ഒറ്റ ചാർജ്ജിൽ കേരളം ചുറ്റാം! മാരുതിയുടെ ആദ്യ ഇലക്ട്രിക്ക് കാർ എത്തി, ഓട്ടോ ഷോയിൽ താരമായി മാരുതി ഇ വിറ്റാര

മാരുതി സുസുക്കി തങ്ങളുടെ ആദ്യത്തെ ഇലക്ട്രിക് കാർ 'മാരുതി ഇ വിറ്റാര' അവതരിപ്പിച്ചു. വാഹനലോകം ഏറെ നാളായി കാത്തിരിക്കുകയായിരുന്നു ഈ ഇലക്ട്രിക് എസ്‌യുവി. കഴിഞ്ഞ വർഷം ഓട്ടോ എക്‌സ്‌പോയിൽ മാരുതി ഇവിഎക്‌സ് എന്ന പേരിൽ കമ്പനി ഇന്ത്യയിൽ അവതരിപ്പിച്ച അതേ ഇലക്ട്രിക് എസ്‌യുവിയാണിത്.

രാജ്യത്തെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി തങ്ങളുടെ ആദ്യത്തെ ഇലക്ട്രിക് കാർ 'മാരുതി ഇ വിറ്റാര' അവതരിപ്പിച്ചു. വാഹനലോകം ഏറെ നാളായി കാത്തിരിക്കുകയായിരുന്നു ഈ ഇലക്ട്രിക് എസ്‌യുവി. കഴിഞ്ഞ വർഷം ഓട്ടോ എക്‌സ്‌പോയിൽ മാരുതി ഇവിഎക്‌സ് എന്ന പേരിൽ കമ്പനി ഇന്ത്യയിൽ അവതരിപ്പിച്ച അതേ ഇലക്ട്രിക് എസ്‌യുവിയാണിത്.

പുതിയ മാരുതി സുസുക്കി ഇ-വിറ്റാര കൺസെപ്റ്റ് മോഡലിന് സമാനമാണ്. ഇതിൻ്റെ രൂപകല്പനയും വലിപ്പവും മാരുതി ഇവിഎക്‌സിന് സമാനമാണ്. ചില ഷാർപ്പ് ആംഗിളുകൾ കുറച്ചിട്ടുണ്ടെങ്കിലും, മിക്കതും ഇവിഎക്സ് കൺസെപ്റ്റ് പോലെ തന്നെ തുടരുന്നു. മുന്നിലും പിന്നിലും ട്രൈ-സ്ലാഷ് എൽഇഡി ഡേടൈം റണ്ണിംഗ് ലൈറ്റുകളും മുൻവശത്തെ അരികുകളിൽ ചാർജിംഗ് പോർട്ടുകളും പിൻ വീൽ ആർച്ചുകളിൽ വളവുകളും ഉണ്ട്. ഇതിൽ, പിൻവശത്തെ ഡോർ ഹാൻഡിൽ പഴയ സ്വിഫ്റ്റ് പോലെയുള്ള സി-പില്ലറിലേക്ക് മാറ്റിയിട്ടുണ്ട്. 

18 ഇഞ്ച് അലോയ് വീലുകളുള്ള ഈ ഇലക്ട്രിക് എസ്‌യുവിക്ക് 4,275 എംഎം നീളവും 1,800 എംഎം വീതിയും 1,635 എംഎം ഉയരവുമുണ്ട്. ക്രെറ്റയേക്കാൾ നീളമുള്ള 2,700 എംഎം വീൽബേസ് ഇതിനുണ്ട്. ഈ വലിയ വീൽബേസ് കാറിനുള്ളിൽ മികച്ച ബാറ്ററി പാക്ക് ഇൻസ്റ്റാൾ ചെയ്യാൻ സഹായിക്കും.180 എംഎം ആണ് ഇതിൻ്റെ ഗ്രൗണ്ട് ക്ലിയറൻസ്. ഇത് മിക്ക ഇന്ത്യൻ റോഡ് അവസ്ഥകൾക്കും പര്യാപ്‍തമാണ്. വേരിയൻ്റിനെ ആശ്രയിച്ച് അതിൻ്റെ മൊത്തം ഭാരം 1,702 കിലോഗ്രാം മുതൽ 1,899 കിലോഗ്രാം വരെയാണ്.

