വാങ്ങാൻ വൻ തിരക്ക്, എന്നിട്ടും ഫ്രോങ്ക്സിന് 1.30 ലക്ഷം വരെ വിലക്കിഴിവുമായി മാരുതി, വില 7.52 ലക്ഷം

മാരുതി സുസുക്കി ഫ്രോങ്ക്സ് എസ്‌യുവിക്ക് ഫെബ്രുവരി മാസത്തിൽ മികച്ച കിഴിവുകൾ പ്രഖ്യാപിച്ചു. ടർബോ-പെട്രോൾ വകഭേദങ്ങൾക്ക് 93,000 രൂപ വരെയും സാധാരണ പെട്രോൾ വകഭേദങ്ങൾക്ക് 45,000 രൂപ വരെയും ആനുകൂല്യങ്ങൾ ലഭ്യമാണ്. സിഎൻജി വകഭേദങ്ങൾക്ക് എക്സ്ചേഞ്ച് ബോണസും സ്ക്രാപ്പേജ് ആനുകൂല്യവും ലഭിക്കും.

ലോഞ്ച് ചെയ്തതുമുതൽ വളരെ ജനപ്രിയമായ ഒരു കാറാണ് മാരുതി സുസുക്കി ഫ്രോങ്ക്സ്. ഓരോമാസവും മികച്ച വിൽപ്പനയാണ് വാഹനം നേടുന്നത്. എന്നിട്ടും പല മാസങ്ങളിലും ഈ കാറിന് മാരുതി ഓഫറുകൾ നൽകുന്നുണ്ട്. ഇപ്പോഴിതാ ഈ ഫെബ്രുവരിയിലും മാരുതി സുസുക്കി ഇന്ത്യ ഫ്രോങ്ക്സ് എസ്‌യുവിക്ക് മികച്ച കിഴിവുകൾ വാഗ്ദാനം ചെയ്യുന്നു. 

ഈ എസ്‌യുവിയുടെ 2024, 2025 വർഷങ്ങളിൽ നിർമ്മിച്ച മോഡലുകൾക്ക് കമ്പനി വ്യത്യസ്ത കിഴിവുകൾ വാഗ്‍ദാനം ചെയ്യുന്നു. ഈ മാസം ഫ്രോങ്ക്‌സിന്റെ  ടർബോ-പെട്രോൾ വകഭേദങ്ങൾ 93,000 രൂപ വരെ ആനുകൂല്യങ്ങളോടെ ലഭ്യമാണ്. ഈ ഓഫറിൽ വെലോസിറ്റി കിറ്റ് ആക്‌സസറി പാക്കേജും ഉൾപ്പെടുന്നു. അതേസമയം സാധാരണ പെട്രോൾ വകഭേദങ്ങൾക്ക് 45,000 രൂപ വരെയുള്ള ആനുകൂല്യങ്ങളാണുള്ളത്. സിഎൻജി വകഭേദങ്ങൾക്ക് എക്‌സ്‌ചേഞ്ച് ബോണസായി 10,000 രൂപയും സ്‌ക്രാപ്പേജ് ആനുകൂല്യമായി 15,000 രൂപയും ഉണ്ട്. മുകളിൽ സൂചിപ്പിച്ച എല്ലാ ഓഫറുകളും MY2025 ഫ്രോങ്ക്‌സ് യൂണിറ്റുകൾക്ക് ബാധകമാണ് .

