വരുന്നൂ റെനോ ഡസ്റ്റർ ഇവി, ഫുൾ ചാർജ്ജിൽ മികച്ച റേഞ്ചെന്ന് റിപ്പോർട്ട്

2026ൽ മൂന്നാം തലമുറ റെനോ ഡസ്റ്റർ ഇന്ത്യയിൽ എത്തും. ഡാസിയ ബ്രാൻഡിന് കീഴിൽ യൂറോപ്യൻ വിപണികളിൽ വിൽക്കുന്ന ഈ എസ്‌യുവി, സിഎംഎഫ് - ബിഇവി പ്ലാറ്റ്‌ഫോമിനെ അടിസ്ഥാനമാക്കിയാണ് നിർമ്മിച്ചിരിക്കുന്നത്.

മൂന്നാം തലമുറ റെനോ ഡസ്റ്റർ ഇന്ത്യൻ റോഡുകളിൽ എത്തുന്നതിനായി കാത്തിരിക്കുകയാണ് വാഹനലോകം. ഈ മോഡൽ 2026 ൽ പുറത്തിറങ്ങും. യൂറോപ്യൻ വിപണികളിൽ, റെനോയുടെ ഉടമസ്ഥതയിലുള്ള കാർ ബ്രാൻഡായ ഡാസിയ ബ്രാൻഡിന് കീഴിലാണ് ഡസ്റ്റർ എസ്‌യുവി വിൽക്കുന്നത്. പുതിയ റിപ്പോർട്ട് അനുസരിച്ച്, റെനോ 5, റെനോ 4 എന്നിവയ്ക്ക് അടിവരയിടുന്ന സിഎംഎഫ് - ബിഇവി പ്ലാറ്റ്‌ഫോമിനെ അടിസ്ഥാനമാക്കിയാണ് ഡാസിയ ഡസ്റ്റർ ഇവിയിൽ പ്രവർത്തിക്കുന്നത്. കമ്പനി ഇതുവരെ അതിന്റെ ലോഞ്ച് ടൈംലൈൻ വെളിപ്പെടുത്തിയിട്ടില്ലെങ്കിലും ഡാസിയ ഡസ്റ്റർ ഇവി അഥവാ റെനോ ഡസ്റ്റർ ഇവി വരുമെന്ന് സ്ഥിരീകരിച്ചു.

2027 ഓടെ ഡസ്റ്റർ ഇവി ആഗോളതലത്തിൽ അരങ്ങേറ്റം കുറിക്കുമെന്നും ഒടുവിൽ ഇന്ത്യയിലും എത്തുമെന്നും പ്രതീക്ഷിക്കുന്നു. ഹ്യുണ്ടായി ക്രെറ്റ ഇലക്ട്രിക്, വരാനിരിക്കുന്ന മാരുതി ഇ വിറ്റാര, ടൊയോട്ട അർബൻ ക്രൂയിസർ ഇവി എന്നിവയെ വെല്ലുവിളിക്കാൻ റെനോ ഇന്ത്യ ഒരു സി-സെഗ്മെന്റ് ഇലക്ട്രിക് എസ്‌യുവി പരിഗണിക്കുന്നുണ്ടെന്ന് നേരത്തെ റിപ്പോർട്ടുകൾ വന്നിരുന്നു.

ഇലക്ട്രിക് ഡസ്റ്ററിൽ ഡ്യുവൽ മോട്ടോർ സജ്ജീകരണവും എൽഎഫ്‌പി (ലിഥിയം അയൺ ഫോസ്ഫേറ്റ്) ബാറ്ററിയും ഉണ്ടാകുമെന്ന് പ്രതീക്ഷിക്കുന്നു. ഇതിൽ കരുത്തുറ്റ സ്റ്റൈലിംഗും 4X4 കഴിവുകളും ഉൾപ്പെടുന്നു. ഇതിന്റെ റേഞ്ച് കണക്കുകളെക്കുറിച്ച് ഇപ്പോൾ വ്യക്തമല്ല. എങ്കിലും പൂർണ്ണമായി ചാർജ് ചെയ്താൽ 300 കിലോമീറ്ററിൽ കൂടുതൽ റേഞ്ച് ലഭിക്കുമെന്ന് പ്രതീക്ഷിക്കുന്നു.

പെട്രോൾ, പെട്രോൾ-ഹൈബ്രിഡ് പവർട്രെയിൻ ഓപ്ഷനുകളോടെയായിരിക്കും പുതിയ തലമുറ ഡസ്റ്റർ അവതരിപ്പിക്കുക. പെട്രോൾ പതിപ്പിൽ 1.0 ലിറ്റർ നാച്ചുറലി ആസ്പിറേറ്റഡ്, 1.3 ലിറ്റർ ടർബോ എഞ്ചിൻ ഓപ്ഷനുകൾ വാഗ്ദാനം ചെയ്യുമെന്ന് പ്രതീക്ഷിക്കുന്നു. ഹൈബ്രിഡ് പതിപ്പിൽ 94 ബിഎച്ച്പി, രണ്ട് ഇലക്ട്രിക് മോട്ടോറുകളുമായി ജോടിയാക്കിയ 1.6 ലിറ്റർ പെട്രോൾ എഞ്ചിൻ, 140 ബിഎച്ച്പി സംയോജിത പവർ നൽകുന്ന 1.2 കിലോവാട്ട് ബാറ്ററി പായ്ക്ക് എന്നിവ ഉൾപ്പെടും. എഡബ്ല്യുഡി ഡ്രൈവ്ട്രെയിൻ സിസ്റ്റം സജ്ജീകരിച്ചിരിക്കുന്ന ഡസ്റ്ററിന്റെ ടോപ്പ്-എൻഡ് വേരിയന്റിനായി ഹൈബ്രിഡ് പവർട്രെയിൻ മാറ്റിവച്ചേക്കും എന്നും റിപ്പോർട്ടുകൾ പറയുന്നു.

ഇന്ത്യയിൽ സിഎൻജി വാഹനങ്ങൾക്കുള്ള ഉയർന്ന ഡിമാൻഡ് കണക്കിലെടുത്ത്, ഭാവിയിൽ റെനോ ഒരു സിഎൻജി (കംപ്രസ്ഡ് നാച്ചുറൽ ഗ്യാസ്) പവർഡ് ഡസ്റ്റർ അവതരിപ്പിച്ചേക്കാം എന്നും റിപ്പോർട്ടുകൾ ഉണ്ട്. ഈ പദ്ധതി നിലവിൽ പ്രാഥമിക ഘട്ടത്തിലാണ്.