ബ്രാൻഡിന്റെ പുതിയ കോർപ്പറേറ്റ് ഐഡന്റിറ്റി ഉയർത്തിക്കാട്ടുന്ന 100 ല്‍ അധികം ഷോറൂമുകൾ നവീകരിക്കുന്നതിന് ഇതിനകം 100 കോടി രൂപയുടെ നിക്ഷേപം നടത്തിക്കഴിഞ്ഞു.
ജാപ്പനീസ് വാഹന നിർമ്മാതാക്കളായ ഹോണ്ട ഇന്ത്യ ഉടൻ തന്നെ ഇന്ത്യയിലെ വിൽപ്പന ശൃംഖല നവീകരിക്കും എന്ന് റിപ്പോര്‍ട്ട്. ഹോണ്ട കാർസ് ഇന്ത്യ (എച്ച്‌സിഐഎൽ) ഡീലർഷിപ്പുകൾ കൂടുതൽ പ്രീമിയം ആക്കുന്നതിനും ഉപഭോക്തൃ അനുഭവം വർദ്ധിപ്പിക്കുന്നതിനുമായി ഡീലർ പങ്കാളികളുമായി ചേർന്ന് ഏകദേശം 260 കോടി രൂപ നിക്ഷേപിക്കാൻ പദ്ധതിയിടുന്നതായാണ് വിവരം. ബ്രാൻഡിന്റെ പുതിയ കോർപ്പറേറ്റ് ഐഡന്റിറ്റി ഉയർത്തിക്കാട്ടുന്ന 100 ല്‍ അധികം ഷോറൂമുകൾ നവീകരിക്കുന്നതിന് ഇതിനകം 100 കോടി രൂപയുടെ നിക്ഷേപം നടത്തിക്കഴിഞ്ഞു.
ഈ വർഷവും അടുത്ത വർഷവും തങ്ങളുടെ മുഴുവൻ വിൽപ്പന ശൃംഖലയും നവീകരിക്കാനാണ് കമ്പനി ലക്ഷ്യമിടുന്നതെന്ന് ഹോണ്ട കാർസ് ഇന്ത്യയുടെ മാർക്കറ്റിംഗ് ആൻഡ് സെയിൽസ് വൈസ് പ്രസിഡന്റ് കുനാൽ ബെൽ പറഞ്ഞതായി ഇന്ത്യാ കാര്‍ ന്യൂസ് റിപ്പോര്‍ട്ട് ചെയ്യുന്നു. അടുത്ത വർഷം നിരത്തിലിറങ്ങാൻ തുടങ്ങുന്ന പുതിയ ഹോണ്ട എസ്‌യുവികൾക്കായാണ് നവീകരണം. നിലവിൽ കമ്പനിക്ക് 242 നഗരങ്ങളിലായി 330 ഔട്ട്‌ലെറ്റുകൾ ഉണ്ട്.
വരാനിരിക്കുന്ന പുതിയ ഹോണ്ട എസ്‌യുവികളെക്കുറിച്ച് സംസാരിക്കുമ്പോൾ, പുതിയ മാരുതി ബ്രെസ്സ, ഹ്യുണ്ടായ് ക്രെറ്റ, ഹ്യുണ്ടായ് അലകാസർ എന്നിവയെ വെല്ലുവിളിക്കാൻ കാർ നിർമ്മാതാവ് മൂന്ന് പുതിയ മോഡലുകൾ കൊണ്ടുവരുമെന്നാണ് റിപ്പോർട്ടുകള്‍. ഹോണ്ടയുടെ സബ്കോംപാക്റ്റ്, ഇടത്തരം എസ്‌യുവികൾ അമേസിന്റെ പ്ലാറ്റ്‌ഫോമിനെ അടിസ്ഥാനമാക്കിയുള്ളതായിരിക്കും. അവ ഹൈബ്രിഡ് സാങ്കേതികവിദ്യയിൽ നൽകാം. ഹോണ്ട ആര്‍എസ് എസ്യുവി കൺസെപ്റ്റ് അധിഷ്ഠിത മോഡൽ 2023-ൽ പുതിയ തലമുറ ഹോണ്ട ഡബ്ല്യു-ആര്‍വി ആയി അവതരിപ്പിക്കും എന്ന് അഭ്യൂഹം ഉണ്ട്. ഈ വർഷം അവസാനത്തോടെ മോഡൽ ആഗോളതലത്തിൽ അരങ്ങേറ്റം കുറിച്ചേക്കും.
1.5 ലിറ്റർ i-DTEC ഡീസൽ, 1.2 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനുകളിൽ പുതിയ ഹോണ്ട സബ്കോംപാക്റ്റ് എസ്യുവി ലഭ്യമാക്കാം. ചിലപ്പോള്‍ ഇതില്‍ ഒരു എഞ്ചിന് സൗമ്യമോ ശക്തമായതോ ആയ ഹൈബ്രിഡ് സംവിധാനം കൊണ്ട് പ്രയോജനം ലഭിച്ചേക്കാം. രണ്ട് ഇലക്ട്രിക് മോട്ടോറുകളുള്ള അറ്റ്കിൻസൺ സൈക്കിൾ 1.5 എൽ, 4-സിലിണ്ടർ എഞ്ചിൻ ഉപയോഗിക്കുന്ന സിറ്റി ഹൈബ്രിഡുമായി ഹോണ്ടയുടെ മിഡ്-സൈസ് എസ്യുവി അതിന്റെ പവർട്രെയിൻ പങ്കിടാൻ സാധ്യതയുണ്ട്. ഇതിന്റെ മൊത്തത്തിലുള്ള നീളം ഏകദേശം 4.3 മീറ്ററായിരിക്കും.
ജാപ്പനീസ് വാഹന നിർമ്മാതാക്കളും ഇന്ത്യയ്ക്കായി മൂന്ന് നിരകളുള്ള എസ്യുവി പരിഗണിക്കുന്നതായും റിപ്പോര്‍ട്ടുകള്‍ ഉണ്ട്. ഹോണ്ടയുടെ വരാനിരിക്കുന്ന പുതിയ മിഡ്-സൈസ് എസ്‌യുവിയുടെ ദൈർഘ്യമേറിയ പതിപ്പായിരിക്കും ഇത്. കൂടുതൽ പ്രേക്ഷകരെ ആകർഷിക്കാൻ 6, 7 സീറ്റുകൾ കോൺഫിഗറേഷൻ ഓപ്ഷനുകളോടെ ഇത് വന്നേക്കാം. പുതിയ ഹോണ്ട 7 സീറ്റർ എസ്യുവി പുതിയ തലമുറ ഹോണ്ട ബിആർ-വിയുമായി അതിന്റെ പ്ലാറ്റ്ഫോം പങ്കിടും എന്നാണ് റിപ്പോർട്ടുകള്‍.