ഹർദീപ് സിംഗ് ബ്രാർ ബിഎംഡബ്ല്യു ഗ്രൂപ്പ് ഇന്ത്യയുടെ പുതിയ തലവൻ

ബിഎംഡബ്ല്യു ഗ്രൂപ്പ് ഇന്ത്യയുടെ പ്രസിഡന്റായും ചീഫ് എക്സിക്യൂട്ടീവ് ഓഫീസറായും ഹർദീപ് സിംഗ് ബ്രാറിനെ നിയമിച്ചു. 2025 സെപ്റ്റംബർ 1 മുതൽ നിയമനം പ്രാബല്യത്തിൽ വരും. വിക്രം പവായിൽ നിന്നാണ് ബ്രാർ ചുമതലയേൽക്കുന്നത്.

ബിഎംഡബ്ല്യു ഗ്രൂപ്പ് ഇന്ത്യയുടെ തലപ്പത്ത് മാറ്റം പ്രഖ്യാപിച്ചു. ഹർദീപ് സിംഗ് ബ്രാർ കമ്പനിയുടെ പ്രസിഡന്റും ചീഫ് എക്സിക്യൂട്ടീവ് ഓഫീസറുമായി നിയമിതനായി. ബിഎംഡബ്ല്യു ഗ്രൂപ്പ് ഓസ്‌ട്രേലിയയുടെയും ന്യൂസിലൻഡിന്റെയും ചീഫ് എക്‌സിക്യൂട്ടീവ് ഓഫീസറായി വിക്രം പവ ചുമതലയേൽക്കുന്നതിന് പകരമാണ് നിയമനം. ഹ‍‍ർദീപ് സിംഗ് ബ്രാർ 2025 സെപ്റ്റംബ‍ർ ഒന്നിന് ചുമതലയേൽക്കും എന്നും കമ്പനി വാ‍ത്താക്കുറിപ്പിൽ അറിയിച്ചു.

ബിഎംഡബ്ല്യു ഗ്രൂപ്പിന് ഏറ്റവും വേഗത്തിൽ വളരുന്ന വിപണികളിൽ ഒന്നാണ് ഇന്ത്യയെന്ന് ബിഎംഡബ്ല്യു ഗ്രൂപ്പിന്റെ ഏഷ്യ-പസഫിക്, കിഴക്കൻ യൂറോപ്പ്, മിഡിൽ ഈസ്റ്റ്, ആഫ്രിക്ക മേഖലയുടെ സീനിയർ വൈസ് പ്രസിഡന്റ് ജീൻ-ഫിലിപ്പ് പാരൈൻ പറഞ്ഞു. ഈ ചലനാത്മക വിപണിയെ നയിക്കുന്നതിനും ബിഎംഡബ്ല്യു ഗ്രൂപ്പിന്റെ പ്രവർത്തനങ്ങൾ ശക്തിപ്പെടുത്തുന്നതിനും ഇന്ത്യൻ ഓട്ടോമോട്ടീവ് വ്യവസായത്തെക്കുറിച്ച് വിപുലമായ വൈദഗ്ധ്യം ഹർദീപ് സിംഗ് ബ്രാറിന് ഉണ്ടെന്നും അദ്ദേഹം പറഞ്ഞു. ബിഎംഡബ്ല്യു ഗ്രൂപ്പ് ഇന്ത്യയുടെ തന്ത്രപരമായ വളർച്ചയ്ക്കും അതിന്റെ സമീപകാല വികസനത്തിൽ നിർണായക പങ്ക് വഹിച്ചതിന് വിക്രം പവയ്ക്ക് നന്ദി പറയുന്നുവെന്നും ജീൻ-ഫിലിപ്പ് പാരൈൻ പറഞ്ഞു.

ഇന്ത്യൻ ഓട്ടോമോട്ടീവ് വ്യവസായത്തിൽ മുപ്പത് വർഷത്തിലേറെ സമ്പന്നമായ അനുഭവപരിചയമുള്ള ഹർദീപ് സിംഗ് ബ്രാർ നിരവധി സീനിയർ മാനേജ്‌മെന്റ് സ്ഥാനങ്ങൾ വഹിച്ചിട്ടുണ്ട്. കിയ ഇന്ത്യയുടെ സെയിൽസ് ആൻഡ് മാർക്കറ്റിംഗിന്റെ സീനിയർ വൈസ് പ്രസിഡന്റായിരുന്നു നിലവിൽ അദ്ദേഹം. ഇതിനുമുമ്പ് മാരുതി-സുസുക്കി, ഫോക്‌സ്‌വാഗൺ പാസഞ്ചർ കാർസ്, ജനറൽ മോട്ടോഴ്‌സ്, നിസാൻ മോട്ടോർ, ഗ്രേറ്റ് വാൾ മോട്ടോർ കമ്പനി തുടങ്ങിയവ ഉൾപ്പെടെ നിരവധി ബ്രാൻഡുകളിലുടനീളം വിൽപ്പന, മാർക്കറ്റിംഗ്, ഉപഭോക്തൃ അനുഭവം, നെറ്റ്‌വർക്ക് വികസനം, കോർപ്പറേറ്റ് സ്‍ട്രാറ്റജി തുടങ്ങിയ പ്രധാന പ്രവർത്തനങ്ങളിൽ ബ്രാറിന്റെ വൈവിധ്യമാർന്ന പരിചയസമ്പത്ത് ഉൾപ്പെടുന്നു . പഞ്ചാബിലെ ഥാപ്പർ ഇൻസ്റ്റിറ്റ്യൂട്ട് ഓഫ് എഞ്ചിനീയറിംഗ് ആൻഡ് ടെക്‌നോളജിയിൽ നിന്ന് മെക്കാനിക്കൽ എഞ്ചിനീയറിംഗിൽ ബിരുദം നേടിയ ഹർദീപ് സിംഗ് ബ്രാ‍ർ ഹാർവാർഡ് ബിസിനസ് സ്‌കൂളിന്റെ സീനിയർ എക്‌സിക്യൂട്ടീവ് ലീഡർഷിപ്പ് പ്രോഗ്രാമിലെ പൂർവ്വ വിദ്യാർത്ഥി കൂടിയാണ്.

