മഹീന്ദ്ര BE.05, കൂടുതൽ വിവരങ്ങൾ പുറത്ത്

മഹീന്ദ്ര BE.05 ബ്രാൻഡിൻ്റെ പുതിയ ഇൻഗ്ലോ പ്ലാറ്റ്‌ഫോമിനെ അടിസ്ഥാനമാക്കി വരാനിരിക്കുന്ന ബോൺ ഇലക്‌ട്രിക് എസ്‌യുവികളിൽ ഒന്നാണ്. ഈ വരാനിരിക്കുന്ന ഇലക്ട്രിക് എസ്‌യുവിയെക്കുറിച്ചുള്ള ചില വിവരങ്ങൾക്കൂടി പുറത്തുവന്നിരിക്കുന്നു.

മഹീന്ദ്ര BE.05 ബ്രാൻഡിൻ്റെ പുതിയ ഇൻഗ്ലോ പ്ലാറ്റ്‌ഫോമിനെ അടിസ്ഥാനമാക്കി വരാനിരിക്കുന്ന ബോൺ ഇലക്‌ട്രിക് എസ്‌യുവികളിൽ ഒന്നാണ്. മോഡൽ നിലവിൽ അതിൻ്റെ പരീക്ഷണ ഘട്ടത്തിലാണ്. ഇത് 2025 ഒക്ടോബറോടെ വിൽപ്പനയ്‌ക്കെത്തും . 2024 ഉത്സവ സീസണിൽ വിപണിയിൽ റിലീസ് ചെയ്യാനിരിക്കുന്ന ടാറ്റ കർവ്വ് ഇവിയുടെ നേരിട്ടുള്ള എതിരാളിയായിരിക്കും ഈ മോഡൽ. ഈ വരാനിരിക്കുന്ന ഇലക്ട്രിക് എസ്‌യുവിയെക്കുറിച്ചുള്ള ചില വിവരങ്ങൾക്കൂടി പുറത്തുവന്നിരിക്കുന്നു.

പുതിയ മഹീന്ദ്ര ഇലക്ട്രിക് എസ്‌യുവിയിൽ പുതിയതായി രൂപകൽപ്പന ചെയ്‌ത, 2-സ്‌പോക്ക്, ഫ്ലാറ്റ്-ബോട്ടം സ്റ്റിയറിംഗ് വീൽ, പ്രകാശിതമായ ബിഇ ലോഗോയും ഡ്യുവൽ സ്‌ക്രീൻ സജ്ജീകരണവും ഉള്ള ഓൾ-ബ്ലാക്ക് ഇൻ്റീരിയർ തീം അവതരിപ്പിക്കുമെന്ന് പുറത്തുവന്ന സ്‍പൈ ചിത്രം വെളിപ്പെടുത്തുന്നു. സെൻ്റർ കൺസോളിൽ എയർക്രാഫ്റ്റ് പോലെയുള്ള ത്രോട്ടിൽ ഗിയർ ലിവർ ഉൾപ്പെടുന്നു. 

മഹീന്ദ്ര ബിഇ.05-ൽ സി ആകൃതിയിലുള്ള എൽഇഡി ഡിആർഎൽ, കൂപ്പെ പോലുള്ള റൂഫ്‌ലൈൻ, സ്ക്വാറിഷ് വീൽ ആർച്ചുകൾ, മെലിഞ്ഞ എൽഇഡി ടെയിൽലാമ്പുകൾ എന്നിവ ഉൾപ്പെടുന്നു. അതിൻ്റെ കൺസെപ്റ്റ് പതിപ്പിന് സമാനമായി, പ്രൊഡക്ഷൻ-റെഡി ബിഇ.05 ന് 4370 എംഎം നീളവും 1900 എംഎം വീതിയും 1635 എംഎം ഉയരവും ലഭിക്കാൻ സാധ്യതയുണ്ട്. 2775 എംഎം നീളമുള്ള വീൽബേസിലാണ് ഇവി എത്തുക. XUV700-നെ അപേക്ഷിച്ച്, BE.05-ന് ഏകദേശം 45 എംഎം നീളവും 10 എംഎം വീതിയും അഞ്ച് എംഎം ഉയരവും ഏഴ് എംഎം  നീളമുള്ള വീൽബേസും ഉണ്ടായിരിക്കും.

പുതിയ മഹീന്ദ്ര ഇലക്ട്രിക് എസ്‌യുവിയുടെ സ്പെസിഫിക്കേഷനുകൾ ഇപ്പോഴും വ്യക്തമല്ല. എങ്കിലും, മഹീന്ദ്രയുടെ വരാനിരിക്കുന്ന ബോൺ ഇലക്‌ട്രിക് എസ്‌യുവികൾ സിംഗിൾ, ഡ്യുവൽ മോട്ടോർ സജ്ജീകരണങ്ങളോടെയായിരിക്കും വരുന്നത്. സിംഗിൾ മോട്ടോർ മോഡലുകൾക്ക് ഏകദേശം 228 മുതൽ 282 ബിഎച്ച്പിയും ഡ്യുവൽ മോട്ടോർ മോഡലുകൾക്ക് 335-389 ബിഎച്ച്പിയുമായിരിക്കും പവർ ഔട്ട്പുട്ട്. ഈ എസ്‌യുവികൾ അഞ്ച് മുതൽ ആറ് സെക്കൻഡുകൾക്കുള്ളിൽ പൂജ്യം മുതൽ 100km/h വരെ വേഗത്തിലാക്കുമെന്ന് അവകാശപ്പെടുന്നു. 175kW ഫാസ്റ്റ് ചാർജർ വഴി വെറും 30 മിനിറ്റിനുള്ളിൽ 80 ശതമാനം വരെ ചാർജ് ചെയ്യാനുള്ള ശേഷിയുള്ള ബാറ്ററി പാക്ക് കപ്പാസിറ്റി 60-80kWh ന് ഇടയിലായിരിക്കും. 80kWh ബാറ്ററി WLTP സൈക്കിളിന് കീഴിൽ ഏകദേശം 435കിമി മുതൽ 450 കിമി വരെ ഡ്രൈവിംഗ് റേഞ്ച് നൽകുമെന്ന് മഹീന്ദ്ര വ്യക്തമാക്കി.