ഇറ്റാലിയന്‍ ഇരുചക്ര വാഹന നിര്‍മാതാക്കളായ ബെനലി പുതിയ TRK502, TRK502X അഡ്വഞ്ചർ മോട്ടോർസൈക്കിളുകൾ പുറത്തിറക്കി.
ഇറ്റാലിയന്‍ ഇരുചക്ര വാഹന നിര്‍മാതാക്കളായ ബെനലി പുതിയ TRK502, TRK502X അഡ്വഞ്ചർ മോട്ടോർസൈക്കിളുകൾ പുറത്തിറക്കി. നിലവിൽ അമേരിക്കൻ വിപണിക്കായി മാത്രമായാണ് ഇരു മോഡലുകളും എത്തിയിരിക്കുന്നത്. SSR മോട്ടോർസ്പോർട്‍സ് / ബെനലി ഡീലർഷിപ്പുകളിലൂടെയായിരിക്കും ബൈക്കുകൾ ലഭ്യമാവുക. 5,999 യുഎസ് ഡോളറാണ് (ഏകദേശം 4.42 ലക്ഷം രൂപ) പുതിയ TRK502 പതിപ്പിന് വില. ഓഫ്-റോഡ് അധിഷ്ഠിത TRK502X മോഡലിന് 6,399 യുഎസ് ഡോളറാണ് (ഏകദേശം 4.72 ലക്ഷം രൂപ) വില.
ഒരേ 499.6 സിസി പാരലൽ-ട്വിൻ എഞ്ചിനാണ് പുതിയ ബെനലി TRK502, TRK502X എന്നിവ ഉപയോഗിക്കുന്നത്. ലിക്വിഡ്-കൂൾഡ് മോട്ടോറാണ് ഇത്. മാത്രമല്ല, DOHC സജ്ജീകരണവും സിലിണ്ടറിന് 4-വാൽവുമാണ് കമ്പനി നൽകിയിരിക്കുന്നത്. ഈ അഡ്വഞ്ചർ മോട്ടോർസൈക്കിളുകൾ വ്യത്യസ്ത റോഡ് സാഹചര്യങ്ങളിലൂടെ യാത്രക്കാരെ എളുപ്പത്തിൽ സഞ്ചരിക്കാൻ സഹായിക്കും. രണ്ട് TRK502 മോഡലുകളും ആറ് സ്പീഡ് ഗിയർബോക്സുമായാണ് ജോടിയാക്കിയിരിക്കുന്നത്.
വലിപ്പമുള്ള വിൻഡ്‌സ്ക്രീൻ, 20 ലിറ്റർ ഫ്യുവൽ ടാങ്ക്, TRK502-ൽ 800 mm സീറ്റ് ഉയരവും, 190 mm ഗ്രൗണ്ട് ക്ലിയറൻസും TRK502X-ൽ 838 mm സീറ്റ് ഉയരവും 218 mm ഗ്രൗണ്ട് ക്ലിയറൻസ് എന്നിവയാണ് ബെനലി വാഗ്ദാനം ചെയ്യുന്നത്. ബൈക്കുകളുടെ സസ്പെൻഷൻ കൈകാര്യം ചെയ്യുന്നതിനായി മുൻവശത്ത് 134 mm സസ്പെൻ ട്രാവലുള്ള 50 mm കട്ടിയുള്ള അപ്സൈഡ് ഡൗൺ ഫോർക്കുകളും പിന്നിൽ പ്രീ-ലോഡ്, കംപ്രഷൻ, റീബൗണ്ട് അഡ്ജസ്റ്റബിളിറ്റി എന്നിവയുള്ള ഒരു മോണോഷോക്ക് യൂണിറ്റുമാണ് ബെനലി ഒരുക്കിയിരിക്കുന്നത്. പുതിയ TRK502 മോഡലുകൾക്കായി സമർപ്പിത ഹാർഡ് കേസ് ലഗേജ് ഓപ്ഷനുകളും ഉണ്ടെന്നാണ് റിപ്പോര്‍ട്ടുകള്‍.