അതേസമയം 2017 മുതൽ ബിഎംഡബ്ല്യു ഗ്രൂപ്പിനെ വിക്രം പവ വിജയകരമായി നയിച്ചു എന്നും കമ്പനി പറയുന്നു. സമീപ വർഷങ്ങളിൽ, പുതിയ അവസരങ്ങളിലൂടെയും ലക്ഷ്യ ഗ്രൂപ്പുകളിലൂടെയും വിപണി വിഹിതം വികസിപ്പിക്കുന്നതിലും ഇലക്ട്രിക് മൊബിലിറ്റി, ഡിജിറ്റലൈസേഷൻ, റീട്ടെയിൽ അനുഭവം, ഉപഭോക്തൃ കേന്ദ്രീകരണം എന്നിവ അടുത്ത ഘട്ടത്തിലേക്ക് കൊണ്ടുപോകുന്നതിലും ബിഎംഡബ്ല്യു ഗ്രൂപ്പ് ഇന്ത്യയുടെ കാഴ്ചപ്പാടിനെ പവ ശക്തമാക്കിയെന്നും കമ്പനി വ്യക്തമാക്കി.

ബിഎംഡബ്ല്യു, മിനി, മോട്ടോറാഡ് എന്നിവയുമായി ചേർന്ന് ഇന്ത്യൻ ഓട്ടോമൊബൈൽ വിപണിയിലെ പ്രീമിയം മേഖലയിലാണ് ബിഎംഡബ്ല്യു ഗ്രൂപ്പ് ശ്രദ്ധ കേന്ദ്രീകരിച്ചിരിക്കുന്നത്. ബിഎംഡബ്ല്യു ഗ്രൂപ്പിന്റെ അനുബന്ധ സ്ഥാപനമാണ് 2007 ൽ പ്രവർത്തനം ആരംഭി ബിഎംഡബ്ല്യു ഇന്ത്യ. ഗുരുഗ്രാമിലാണ് ആസ്ഥാനം. ചെന്നൈയിലെ നിർമ്മാണ പ്ലാന്റ്, പൂനെയിലെ പ്രാദേശിക വിതരണ കേന്ദ്രം, ഗുരുഗ്രാമിലെ പരിശീലന കേന്ദ്രം, രാജ്യത്തെ പ്രധാന മെട്രോപൊളിറ്റൻ കേന്ദ്രങ്ങളിലുടനീളം ഡീലർ ശൃംഖലയുടെ വികസനം എന്നിവ കമ്പനിയുടെ വിശാലമായ ശ്രേണിയിൽ ഉൾപ്പെടുന്നു. ബിഎംഡബ്ല്യു ഗ്രൂപ്പ് പ്ലാന്റ് ചെന്നൈയിൽ പ്രാദേശികമായി 10 കാർ മോഡലുകൾ ഉത്പാദിപ്പിക്കുന്നു.

2012 ജനുവരിയിൽ വിപണിയിലെത്തിയതിനുശേഷം, മിനി ഇന്ത്യയിലെ ഒരു പ്രീമിയം ചെറുകാർ ബ്രാൻഡായി മാറി. 2017 ഏപ്രിലിൽ ബിഎംഡബ്ല്യു ഗ്രൂപ്പിന്റെ ഇന്ത്യൻ അനുബന്ധ സ്ഥാപനത്തിന്റെ ഭാഗമായി ബിഎംഡബ്ല്യു മോട്ടോറാഡ് ഔദ്യോഗികമായി പ്രവർത്തനം ആരംഭിച്ചു. ബിഎംഡബ്ല്യു, മിനി, ബിഎംഡബ്ല്യു മോട്ടോറാഡ് എന്നിവയ്‌ക്കൊപ്പം ബിഎംഡബ്ല്യു ഗ്രൂപ്പ് ഇന്ത്യയ്ക്ക് നിലവിൽ രാജ്യത്തുടനീളം 80ൽ അധികം ടച്ച്‌പോയിന്റുകളുണ്ട്.