ഫ്രോങ്ക്സിന്‍റെ 2024 സ്റ്റോക്കിന് പെട്രോളിന് 45,000 രൂപ വരെയും ടർബോ പെട്രോൾ (വെലോസിറ്റി കിറ്റ് ഉൾപ്പെടെ) വേരിയന്റുകൾക്ക് 1.03 ലക്ഷം രൂപ വരെയും കിഴിവുകൾ ലഭിക്കുമെന്ന് ഡീലർ വൃത്തങ്ങൾ സ്ഥിരീകരിച്ചു. അതേസമയം ഫ്രോങ്ക്സ് സിഎൻജി മോഡലുകൾക്ക് 25,000 രൂപ കിഴിവ് (എക്സ്ചേഞ്ച്, സ്ക്രാപ്പേജ് ആനുകൂല്യങ്ങൾ സംയോജിപ്പിച്ച്) ലഭിക്കുന്നു. 7.52 ലക്ഷം രൂപയാണ് മാരുതിസുസുക്കി ഫ്രോങ്ക്സിന്‍റെ ബേസ് വേരിയന്‍റിന്‍റെ എക്സ് ഷോറൂം വില. 

മാരുതി സുസുക്കി ഫ്രോങ്ക്സിന് 1.0 ലിറ്റർ ടർബോ ബൂസ്റ്റർജെറ്റ് എഞ്ചിനാണ് ഉള്ളത്. 5.3 സെക്കൻഡിനുള്ളിൽ ഇത് പൂജ്യത്തിൽ നിന്ന് 60 കിലോമീറ്റർ വേഗത കൈവരിക്കും. ഇതിനുപുറമെ, ഇതിന് നൂതന 1.2 ലിറ്റർ കെ-സീരീസ്, ഡ്യുവൽ ജെറ്റ്, ഡ്യുവൽ വിവിടി എഞ്ചിൻ ഉണ്ട്. ഈ എഞ്ചിൻ സ്മാർട്ട് ഹൈബ്രിഡ് സാങ്കേതികവിദ്യയോടെയാണ് വരുന്നത്. ഈ എഞ്ചിനുകൾ പാഡിൽ ഷിഫ്റ്ററുകളുള്ള 6-സ്പീഡ് ഓട്ടോമാറ്റിക് ട്രാൻസ്‍മിഷനുമായി ബന്ധിപ്പിച്ചിരിക്കുന്നു. ഓട്ടോ ഗിയർ ഷിഫ്റ്റ് ഓപ്ഷനും ഇതിൽ ലഭ്യമാണ്. ലിറ്ററിന് 22.89 കിലോമീറ്ററാണ് മൈലേജ്. മാരുതി ഫ്രോങ്ക്സിന് 3995 എംഎം നീളവും 1765 എംഎം വീതിയും 1550 എംഎം ഉയരവുമുണ്ട്. ഇതിന്റെ വീൽബേസ് 2520 എംഎം ആണ്. 308 ലിറ്റർ ബൂട്ട് സ്പേസാണ് ഇതിനുള്ളത്.

ഹെഡ്-അപ്പ് ഡിസ്‌പ്ലേ, ക്രൂയിസ് കൺട്രോൾ, ലെതർ പൊതിഞ്ഞ സ്റ്റിയറിംഗ് വീൽ, 16 ഇഞ്ച് ഡയമണ്ട് കട്ട് അലോയ് വീലുകൾ, ഡ്യുവൽ-ടോൺ എക്സ്റ്റീരിയർ കളർ, വയർലെസ് ചാർജർ, വയർലെസ് സ്മാർട്ട്‌ഫോൺ കണക്റ്റിവിറ്റിയുള്ള ഇൻഫോടെയ്ൻമെന്റ് സിസ്റ്റം, 6-സ്പീക്കർ സൗണ്ട് സിസ്റ്റം, ഇൻസ്ട്രുമെന്റ് ക്ലസ്റ്ററിൽ നിറമുള്ള MID, ഉയരം ക്രമീകരിക്കാവുന്ന ഡ്രൈവർ സീറ്റ്, പിൻ എസി വെന്റുകൾ, വേഗതയേറിയ യുഎസ്ബി ചാർജിംഗ് പോയിന്റ്, കണക്റ്റഡ് കാർ സവിശേഷതകൾ, റിയർ വ്യൂ ക്യാമറ, 9 ഇഞ്ച് ടച്ച്‌സ്‌ക്രീൻ തുടങ്ങിയ സവിശേഷതകൾ ഇതിൽ ഉണ്ടാകും. ഇത് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയെ പിന്തുണയ്ക്കും.

