഹനങ്ങൾക്കും ഡിസ്കൗണ്ട് ഫാസ്ടാഗ് ലഭിക്കില്ല. യോഗ്യരായ വ്യക്തികൾക്ക് സർക്കാർ അംഗീകരിച്ച സാധുവായ വൈകല്യ സർട്ടിഫിക്കറ്റ് ഉണ്ടായിരിക്കണം. വാഹനം വികലാംഗന്റെ പേരിൽ രജിസ്റ്റർ ചെയ്തതോ അവരുടെ ഉപയോഗത്തിനായി പ്രത്യേകം രജിസ്റ്റർ ചെയ്തതോ ആയിരിക്കണം. ഇത്തരം പ്രത്യേക ഫാസ്ടാഗ് ഘടിപ്പിച്ച വാഹനങ്ങൾക്ക് മാത്രമേ ടോൾ ഇളവ് ലഭിക്കൂ. യോഗ്യതയില്ലാത്ത വ്യക്തി ഈ സൗകര്യം ദുരുപയോഗം ചെയ്യുന്നതായി കണ്ടെത്തിയാൽ ഫാസ്ടാഗ് കരിമ്പട്ടികയിൽ ഉൾപ്പെടുത്താനും നടപടിയുണ്ടാകാം.

ഡിജിറ്റൽ പരിശോധനയും എളുപ്പമാകും

ടോൾ പ്ലാസകളിൽ ഫാസ്ടാഗ് പരിശോധിക്കുന്ന നടപടിക്രമം കൂടുതൽ ലളിതമാക്കാനും പുതിയ സംവിധാനം സഹായിക്കുമെന്നാണ് സർക്കാർ വ്യക്തമാക്കുന്നത്. ഡിജിറ്റൽ പരിശോധനയിലൂടെ സമയം ലാഭിക്കുന്നതിനൊപ്പം വ്യാജ രേഖകൾ ഉപയോഗിച്ച് ടോൾ ഇളവ് നേടാനുള്ള ശ്രമങ്ങൾ തടയാനും സാധിക്കും. യോഗ്യരായ വികലാംഗർക്ക് എൻ.എച്ച്.എ.ഐയുടെയോ കേന്ദ്ര റോഡ് ഗതാഗത, ഹൈവേ മന്ത്രാലയത്തിന്റെയോ ഔദ്യോഗിക സൗജന്യ ഫാസ്ടാഗ് പോർട്ടൽ വഴി ദീർഘകാല സാധുതയുള്ള ഫാസ്ടാഗിന് അപേക്ഷിക്കാം. ഇതിനായി സാധുവായ യു.ഡി.ഐ.ഡി കാർഡും ബന്ധപ്പെട്ട വാഹന രേഖകളും സമർപ്പിക്കേണ്ടതുണ്ട്.