മഹീന്ദ്രയുടെ പുതിയ വിഷൻ.എസ് കൺസെപ്റ്റ് ടീസർ പുറത്തിറങ്ങി

മഹീന്ദ്ര ആൻഡ് മഹീന്ദ്ര 2025 ഓഗസ്റ്റ് 15 ന് പുതിയ വിഷൻ.എസ് കൺസെപ്റ്റിന്റെ ടീസർ പുറത്തിറക്കി. ഈ പുതിയ എസ്‌യുവി കൺസെപ്റ്റ് ഒരു പുതിയ പ്ലാറ്റ്‌ഫോമിൽ അവതരിപ്പിക്കുമെന്നും പെട്രോൾ, ഡീസൽ, ഇലക്ട്രിക് പതിപ്പുകളിൽ ലഭ്യമാകുമെന്നും പ്രതീക്ഷിക്കുന്നു.

രാജ്യത്തെ ജനപ്രിയ എസ്‍യുവി ബ്രാൻഡായ മഹീന്ദ്ര ആൻഡ് മഹീന്ദ്ര 2025 ഓഗസ്റ്റ് 15 ന് തങ്ങളുടെ ഭാവി മോഡലുകളുടെ ഒരു വലിയ പ്രദർശനത്തിനായി ഒരുങ്ങുകയാണ്. ഇപ്പോൾ കമ്പനി വരാനിരിക്കുന്ന വിഷൻ.എസ് കൺസെപ്റ്റിന്‍റെ ഒരു പുതിയ ടീസർ പുറത്തിറക്കി. മഹീന്ദ്ര ഥാർ ഇയുടെ പ്രൊഡക്ഷൻ മോഡലിന് സമാനമായിരിക്കുമെന്ന് പ്രതീക്ഷിക്കുന്ന വിഷൻ.ടി കൺസെപ്റ്റ് മഹീന്ദ്ര പ്രദർശിപ്പിച്ചതിന് തൊട്ടുപിന്നാലെയാണ് പുതിയ ടീസർ വരുന്നത്.

മഹീന്ദ്ര വിഷൻ.എസ് കൺസെപ്റ്റ് ടീസറിൽ നിവർന്നുനിൽക്കുന്ന നോസ്, വെന്റുകളുള്ള ഒരു ക്ലാംഷെൽ ബോണറ്റ്, ഫ്ലേർഡ് വീൽ ആർച്ചുകൾ തുടങ്ങിയവ ടീസർ കാണിക്കുന്നു. ഇത് ഒരു ഷാർപ്പ് സ്റ്റൈൽ ചെയ്ത എസ്‌യുവിയെ സൂചിപ്പിക്കുന്നു. മഹീന്ദ്ര വിഷൻ.എസ് കൺസെപ്റ്റ് എന്തായിരിക്കുമെന്ന് വ്യക്തമല്ല. പക്ഷേ മുകളിൽ നിന്ന് താഴേക്കുള്ള കാഴ്ച നമുക്ക് പ്രതീക്ഷിക്കാവുന്നതിന്റെ ഒരു ചെറിയ സൂചന നൽകുന്നു. ഒരുപക്ഷേ പുതിയ പിക്ക്-അപ്പ് കൺസെപ്റ്റിന്റെ പ്രൊഡക്ഷൻ പതിപ്പ് ആയിരിക്കാം ഇത്. അല്ലെങ്കിൽ ഒരു പുതിയ എസ്‌യുവി ആകാം വിഷൻ.എസ്. ഒരുപക്ഷേ പുതിയ ബൊലേറോ വിഷൻ.എസ് കൺസെപ്റ്റിൽ പ്രദർശിപ്പിക്കാനും സാധ്യതയുണ്ട്. ഇത് ഇന്ത്യയിൽ നിരവധി തവണ പരീക്ഷണം നടത്തിയതായി കണ്ടെത്തിയിട്ടുണ്ട്. 2025 ഓഗസ്റ്റ് 15 ന് പുതിയൊരു പ്ലാറ്റ്‌ഫോം അവതരിപ്പിക്കുമെന്ന് മഹീന്ദ്ര നേരത്തെ സ്ഥിരീകരിച്ചിരുന്നു. അതിനാൽ പുതിയ ആർക്കിടെക്ചറിനുള്ള ഏറ്റവും മികച്ച ഓപ്ഷനുകളിൽ ഒന്നായിരിക്കും വിഷൻ.എസ്.

വിഷൻ.എസ് കൺസെപ്റ്റിലെ പവർട്രെയിൻ ഓപ്ഷനുകളെക്കുറിച്ച് നിലവിൽ വിവരങ്ങൾ ഒന്നുമില്ല. പക്ഷേ വരാനിരിക്കുന്ന ഓഫറിൽ പെട്രോൾ, ഡീസൽ, ഇലക്ട്രിക് മോട്ടോറുകൾ പോലും ഉൾപ്പെട്ടേക്കാം. വരാനിരിക്കുന്ന കൺസെപ്റ്റ് പതിപ്പിന് ഒരു പുതിയ പ്ലാറ്റ്‌ഫോം അടിസ്ഥാനമാകാനാണ് സാധ്യത, അത് ഓഗസ്റ്റ് 15 ന് അരങ്ങേറും. പുതിയ മോഡലുകൾക്കായുള്ള വാർഷിക ആഘോഷത്തിന്റെ ഭാഗമായി കമ്പനി അതിന്റെ പ്രത്യേക പരിപാടിയെ 'ഫ്രീഡം എൻയു' എന്ന് വിളിക്കുന്നു.

ഇന്ത്യൻ സ്വാതന്ത്ര്യദിനത്തിൽ തങ്ങളുടെ ഭാവി വാഹനങ്ങൾ പ്രദർശിപ്പിക്കുമെന്ന് മഹീന്ദ്ര നേരത്തെ പറഞ്ഞിട്ടുണ്ട്. 2020 ൽ രണ്ടാം തലമുറ ഥാറിനെയും തുടർന്ന് XUV700 നെയും അടുത്തിടെ 2024 ൽ ഥാർ റോക്സിനെയും കമ്പനി അവതരിപ്പിച്ചു. 2023 ഓഗസ്റ്റ് 15 ന് വാഹന നിർമ്മാതാക്കൾ ഥാർ ഇ കൺസെപ്റ്റും വെളിപ്പെടുത്തി. മഹീന്ദ്ര വിഷൻ.ടി കൺസെപ്റ്റ് ഇലക്ട്രിക്ക് ഥാറിന്റെ ഉൽപ്പാദനത്തോട് അടുത്ത പതിപ്പാകാൻ സാധ്യതയുണ്ട് എന്നാണ് റിപ്പോർട്ടുകൾ.