സുരക്ഷയ്ക്കായി, ഡ്യുവൽ എയർബാഗുകളുള്ള സൈഡ്, കർട്ടൻ എയർബാഗുകൾ, റിയർ വ്യൂ ക്യാമറ, ഹിൽ ഹോൾഡ് അസിസ്റ്റ്, ഇലക്ട്രോണിക് സ്റ്റെബിലിറ്റി പ്രോഗ്രാം, റിവേഴ്‌സ് പാർക്കിംഗ് സെൻസർ, 3-പോയിന്റ് ഇഎൽആർ സീറ്റ് ബെൽറ്റ്, റിയർ ഡീഫോഗർ, ആന്‍റി-തെഫ്റ്റ് സെക്യൂരിറ്റി സിസ്റ്റം, ഐസോഫിക്സ് ചൈൽഡ് സീറ്റ് തുടങ്ങിയ സവിശേഷതകൾ ഇതിലുണ്ട്. ഒപ്പം ഡ്യുവൽ എയർബാഗുകൾ, ഇബിഡിയുള്ള എബിഎസ്, ഇഎസ്‍പി, ഹിൽ-ഹോൾഡ് അസിസ്റ്റ്, റിയർ പാർക്കിംഗ് സെൻസർ, ലോഡ്-ലിമിറ്ററുള്ള സീറ്റ് ബെൽറ്റ് പ്രീ-ടെൻഷനർ, സീറ്റ് ബെൽറ്റ് റിമൈൻഡർ സിസ്റ്റം, ഐസോഫിക്സ് ചൈൽഡ് സീറ്റ് ആങ്കറേജ് പോയിന്‍റ്, സ്‍പീഡ് അലേർട്ട് തുടങ്ങിയ സുരക്ഷാ സ്റ്റാൻഡേർഡ് സവിശേഷതകളും നൽകിയിട്ടുണ്ട്. ഇതിനുപുറമെ, തിരഞ്ഞെടുത്ത വേരിയന്റുകളിൽ 360 ഡിഗ്രി ക്യാമറ, സൈഡ്, കർട്ടൻ എയർബാഗുകൾ, റിവേഴ്‌സ് പാർക്കിംഗ് ക്യാമറ, ഓട്ടോ-ഡിമ്മിംഗ് ഐആർവിഎം തുടങ്ങിയ ഫീച്ചറുകൾ ലഭ്യമാണ്.

ശ്രദ്ധിക്കുക, വ്യത്യസ്‍ത പ്ലാറ്റ്‌ഫോമുകളുടെ സഹായത്തോടെ കാറുകളിൽ ലഭ്യമായ കിഴിവുകളാണ് മുകളിൽ വിശദീകരിച്ചിരിക്കുന്നത്. മേൽപ്പറഞ്ഞിരിക്കുന്ന കിഴിവുകൾ രാജ്യത്തെ വിവിധ സംസ്ഥാനങ്ങൾക്കും വിവിധ ഭൂപ്രദേശങ്ങൾക്കും ഓരോ നഗരത്തിനും ഡീലർഷിപ്പുകൾക്കും സ്റ്റോക്കിനും നിറത്തിനും വേരിയന്‍റിനുമൊക്കെ അനുസരിച്ച് വ്യത്യാസപ്പെട്ടിരിക്കുന്നു. അതായത് ഈ കിഴിവ് നിങ്ങളുടെ നഗരത്തിലോ ഡീലറിലോ കൂടുതലോ കുറവോ ആയിരിക്കാം. അത്തരമൊരു സാഹചര്യത്തിൽ, ഒരു കാർ വാങ്ങുന്നതിന് മുമ്പ്, കൃത്യമായ കിഴിവ് കണക്കുകൾക്കും മറ്റ് വിവരങ്ങൾക്കുമായി നിങ്ങളുടെ തൊട്ടടുത്തുള്ള പ്രാദേശിക ഡീലറെ സമീപിക്കുക.