റോഡുനികുതിയും രജിസ്ട്രേഷൻ ഫീസും ഫ്രീ, 20 ലക്ഷം വരെ സബ്‍സിഡി; അമ്പരപ്പിച്ച് യോഗി സര്‍ക്കാര്‍!

വാഹന ഉടമകളെ കോരിത്തരിപ്പിക്കുന്ന പ്രഖ്യാപനങ്ങളുമായി യുപി സര്‍ക്കാര്‍

സംസ്ഥാനത്ത് ബാറ്ററിയിൽ പ്രവർത്തിക്കുന്ന വാഹനങ്ങളുടെ വില്‍പ്പന കൂടുതൽ വേഗത്തിലാക്കാനുള്ള ശ്രമത്തിലാണ് ഉത്തർപ്രദേശ് സർക്കാർ . ഇതിന്‍റെ ഭാഗമായി ഇപ്പോള്‍ 2022ലെ ഇലക്‌ട്രിക് വെഹിക്കിൾ പോളിസി പുറത്തിറക്കിയിരിക്കുകയാണ് സര്‍ക്കാര്‍.  നിർമ്മാണത്തിനായുള്ള നിക്ഷേപം ആകർഷിക്കുന്നതിനും പണം ഈടാക്കുന്നതിനും ബാറ്ററിയിൽ പ്രവർത്തിക്കുന്ന മൊബിലിറ്റി ഓപ്ഷൻ തിരഞ്ഞെടുക്കുന്ന ഉപഭോക്താക്കൾക്ക് പ്രോത്സാഹനങ്ങൾ നൽകുന്നതിനും വിവിധ ഘടകങ്ങളിൽ സർക്കാർ ശ്രദ്ധ കേന്ദ്രീകരിച്ചിട്ടുണ്ട്.

ഉത്തർപ്രദേശ് ഇവി പോളിസിയിലെ ഏറ്റവും വലിയ പ്രഖ്യാപനം പുതിയ പോളിസി പ്രാബല്യത്തിൽ വരുന്ന ആദ്യ മൂന്ന് വർഷത്തിനുള്ളിൽ എല്ലാ സെഗ്‌മെന്റ് ഇവികളും വാങ്ങുമ്പോൾ റോഡ് നികുതിയിലും രജിസ്‌ട്രേഷൻ ഫീസിലും 100 ശതമാനം ഇളവ് നൽകാനുള്ള തീരുമാനമാണ്. പ്രസ്‍തുത ഇലക്ട്രിക്ക് വാഹനം ഉത്തര്‍ പ്രദേശില്‍ തന്നെ നിർമ്മിച്ചതാണെങ്കിൽ, ഈ ഇളവ് നാലാമത്തെയും അഞ്ചാമത്തെയും വർഷത്തേക്ക് പോലും നീട്ടി നല്‍കുമെന്നും പുതിയ ഇവി പോളിസി വാഗ്‍ദാനം ചെയ്യുന്നു. 

ഇലക്ട്രിക് ഇരുചക്രവാഹനങ്ങൾ വാങ്ങുന്നതിന് ഫാക്ടറി ചെലവിൽ 15 ശതമാനം സബ്‌സിഡിയും ഉണ്ട്. ഇതനുസരിച്ച് ഒരു വാഹനത്തിന് പരമാവധി 5,000 രൂപ വരെ സബ്‍ഡിസിയും ലഭിക്കും. ഈ വാഗ്‍ദാനം വാങ്ങുന്ന ആദ്യത്തെ രണ്ട് ലക്ഷം ഇവികൾക്ക് വിധേയമാണ്. ഇലക്ട്രിക് കാർ വാങ്ങുമ്പോൾ, ആദ്യം വിൽക്കുന്ന 25,000 വാഹനങ്ങൾക്ക് വിധേയമായി ഒരു ലക്ഷം രൂപ വരെ സബ്‌സിഡിയും ഉണ്ട് . ഇലക്ട്രിക് ത്രീ വീലറുകൾക്ക്, ആദ്യത്തെ 50,000 യൂണിറ്റുകൾക്ക് 12,000 രൂപ വരെ സബ്‌സിഡിയുണ്ട്. അതേസമയം ഇലക്ട്രിക് ബസുകളിൽ ആദ്യത്തെ 400 യൂണിറ്റുകൾക്ക് 20 ലക്ഷം രൂപ വരെ സബ്‌സിഡി ലഭിക്കും. 

ഇലക്ട്രിക്ക് വാഹനങ്ങള്‍ക്കായുള്ള അടിസ്ഥാന സൌകര്യ വികസനത്തിനും പുതിയ ഇവി പോളിസി ഏറെ പ്രധാന്യം നല്‍കുന്നു. സംസ്ഥാനത്തെ ആദ്യത്തെ 2,000 ചാർജിംഗ് സ്റ്റേഷൻ സേവന ദാതാക്കൾക്ക് മൂലധന സബ്‌സിഡിയോടെ ചാർജിംഗ് ഇൻഫ്രാസ്ട്രക്ചർ പ്രോത്സാഹിപ്പിക്കുന്നതിനും സംസ്ഥാനത്തുടനീളമുള്ള ചാർജിംഗ്, ബാറ്ററി സ്വാപ്പിംഗ് സൗകര്യങ്ങൾ വികസിപ്പിക്കുന്നതിനും ഒരു പ്രത്യേക പ്രോത്സാഹനവും പുതിയ ഇവി പോളിസി വാഗ്‍ദാനം ചെയ്യുന്നു. ഇതനുസരിച്ച് ഒരു ചാർജിംഗ് സ്റ്റേഷന് പരമാവധി 10 ലക്ഷം രൂപ വരെ ലഭിക്കും. സംസ്ഥാനത്തെ ആദ്യത്തെ 1,000 ബാറ്ററി സ്വാപ്പിംഗ് സ്റ്റേഷനുകൾക്ക് പരമാവധി അഞ്ച്  ലക്ഷം മൂലധന സബ്‌സിഡിയും പോളിസിയുടെ ഭാഗമായി യുപി സര്‍ക്കാര്‍ വാഗ്‍ദാനം ചെയ്യുന്നു.

സംസ്ഥാനത്ത് പരിസ്ഥിതി സൗഹൃദ ഗതാഗത സംവിധാനം പ്രോത്സാഹിപ്പിക്കുക എന്നതാണ് യുപി സര്‍ക്കാരിന്‍റെ പുതിയ വൈദ്യുത വാഹന നയത്തിന്‍റെ മൊത്തത്തിലുള്ള ലക്ഷ്യം.  അതേസമയം ഉത്തർപ്രദേശിനെ ഇവി നിർമ്മാണത്തിന്‍റെ ആഗോള ഹബ് ആക്കാനും 30,000 കോടി രൂപയിലധികം നിക്ഷേപം ആകർഷിക്കാനും ഒരു ദശലക്ഷത്തിലധികം ആളുകൾക്ക് പ്രത്യക്ഷവും പരോക്ഷവുമായ തൊഴിൽ സൃഷ്‍ടിക്കാനും നയം ലക്ഷ്യമിടുന്നു.