പഞ്ച് ഇവിക്ക് എതിരാളിയുമായി മാരുതിയും ഹ്യുണ്ടായിയും

ടാറ്റ പഞ്ച് ഇവിക്ക് എതിരാളികളായി ഹ്യുണ്ടായി ഇൻസ്റ്റ‍ ഇവി, മാരുതി ഫ്രോങ്ക്സ് ഇവി എന്നിവ വിപണിയിലേക്ക്. ഹ്യുണ്ടായിയുടെ ഇൻസ്റ്റർ ഇവി 2026-ലും മാരുതിയുടെ ഫ്രോങ്ക്സ് ഇവി 2027-ലും പുറത്തിറങ്ങും.

2024 ജനുവരിയിൽ പുറത്തിറക്കിയ ടാറ്റ പഞ്ച് ഇവി, ഇവി വിപണിയിൽ ടാറ്റയുടെ വിൽപ്പന ശക്തിപ്പെടുത്തുന്നതിൽ നിർണായക സംഭാവന നൽകിയിട്ടുണ്ട്. സ്‍മാർട്ട്, സ്‍മാർട്ട്+, അഡ്വഞ്ചർ, എംപവേർഡ്, എംപവേർഡ്+ എന്നീ അഞ്ച് വേരിയന്റുകളിലാണ് ഈ കോംപാക്റ്റ് ഇലക്ട്രിക് എസ്‌യുവി വരുന്നത്, കൂടാതെ സ്റ്റാൻഡേർഡ് 25kWh, ലോംഗ് റേഞ്ച് 35kWh എന്നീ രണ്ട് ബാറ്ററി പായ്ക്ക് ഓപ്ഷനുകൾ വാഗ്ദാനം ചെയ്യുന്നു. ഇപ്പോഴിതാ വി വിഭാഗത്തിൽ ടാറ്റയുടെ ആധിപത്യത്തെ വെല്ലുവിളിക്കാൻ ലക്ഷ്യമിട്ട്, ഹ്യുണ്ടായിയും മാരുതിയും രണ്ട് പുതിയ മോഡലുകൾ പുറത്തിറക്കാൻ ഒരുങ്ങുന്നു. ഇൻസ്റ്റർ ഇവി, ഫ്രോങ്ക്സ് ഇവി എന്നിവയാണ് ഈ മോഡലുകൾ. വരാനിരിക്കുന്ന ഈ കോംപാക്റ്റ് ഇലക്ട്രിക് എസ്‌യുവികളെക്കുറിച്ച് അറിയാം.

ഹ്യുണ്ടായി ഇൻസ്റ്റർ ഇവി
2026-ൽ ഇൻസ്റ്റർ ഇവി അധിഷ്ഠിത മോഡലുമായി കോം‌പാക്റ്റ് ഇലക്ട്രിക് എസ്‌യുവി വിപണിയിൽ പ്രവേശിക്കാൻ ഹ്യുണ്ടായി മോട്ടോർ ഇന്ത്യ പദ്ധതിയിടുന്നു. ഈ പുതിയ ഇലക്ട്രിക് എസ്‌യുവി കാർ നിർമ്മാതാവിന്റെ ശ്രീപെരുമ്പുത്തൂർ ഉൽ‌പാദന കേന്ദ്രത്തിലായിരിക്കും നിർമ്മിക്കുക. HE1i എന്ന കോഡ് നാമത്തിൽ അറിയപ്പെടുന്ന ഹ്യുണ്ടായി ഇൻസ്റ്റർ ഇവിക്ക് ആഗോളതലത്തിൽ രണ്ട് ബാറ്ററി പായ്ക്ക് ഓപ്ഷനുകളുണ്ട്. സ്റ്റാൻഡേർഡ് 42kWh, ലോംഗ്-റേഞ്ച് 49kWh എന്നിവ. ആദ്യത്തേത് 300 കിലോമീറ്റർ WLTP റേഞ്ച് നൽകുമ്പോൾ, രണ്ടാമത്തേത് ഒറ്റ ചാർജിൽ 355 കിലോമീറ്റർ വാഗ്ദാനം ചെയ്യുന്നു. രണ്ട് ബാറ്ററി ഓപ്ഷനുകളും ഇന്ത്യ-സ്പെക്ക് മോഡലിൽ വാഗ്ദാനം ചെയ്യാൻ സാധ്യതയുണ്ട്. വാഹനത്തിൽ 10.25 ഇഞ്ച് ഇരട്ട സ്‌ക്രീനുകൾ ലഭിക്കും. ഒന്ന് ഇൻഫോടെയ്ൻമെന്റിനും മറ്റൊന്ന് ഉപകരണ പ്രവർത്തനങ്ങൾക്കും. കൂടാതെ ബ്ലൈൻഡ് സ്പോട്ട് മോണിറ്ററിംഗ് സിസ്റ്റം, ഓട്ടോ ക്ലൈമറ്റ് കൺട്രോൾ, ADAS (അഡ്വാൻസ്‍ഡ് ഡ്രൈവർ അസിസ്റ്റൻസ് സിസ്റ്റം) എന്നിവയുള്ള 360 ഡിഗ്രി ക്യാമറയും ഇതിൽ ഉൾപ്പെടുന്നു.

മാരുതി ഫ്രോങ്ക്സ് ഇവി
മാരുതി സുസുക്കി 2025 ൽ സ്വന്തം ഹൈബ്രിഡ് പവർട്രെയിനുള്ള ഫ്രോങ്ക്സിനെ അവതരിപ്പിക്കാൻ ഒരുങ്ങുകയാണ്. മാരുതി സുക്കി ഫ്രോങ്ക്സ് ഇവി 2027 ൽ എത്താൻ സാധ്യതയുണ്ട്. നിലവിൽ, മാരുതി ഫ്രോങ്ക്സ് ഇലക്ട്രിക്കിനെക്കുറിച്ച് ഔദ്യോഗിക വിവരങ്ങളൊന്നുമില്ല . എങ്കിലും, ഉടൻ പുറത്തിറങ്ങാനിരിക്കുന്ന മാരുതി ഇ വിറ്റാരയുമായി അതിന്റെ പവർട്രെയിൻ പങ്കിടുമെന്ന് പ്രതീക്ഷിക്കുന്നു. രണ്ടാമത്തേത് 49kWh, 61kWh ബാറ്ററി ഓപ്ഷനുകളുമായി വരും, ഇത് യഥാക്രമം 143bhp, 173bhp പവർ നൽകുന്നു. ഫ്രോങ്ക്സ് ഇവിയുടെ വില ഏകദേശം 12 ലക്ഷം രൂപയിൽ ആരംഭിക്കുമെന്ന് പ്രതീക്ഷിക്കുന്നു.