ഏക പട്ടികവർഗ ഗ്രാമപഞ്ചായത്ത്

കേരളത്തിലെ ഏക പട്ടികവർഗ ഗ്രാമപഞ്ചായത്താണ് ഇടമലക്കുടി. പുതുതായി രൂപീകരിച്ച കവക്കാട്ടുകുടി വാർഡ് ഉൾപ്പെടെ ഇവിടെയുള്ള 14 വാർഡുകളും പട്ടികവർഗ വിഭാഗത്തിനായി സംവരണം ചെയ്തിട്ടുള്ളതാണ്.

ഇടമലക്കുടി പഞ്ചായത്തിൽ ആകെ 1803 വോട്ടർമാരാണുള്ളത് (893 സ്ത്രീകളും 910 പുരുഷന്മാരും). ഇവർക്കായി 41 സ്ഥാനാർത്ഥികൾ (20 സ്ത്രീകളും 21 പുരുഷന്മാരും) മത്സരിക്കുന്നു.

14 വാർഡുകളിൽ ഏഴെണ്ണം വനിതാ സംവരണമാണ്. മീൻകുത്തിക്കുടി, നൂറാടിക്കുടി, പരപ്പയാർകുടി, സൊസൈറ്റികുടി തുടങ്ങിയ വാർഡുകളാണ് സ്ത്രീ സംവരണം ചെയ്തവ.

കിലോമീറ്ററുകളോളം നടന്നു വേണം ഉദ്യോഗസ്ഥർക്ക് പോളിംഗ് സാമഗ്രികളുമായി അതീവ ദുർഘടമായ പോളിംഗ് സ്റ്റേഷനുകളിലെത്താൻ; 14 ബൂത്തുകളിലായി 56 ഉദ്യോഗസ്ഥരെ നിയോഗിക്കും.

പ്രതികൂല കാലാവസ്ഥയും വന്യമൃഗ സാന്നിധ്യവും കണക്കിലെടുത്ത് സുഗമമായ വോട്ടെടുപ്പിനായി ബൂത്തിൽ താൽക്കാലിക ഫെൻസിംഗ്, വനംവകുപ്പിലെ ആർ.ആർ.ടി. സേവനം എന്നിവ ഉറപ്പുവരുത്തും.

തിരഞ്ഞെടുപ്പ് പ്രവർത്തനങ്ങൾ ഫലപ്രദമായി ഏകോപിപ്പിക്കുന്നതിനായി പഞ്ചായത്തിനെ ഏഴ് സെക്ടറുകളായി തിരിച്ച് ഓരോ സെക്ടറിലും അസിസ്റ്റൻ്റുമാരെ നിയോഗിച്ചിട്ടുണ്ട്.