ഗ്രാൻഡ് വിറ്റാര ഹൈറൈഡറിന് സമാനമായി, പുതിയ ടൊയോട്ട ഇന്നോവ ഹൈക്രോസിന്റെ റീ-ബാഡ്ജ് പതിപ്പ് 2023-ൽ നമ്മുടെ വിപണിയിൽ അവതരിപ്പിക്കാൻ മാരുതി സുസുക്കി പദ്ധതിയിടുന്നു.
മാരുതി സുസുക്കി അടുത്തിടെ ഗ്രാൻഡ് വിറ്റാര മിഡ്-സൈസ് എസ്‌യുവി പുറത്തിറക്കി. ഇത് നിലവിൽ ഇന്ത്യൻ വിപണിയിലെ ബ്രാൻഡിന്റെ ഏറ്റവും ചെലവേറിയ മോഡലാണ്. വിറ്റാരയുടെ ടോപ്പ് എൻഡ് വേരിയന്റിന് ഏകദേശം 22.50 ലക്ഷം രൂപയാണ് ഓൺ-റോഡ് വില. എന്നിരുന്നാലും, കമ്പനിയുടെ ഏറ്റവും ചെലവേറിയ മോഡൽ 2023-ൽ ഇന്ത്യൻ വിപണിയിൽ അവതരിപ്പിക്കും. ഗ്രാൻഡ് വിറ്റാര ഹൈറൈഡറിന് സമാനമായി, പുതിയ ടൊയോട്ട ഇന്നോവ ഹൈക്രോസിന്റെ റീ-ബാഡ്ജ് പതിപ്പ് 2023-ൽ നമ്മുടെ വിപണിയിൽ അവതരിപ്പിക്കാൻ മാരുതി സുസുക്കി പദ്ധതിയിടുന്നു.
ടൊയോട്ട ഇന്നോവ ഹൈക്രോസ് 2023 ജനുവരിയിൽ ലോഞ്ച് ചെയ്യാനാണ് ഉദ്ദേശിക്കുന്നത്. ഇത് അഞ്ച് വേരിയന്റുകളിലും രണ്ട് എഞ്ചിൻ ഓപ്ഷനുകളിലും ശക്തമായ ഹൈബ്രിഡ് ടെക്‌നോളജിയിൽ ലഭിക്കും. ഫീച്ചർ ലോഡഡ് മോഡലായ ഇതിന് ഏകദേശം 20 ലക്ഷം മുതൽ 30 ലക്ഷം രൂപ വരെ വില പ്രതീക്ഷിക്കുന്നു. പുതിയ ഇന്നോവ ഹൈക്രോസ് കിയ കാർണിവൽ, സഫാരി, XUV700 എന്നിവയുൾപ്പെടെ 7 സീറ്റർ എസ്‌യുവികൾക്ക് എതിരാളിയാകാൻ ഒരുങ്ങുകയാണ്.
ടൊയോട്ട പുതിയ ഇന്നോവ ഹൈക്രോസ് മാരുതി സുസുക്കിക്ക് നൽകും. അത് റീ-ബാഡ്ജ് ചെയ്ത് നെക്‌സ പ്രീമിയം ഡീലർഷിപ്പ് നെറ്റ്‌വർക്കിലൂടെ പുറത്തിറക്കും. പുതിയ ഹൈക്രോസ് പുറത്തിറക്കി ആറ് മാസത്തിന് ശേഷം മാരുതിയുടെ പതിപ്പ് എത്തുമെന്നാണ് പ്രതീക്ഷിക്കുന്നത്. മാരുതിയുടെ പതിപ്പ് ബ്രാൻഡിന്റെ മുൻനിര ഓഫറായിരിക്കും. ഏകദേശം 20 ലക്ഷം മുതൽ 30 ലക്ഷം രൂപ വരെ വില പ്രതീക്ഷിക്കുന്നു.
ഗ്രാൻഡ് വിറ്റാരയ്ക്ക് സമാനമായി, മാരുതിയുടെ വരാനിരിക്കുന്ന എംപിവി ടൊയോട്ടയുടെ ബിഡാഡി അധിഷ്ഠിത പ്ലാന്റിൽ നിർമ്മിക്കും. ഇന്ത്യൻ വിപണിയിൽ അവതരിപ്പിക്കുന്നതിന് മുമ്പ്, മാരുതി സുസുക്കി ഇന്ത്യ അതിന്റെ സ്റ്റൈലിംഗിൽ ചില മാറ്റങ്ങൾ വരുത്തും. പുതിയ ഗ്രാൻഡ് വിറ്റാരയ്ക്ക് അനുസൃതമായി ചില ഡിസൈൻ മാറ്റങ്ങൾ ലഭിക്കുമെന്ന് പ്രതീക്ഷിക്കുന്നു. പുതിയ ഗ്രിൽ, പുതുക്കിയ ഹെഡ്‌ലാമ്പ് സജ്ജീകരണം, പുതിയ ബമ്പർ എന്നിവ ഉൾപ്പെടുന്ന മുൻവശത്തെ പ്രൊഫൈലിൽ ഭൂരിഭാഗം മാറ്റങ്ങളും വരുത്തും. പിൻഭാഗത്ത് പുതിയ ടെയിൽ ലൈറ്റുകൾ ലഭിക്കുമെന്ന് പ്രതീക്ഷിക്കുന്നു. പുതിയ കളർ സ്‍കീം ഒഴികെയുള്ള ക്യാബിൻ അതേപടി തുടരാൻ സാധ്യതയുണ്ട്.
അഡ്വാൻസ്‍ഡ് ഡ്രൈവർ അസിസ്റ്റൻസ് സിസ്റ്റം ADAS ഫീച്ചർ ചെയ്യുന്ന ഇന്ത്യൻ വിപണിയിലെ മാരുതിയുടെ ആദ്യ മോഡലാണിത് . പനോരമിക് സൺറൂഫ്, 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 9-സ്പീക്കർ JBL സൗണ്ട് സിസ്റ്റം, ഡ്യുവൽ-സോൺ ക്ലൈമറ്റ് കൺട്രോൾ, മെമ്മറി ഫംഗ്‌ഷനുള്ള പവർഡ് ഡ്രൈവർ സീറ്റ്, ഓട്ടോമൻ ഫംഗ്‌ഷനോടുകൂടിയ ഇലക്ട്രിക്കലി അഡ്‍ജസ്റ്റ് ചെയ്യാവുന്ന രണ്ടാം നിര സീറ്റുകൾ എന്നിവയും എംപിവിക്ക് ലഭിക്കും.
പവർട്രെയിൻ ഓപ്ഷനുകളിൽ 172 ബിഎച്ച്പി, 2.0 ലിറ്റർ നാച്ചുറലി ആസ്പിറേറ്റഡ് പെട്രോൾ, 2.0 ലിറ്റർ പെട്രോളും ടൊയോട്ടയുടെ ന്യൂ-ജെൻ ശക്തമായ ഹൈബ്രിഡ് യൂണിറ്റും 184 ബിഎച്ച്പി സംയുക്ത പവർ ഔട്ട്പുട്ടും ഉൾപ്പെടും. ടൊയോട്ട ഇന്നോവ ഹൈക്രോസ് ലിറ്ററിന് 21.1 കിലോമീറ്റർ എന്ന സർട്ടിഫൈഡ് ഇന്ധനക്ഷമത നൽകുമെന്ന് കമ്പനി അവകാശപ്പെടുന്നു.