ഏഷ്യയിലെ ഏറ്റവും വൃത്തിയുള്ള ഗ്രാമമെന്നറിയപ്പെടുന്ന ഗ്രാമം ഏതാണ് എന്ന് അറിയാമോ? അതാണ് മേഘാലയയിലെ മാവ്ലിന്നോങ്ങ്. അതിമനോഹരമായ ഈ ഗ്രാമത്തെ കുറിച്ച് കുറച്ച് കാര്യങ്ങൾ.
ഇവിടെ 2026 ജനുവരി മുതൽ ഞായറാഴ്ചകളിൽ പകൽ സന്ദർശകർക്ക് പ്രവേശനമില്ല.
പരമ്പരാഗത ഖാസി വീടുകൾക്ക് പുറമെ പ്രശസ്തമായ റിവായി ലിവിങ് റൂട്ട് ബ്രിഡ്ജ്, ബംഗ്ലാദേശ് അതിർത്തി കാണാൻ സാധിക്കുന്ന സ്കൈ വ്യൂ എന്നിവയാണ് ഈ വിനോദസഞ്ചാര കേന്ദ്രത്തിലെ പ്രധാന കാഴ്ചകൾ.
പ്രകൃതിദത്തമായ രീതിയിലുള്ള ശുചീകരണ പ്രവർത്തനങ്ങളിലൂടെ 2003 -ൽ 'ഡിസ്കവർ ഇന്ത്യ' മാഗസിൻ മാവ്ലിന്നോങ്ങിനെ ഏഷ്യയിലെ ഏറ്റവും വൃത്തിയുള്ള ഗ്രാമമായി തെരഞ്ഞെടുത്തിരുന്നു.
ഗ്രാമത്തിലെ ഓരോ വീട്ടുകാരുടെയും കൂട്ടായ പങ്കാളിത്തം. കൃത്യമായ മാലിന്യ സംസ്കരണം, പ്ലാസ്റ്റിക് നിരോധനം, മുളകൊണ്ടുണ്ടാക്കിയ ഡസ്റ്റ്ബിന്നുകള് ഇവിടെ നിത്യജീവിതത്തിന്റെ ഭാഗം.
ഇന്ത്യയിൽ വിനോദസഞ്ചാരികളുടെ എണ്ണത്തേക്കാൾ പ്രദേശവാസികളുടെ ക്ഷേമത്തിന് മുൻഗണന നൽകിക്കൊണ്ട് ആഴ്ചയിൽ ഒരു ദിവസം ടൂറിസം പൂർണ്ണമായി ഒഴിവാക്കുന്ന അപൂർവ്വം ഗ്രാമങ്ങളിലൊന്നായി ഇത് മാറി.
പ്രദേശവാസികളുമായി നടത്തിയ വിശദമായ ചർച്ചകൾക്ക് ശേഷമാണ് വില്ലേജ് കൗൺസിലായ 'ദോർബാർ ഷ്നോങ്' ഈ സുപ്രധാന തീരുമാനമെടുത്തത്.
ഞായറാഴ്ചകളിലെ ഈ നിയന്ത്രണം പകൽ സമയത്ത് മാത്രം സന്ദർശനത്തിനെത്തുന്നവർക്കാണ് ബാധകം. ഗ്രാമത്തിലെ ഹോംസ്റ്റേകളിൽ മുൻകൂട്ടി ബുക്ക് ചെയ്ത് താമസിക്കുന്ന സഞ്ചാരികൾക്ക് നിയന്ത്രണമില്ല.
ഗ്രാമവാസികൾക്ക് ഞായറാഴ്ചകളിൽ തടസ്സമില്ലാതെ പള്ളി ആരാധനകളിൽ പങ്കെടുക്കാനും ടൂറിസം തിരക്കുകളിൽ നിന്ന് മാറി കുടുംബത്തോടൊപ്പം സമയം ചിലവഴിക്കാനും വേണ്ടിയാണ് ഈ ക്രമീകരണം.
ഞായറാഴ്ചകളിൽ ഗ്രാമത്തിലെ ഭൂരിഭാഗം കടകളും കഫേകളും അടഞ്ഞുകിടക്കാറുള്ളതിനാൽ അന്ന് എത്തുന്ന സഞ്ചാരികൾക്കുണ്ടാകുന്ന ബുദ്ധിമുട്ടുകൾ ഒഴിവാക്കുക എന്നതും ഇതിന്റെ ലക്ഷ്യമാണ്.
ടൂറിസത്തെ നിരുത്സാഹപ്പെടുത്തുകയല്ല, മറിച്ച് ഗ്രാമത്തിന്റെ സമാധാനപരമായ അന്തരീക്ഷവും തദ്ദേശീയമായ ഖാസി സംസ്കാരവും തനിമ ചോരാതെ നിലനിർത്തുകയാണ് ഇതിലൂടെ ലക്ഷ്യമിടുന്നത്.