മഹീന്ദ്ര XEV 9e, BE 6: ജനപ്രീതിയുടെ രഹസ്യമെന്ത്?

മഹീന്ദ്രയുടെ പുതിയ ഇലക്ട്രിക് എസ്‌യുവികളായ XEV 9e, BE 6 എന്നിവയ്ക്ക് മികച്ച പ്രതികരണം. അത്യാധുനിക ഫീച്ചറുകളും ആകർഷകമായ രൂപകൽപ്പനയുമാണ് ഈ വാഹനങ്ങളെ പ്രിയങ്കരമാക്കുന്നത്.

മഹീന്ദ്രയുടെ ആദ്യ ഇലക്ട്രിക് എസ്‌യുവികളായ XEV 9e , BE 6 എന്നിവയ്ക്ക് ഉപഭോക്താക്കളിൽ നിന്ന് മികച്ച പ്രതികരണമാണ് ലഭിക്കുന്നത്. ആദ്യ 24 മണിക്കൂറിനുള്ളിൽ ഈ ഇലക്ട്രിക് എസ്‌യുവികൾ 30,179 ബുക്കിംഗുകൾ വരെ നേടി. രണ്ട് മോഡലുകളുടെയും ടോപ്പ്-സ്പെക്കിനായുള്ള ബുക്കിംഗുകൾ ഏകദേശം 75% ആണെന്ന് കണക്കുകൾ പറയുന്നു. വാഹന നിർമ്മാതാക്കളുടെ ഏറ്റവും പുതിയ ഇലക്ട്രിക് എസ്‌യുവികൾ വിവിധ കാരണങ്ങളാൽ ഉപഭോക്താക്കൾ ഇഷ്‍ടപ്പെടുന്നു. ഉപഭോക്താക്കളിൽ നിന്നുള്ള ബുക്കിംഗുകൾക്ക് ലഭിച്ച മികച്ച പ്രതികരണത്തിന് പിന്നിലെ ചില കാരണങ്ങൾ നോക്കാം. മഹീന്ദ്ര XEV 9e, BE6 എന്നീ ടോപ്പ്-സ്പെക്കുകളെ ഉപഭോക്താക്കൾക്ക് പ്രിയങ്കരമാക്കിയത് എന്താണ്? ഇതാ അറിയേണ്ടതെല്ലാം. 

മഹീന്ദ്രയുടെ ഏറ്റവും പുതിയ രണ്ട് ഇലക്ട്രിക് എസ്‌യുവി വകഭേദങ്ങളും സാങ്കേതിക സവിശേഷതകൾ, ഭാവിയിലേക്കുള്ള ഒരു രൂപകൽപ്പന, 79 kWh ന്റെ ഏറ്റവും വലിയ ബാറ്ററി പായ്ക്ക് എന്നിവയോടെയാണ് വരുന്നത്.

മഹീന്ദ്ര XEV 9e പാക്ക് 3: പ്രധാന സവിശേഷതകൾ
XEV 9e യുടെ ഏറ്റവും ഉയർന്ന പതിപ്പ് പാക്ക് 3 ആണ്. അതിന്റെ എക്സ്-ഷോറൂം വില 30.50 ലക്ഷം രൂപ ആണ്. 79 kWh ബാറ്ററിയാണ് ഇതിന് കരുത്ത് പകരുന്നത്. ഒറ്റ ചാർജിൽ 656 കിലോമീറ്റർ MIDC റേഞ്ച് ഇത് വാഗ്ദാനം ചെയ്യുമെന്ന് അവകാശപ്പെടുന്നു. കൂപ്പെ റൂഫ്‌ലൈൻ, ക്ലോസ്ഡ്-ഓഫ് ഗ്രില്ലുള്ള ബോണറ്റ്, ഇൻവെർട്ടഡ് എൽ-ആകൃതിയിലുള്ള കണക്റ്റഡ് എൽഇഡി ഡിആർഎൽ, എയറോഡൈനാമിക്കലി സ്റ്റൈൽ ചെയ്ത 19 ഇഞ്ച് ഡ്യുവൽ-ടോൺ അലോയ് വീലുകൾ എന്നിവയുള്ള ഫ്യൂച്ചറിസ്റ്റിക് ഡിസൈൻ XEV 9e-യുടെ സവിശേഷതകളാണ്. ഗ്ലോസ് ബാക്ക് ക്ലാഡിംഗും ഉയർന്ന ഗ്രൗണ്ട് ക്ലിയറൻസും എസ്‌യുവി വാഗ്ദാനം ചെയ്യുന്നു.