രണ്ട് വ്യത്യസ്ത ബാറ്ററി പായ്ക്കുകൾ (49kWh, 61kWh) ഉപയോഗിച്ചാണ് കമ്പനി ഇ വിറ്റാര അവതരിപ്പിച്ചത്. ഇതിൽ, വലിയ ബാറ്ററി പാക്കിന് ഡ്യുവൽ-മോട്ടോർ ഓൾ വീൽ ഡ്രൈവ് (AWD) സജ്ജീകരണം നൽകിയിട്ടുണ്ട്. ഇതിന് കമ്പനി ഓൾ ഗ്രിപ്പ്-ഇ എന്ന് പേരിട്ടു. ചൈനീസ് കാർ കമ്പനിയായ ബിൽഡ് യുവർ ഡ്രീമിൽ (BYD) നിന്നുള്ള ബ്ലേഡ് സെൽ ലിഥിയം അയേൺ-ഫോസ്ഫേറ്റ് (LFP) ബാറ്ററി പായ്ക്ക് ഇതിലുണ്ട്. മറ്റ് കാർ നിർമ്മാതാക്കൾ ബാറ്ററി സെല്ലുകൾ മാത്രം കയറ്റുമതി ചെയ്യുകയും അവ പ്രാദേശികമായി കൂട്ടിച്ചേർക്കുകയും വാഹനങ്ങളിൽ ഉപയോഗിക്കുകയും ചെയ്യുമ്പോൾ, സുസുക്കി മുഴുവൻ ബാറ്ററി-പാക്കും ബിവൈഡിയിൽ നിന്ന് ഇറക്കുമതി ചെയ്യും.  ഫ്രണ്ട് ആക്‌സിലിൽ ഒരൊറ്റ മോട്ടോറുള്ള 49kWh ബാറ്ററി 144hp പവർ ഉത്പാദിപ്പിക്കുന്നു. സിംഗിൾ-മോട്ടോർ വലിയ 61kWh ബാറ്ററി പായ്ക്ക് 174hp വരെ പവർ ഔട്ട്പുട്ട് നൽകുന്നു. ഈ രണ്ട് പതിപ്പുകളും 189Nm ടോർക്ക് സൃഷ്‍ടിക്കുന്നു. എങ്കിലും, e-AllGrip (AWD) വേരിയൻ്റ് പിൻ ആക്‌സിലിൽ ഒരു അധിക 65hp മോട്ടോർ ചേർക്കുന്നു. ഇതുമൂലം മൊത്തം പവർ ഔട്ട്പുട്ട് 184 എച്ച്പി ആയും ടോർക്ക് 300 എൻഎം ആയും വർദ്ധിക്കുന്നു.  ഈ കാർ ഒറ്റ ചാർജിൽ 500 കിലോമീറ്ററിലധികം ഡ്രൈവിംഗ് റേഞ്ച് നൽകുമെന്ന് കമ്പനി അവകാശപ്പെടുന്നു. ഇതുകൂടാതെ 7 എയർബാഗുകളും ഈ കാറിൽ സ്റ്റാൻഡേർഡായി നൽകിയിട്ടുണ്ട്. നിലവിൽ ഈ എസ്‌യുവി മാത്രമാണ് കമ്പനി പ്രദർശിപ്പിച്ചിരിക്കുന്നത്.  

ഈ എസ്‌യുവിയുടെ ക്യാബിനിൽ ഒരു പുതിയ ഓപ്പറേറ്റിംഗ് സിസ്റ്റവും ഇരട്ട സ്‌ക്രീനോടുകൂടിയ യൂസർ ഇൻ്റർഫേസും നൽകിയിട്ടുണ്ട്. ഇതിന് ഒരു ടച്ച്‌സ്‌ക്രീനിൻ്റെ സൗകര്യം മാത്രമല്ല നിലവിലുള്ള സ്‍മാർട്ട് പ്ലേ പ്രോ പ്ലസ് സിസ്റ്റത്തേക്കാൾ കൂടുതൽ വിവരദായകമായ ഡിജിറ്റൽ ഡയലും ഉണ്ട്. പിൻഭാഗത്ത് സ്പ്ലിറ്റ്-ഫോൾഡിംഗ് സീറ്റുകളും ക്രമീകരിക്കാവുന്ന ഹെഡ്‌റെസ്റ്റുകളും ത്രീ-പോയിൻ്റ് സീറ്റ് ബെൽറ്റുകളും എല്ലാ യാത്രക്കാർക്കും ഐസോഫിക്സ് ചൈൽഡ് സീറ്റ് മൗണ്ടുകളും ഉണ്ട്.

മാരുതി ഇ വിറ്റാര നൂതന ഫീച്ചറുകളാൽ സജ്ജീകരിച്ചിരിക്കുന്നു. ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക്, എഡബ്ല്യുഡി പതിപ്പുകൾക്കുള്ള 'ട്രെയിൽ' ഉൾപ്പെടെയുള്ള ഡ്രൈവ് മോഡുകൾ, ഹിൽ ഡിസൻ്റ് കൺട്രോൾ, സിംഗിൾ സോൺ ഓട്ടോ ക്ലൈമറ്റ് കൺട്രോൾ, വയർലെസ് ഫോൺ ചാർജർ, സൈഡ് ആൻഡ് കർട്ടൻ എയർബാഗുകൾ, ഹീറ്റഡ് മിററുകൾ, അഡ്വാൻസ്‍ഡ് ഡ്രൈവിംഗ് അസിസ്റ്റൻസ് സിസ്റ്റം (ADAS) തുടങ്ങിയവ ഇതിൽ ഉൾപ്പെടുന്നു. സുസുക്കിയുടെ ആഗോള മോഡലാണ് പുതിയ ഇ വിറ്റാര. സുസുക്കിയുടെ ഗുജറാത്ത് പ്ലാൻ്റിലായിരിക്കും ഇത് നിർമ്മിക്കുക. ഉൽപ്പാദനത്തിൻ്റെ 50 ശതമാനവും ജപ്പാനിലേക്കും യൂറോപ്യൻ വിപണിയിലേക്കും കയറ്റുമതി ചെയ്യാൻ പദ്ധതിയുണ്ട്.