മഹീന്ദ്രയുടെ മെഗാ പ്ലാനിംഗ്, രണ്ട് വർഷത്തിനുള്ളിൽ എട്ട് പുതിയ എസ്‌യുവികൾ

അടുത്ത രണ്ട് വർഷത്തിനുള്ളിൽ മഹീന്ദ്ര ആൻഡ് മഹീന്ദ്ര നിരവധി പുതിയ എസ്‌യുവികൾ പുറത്തിറക്കാൻ ഒരുങ്ങുന്നു. ഥാർ ഇവി, XUV.e8 തുടങ്ങിയ ഇലക്ട്രിക് മോഡലുകളും, BE റാൾ-ഇ പോലുള്ള സാഹസിക പതിപ്പുകളും, XUV700 ഫെയ്‌സ്‌ലിഫ്റ്റും ഇതിൽ ഉൾപ്പെടുന്നു. 

എക്കാലത്തും മഹീന്ദ്ര ആൻഡ് മഹീന്ദ്രയുടെ എസ്‌യുവി മോഡലുകൾ ജനപ്രിയങ്ങളാണ്. അടുത്ത രണ്ട് വർഷത്തിനുള്ളിൽ വ്യത്യസ്‍ത സെഗ്‌മെന്റുകളിലും എഞ്ചിൻ ഓപ്ഷനുകളിലുമായി നിരവധി പുതിയ എസ്‌യുവികൾ പുറത്തിറക്കാൻ മഹീന്ദ്ര തയ്യാറെടുക്കുകയാണ്. ഇതുവരെ നിരവധി വാഹനങ്ങളുടെ പരീക്ഷണത്തിൽ നിന്ന് നിരവധി പുതിയ മോഡലുകൾ അണിയറയിൽ ഒരുങ്ങുന്നുണ്ട് എന്നാണ് റിപ്പോർട്ടുകൾ.

ബിഇ 6 ന്റെ സാഹസികതയ്ക്ക് പ്രാധാന്യം നൽകുന്ന ഒരു പതിപ്പായ ബിഇ റാൾ-ഇ മോഡൽ ആണ് ഈ ശ്രേണിയിലെ ഏറ്റവും പുതിയ മോഡലുകളിൽ ഒരെണ്ണം. ശക്തമായ ക്ലാഡിംഗ്, കൂടുതൽ കരുത്തുറ്റ സസ്‌പെൻഷൻ ട്യൂൺ, കൂടുതൽ പരുക്കൻ നിലപാട് എന്നിവ റോഡ് അധിഷ്ഠിത പതിപ്പിൽ നിന്ന് ഇതിനെ വ്യത്യസ്തമാക്കുന്നു. സാധാരണ BE 6 ന്റെ അതേ ഇലക്ട്രിക് ഡ്രൈവ്‌ട്രെയിൻ ഓപ്ഷനുകൾ റാൾ-E യിൽ ഉണ്ടാകുമെന്ന് പ്രതീക്ഷിക്കുന്നു. ഇത് അടുത്ത വർഷം വിൽപ്പനയ്‌ക്കെത്താം.

മഹീന്ദ്ര ഇതിനകം തന്നെ ഥാർ ഇവി എന്ന കൺസെപ്റ്റ് പ്രദർശിപ്പിച്ചിട്ടുണ്ട്. നിലവിലുള്ള ഥാറിനു പകരമായി അഞ്ച് ഡോറുകളുള്ള സീറോ-എമിഷൻ ഓഫ്-റോഡറിനെ ഇത് സൂചിപ്പിക്കുന്നു എന്നാണ് റിപ്പോർട്ടുകൾ. കൂടാതെ, ഒരു ഇലക്ട്രിക് സ്കോർപിയോയുടെ സാധ്യതയും കമ്പനി പരിഗണക്കുന്നുണ്ട്. ഈ മോഡലിന്ന് അനുമതി ലഭിച്ചാൽ, അത് വിഷൻ എസ് ആശയത്തിൽ നിന്ന് പ്രചോദനം ഉൾക്കൊണ്ട് ബ്രാൻഡിന്റെ വരാനിരിക്കുന്ന എൻയു ഐക്യു ആർക്കിടെക്ചറിനെ അടിസ്ഥാനമാക്കിയുള്ളതായിരിക്കും.

വിഷന്‍ എക്സ് അധിഷ്ഠിതമായ ഒരു കോംപാക്റ്റ് ക്രോസ്ഓവറും ഭാവിയില്‍ ഒരു ചെറിയ എസ്‌യുവിയായി ഉയര്‍ന്നുവരുമെന്ന് പ്രതീക്ഷിക്കുന്നു. XUV 3XO അധിഷ്ഠിതമായ കോംപാക്റ്റ് ഇ-എസ്‌യുവിയുടെ പരീക്ഷണയോട്ടവും നിരവധി തവണ കണ്ടെത്തിയിട്ടുണ്ട്. കൂടാതെ, മഹീന്ദ്രയുടെ XUV700 ഫെയ്‌സ്‌ലിഫ്റ്റ് 2026-ല്‍ പുറത്തിറങ്ങുന്ന ആദ്യ എസ്‌യുവിയായിരിക്കും. പുതിയ ബമ്പറുകള്‍, ട്വീക്ക് ചെയ്ത ഹെഡ്‌ലാമ്പുകള്‍, പുതിയ അലോയ് വീലുകള്‍, പുതിയ ക്യാബിന്‍ എന്നിവ ഈ എസ്‌യുവിയുടെ സവിശേഷതകളായിരിക്കും.

മഹീന്ദ്രയുടെ ഏറ്റവും പ്രധാനപ്പെട്ട ലോഞ്ചുകളിലൊന്നാണ് XUV.e8. മൂന്ന് നിര ഇലക്ട്രിക് കാറായ ഇതിനെ XEV 9S എന്ന് വിളിക്കാം. രണ്ട് ബാറ്ററി ഓപ്ഷനുകളോടെയാണ് ഈ വാഹനം വാഗ്ദാനം ചെയ്യുന്നതെന്ന് പ്രതീക്ഷിക്കുന്നു, ഒറ്റ ചാർജിൽ 500 കിലോമീറ്ററിലധികം ഡ്രൈവിംഗ് റേഞ്ച് വാഗ്ദാനം ചെയ്യുമെന്ന് പ്രതീക്ഷിക്കുന്നു.