ക്യാബിന്റെ ഉൾഭാഗത്തെ സംബന്ധിച്ചിടത്തോളം, ഡോൾബി അറ്റ്‌മോസുള്ള 16-സ്പീക്കർ ഹർമൻ കാർഡൺ സിസ്റ്റം, ലെവൽ 2+ ADAS, 360-ഡിഗ്രി സറൗണ്ട് വ്യൂ ക്യാമറ, പനോരമിക് സൺറൂഫ്, വയർലെസ് ഫോൺ ചാർജിംഗ്, ഒരു HUD, വയർലെസ് കണക്റ്റിവിറ്റി, ഇലക്ട്രിക്കലി ക്രമീകരിക്കാവുന്ന ഡ്രൈവർ സീറ്റ് തുടങ്ങി നിരവധി സാങ്കേതിക സൗകര്യങ്ങൾ ഈ എസ്‌യുവിയിൽ ഉൾപ്പെടുത്തിയിട്ടുണ്ട്.

മഹീന്ദ്ര BE 6 പാക്ക് 3: പ്രധാന സവിശേഷതകൾ
മഹീന്ദ്ര BE 6ന്‍റെ ഈ ടോപ്പ്-സ്പെക്കിന്‍റെ എക്സ്-ഷോറൂം വില 26.90 ലക്ഷം രൂപയാണ്. 79 kWh ബാറ്ററിയാണ് ഇതിന് കരുത്ത് പകരുന്നത്. ഒറ്റ ചാർജിൽ 683 കിലോമീറ്റർ സഞ്ചരിക്കാൻ ഇതിന് കഴിയും. എസ്‌യുവിയുടെ പുറംഭാഗത്ത് സി ആകൃതിയിലുള്ള എൽഇഡി ഡേടൈം റണ്ണിംഗ് ലൈറ്റുകളും പിൻ ലൈറ്റുകളിൽ തുടർച്ചയായ ലൈറ്റിംഗ് ഇഫക്റ്റും ഉണ്ട്. ഇലക്ട്രിക്കലായി വിന്യസിക്കാവുന്ന ഫ്ലഷ് ഡോർ ഹാൻഡിലുകളുമായാണ് കാർ വരുന്നത്.

ഇന്റീരിയറിനെ സംബന്ധിച്ചിടത്തോളം, തുകൽ പൊതിഞ്ഞ സ്റ്റിയറിംഗ് വീൽ, സ്റ്റിയറിംഗ് വീലിലും സെന്റർ കൺസോളിലും ടച്ച് സെൻസിറ്റീവ് സ്വിച്ചുകൾ എന്നിവ ലഭിക്കും. ഈ ടോപ്പ് വേരിയന്റിൽ പവർഡ് ടെയിൽഗേറ്റ്, കീലെസ് എൻട്രി, സെൽഫി ക്യാമറ, മൾട്ടി-കളർ ആംബിയന്റ് ലൈറ്റിംഗ്, പനോരമിക് റൂഫിൽ പ്രകാശിതമായ വിശദാംശങ്ങൾ എന്നിവയും ഉൾപ്പെടുന്നു.

സുരക്ഷയ്ക്കായി, ഈ ഇലക്ട്രിക് വാഹനത്തിൽ 7 എയർബാഗുകൾ, 360-ഡിഗ്രി ക്യാമറ, ഓട്ടോ പാർക്ക് അസിസ്റ്റ്, ഓഗ്മെന്റഡ് റിയാലിറ്റി (AR) ഹെഡ്‌സ്-അപ്പ് ഡിസ്‌പ്ലേ (HUD), ഡ്രൈവർ അസിസ്റ്റൻസ് സിസ്റ്റങ്ങൾ, സുരക്ഷിതമായ പാർക്കിംഗ് സാധ്യമാക്കുന്നതിന് ഓട്ടോ-ടിൽറ്റ് ഓആർവിഎമ്മുകൾ തുടങ്ങിയ ഫീച്ചറുകൾ ഉൾപ്പെടുന്നു.