മുടി കരുത്തോടെ വളരാൻ ഉലുവ

മുടി കരുത്തോടെ വളരാൻ ഉലുവ മതിയാകും ; ഉപയോ​ഗിക്കേണ്ട വിധം

മുടിയുടെ പല പ്രശ്‌നങ്ങള്‍ക്കുമുള്ള നല്ലൊരു മരുന്നാണ് ഉലുവ. ഉലുവയിലെ അമിനോ ആസിഡുകളാണ് മുടിവളര്‍ച്ചയ്ക്ക് സഹായിക്കുന്നത്.

മുടി കൊഴിച്ചിൽ, താരൻ, തലയോട്ടിയിലെ ആരോഗ്യം എന്നിവയ്‌ക്കുള്ള ഒരു പ്രകൃതിദത്ത പരിഹാരമാണ് ഉലുവ. പ്രോട്ടീൻ, ഇരുമ്പ്, നിക്കോട്ടിനിക് ആസിഡ് എന്നിവയാൽ സമ്പുഷ്ടമാണ് ഉലുവ.

തലയോട്ടിയിലെ രക്തചംക്രമണം വർദ്ധിപ്പിക്കുന്നതിനും മുടിയുടെ കനം വർദ്ധിപ്പിക്കുന്നതിനും, താരൻ കുറയ്ക്കുന്നതിനും വീട്ടിൽ തന്നെ ഉലുവ കൊണ്ടുള്ള ഹെയർ പാക്കുകൾ ഉപയോ​ഗിക്കാവുന്നതാണ്.

മുടി തഴച്ച് വളരാൻ ഉലുവ ഉപയോ​ഗിക്കേണ്ടത് എങ്ങനെയെന്നതാണ് ഇനി പറയുന്നത്.

ആദ്യം ഉലുവ നന്നായി കുതിര്‍ക്കുക. ശേഷം ഇത് നല്ല പോലെ അരച്ചു പേസ്റ്റാക്കണം. ഇതില്‍ അല്‍പം ചെറുനാരങ്ങാനീര് ചേര്‍ത്തു മുടിയില്‍ പുരട്ടുക. അര മണിക്കൂര്‍ കഴിഞ്ഞു കഴുകിക്കളയാം.

വെളിച്ചെണ്ണയില്‍ ഉലുവയിട്ടു ചൂടാക്കുക. ഉലുവ ചുവന്ന നിറമാകുന്നത് വരെ ചൂടാക്കണം. ഈ ഓയില്‍ ചെറുചൂടോടെ മുടിയില്‍ പുരട്ടി മസാജ് ചെയ്യാവുന്നതാണ്. 

ഉലുവയും മുട്ടയുടെ മഞ്ഞയും കലക്കി മുടിയില്‍ തേച്ചു പിടിപ്പിക്കാം. അല്‍പം കഴിയുമ്പോള്‍ കഴുകിക്കളയുക. 

കുതിര്‍ത്ത ഉലുവയും കറിവേപ്പിലയും ചേര്‍ത്തരച്ച് മുടിയില്‍ തേയ്ക്കാം. ഇതു മുടി വളര്‍ച്ചയെ സഹായിക്കുമെന്നു മാത്രമല്ല, മുടിയ്ക്കു കറുപ്പ് നിറം നല്‍കാനും  നല്ലൊരു പ്രതിവിധിയാണ്.