ചെക്ക് ആഡംബര വാഹന നിര്‍മ്മാതാക്കളായ സ്‍കോഡയുടെ സെഡാന് മോഡല്‍ റാപ്പിഡിന്റെ പുതിയ പതിപ്പ് വിപണിയില്‍.
ചെക്ക് ആഡംബര വാഹന നിര്‍മ്മാതാക്കളായ സ്‍കോഡയുടെ സെഡാന് മോഡല്‍ റാപ്പിഡിന്റെ പുതിയ പതിപ്പ് വിപണിയില്‍. റാപിഡ് റൈഡർ പ്ലസ് എന്നു പേരുള്ള സെഡാന് 7.99 ലക്ഷം രൂപയാണു എക്സ് ഷോറൂം വില.
ഒരു ലീറ്റർ ടി എസ് ഐ പെട്രോൾ എൻജിനാണ് ഈ വാഹനത്തിന്‍റെ ഹൃദയം. ഈ എൻജിന് 110 പി എസ് വരെ കരുത്തും 175 എൻ എം ടോർക്കും സൃഷ്ടിക്കാനാവും. ആറു സ്പീഡ് മാനുവൽ ഗീയർബോക്സാണു ട്രാൻസ്മിഷൻ. ശേഷിയേറിയ 1.6 ലീറ്റർ എം പി ഐ പെട്രോൾ എൻജിനെ അപേക്ഷിച്ച് അഞ്ചു ശതമാനത്തോളം അധിക കരുത്താണ് ഈ ടി എസ് ഐ എൻജിൻ സൃഷ്ടിക്കുക. ടോർക്കിലാവട്ടെ 14% ആണു വർധന. കരുത്തും ടോർക്കും ഉയരുന്നതിനൊപ്പം ഇന്ധനക്ഷമതയും 23% കൂടി. ലീറ്ററിന് 18.97 കിലോമീറ്ററാണു റാപിഡ് റൈഡർ പ്ലസിനു സ്കോഡ ഓട്ടോ വാഗ്ദാനം ചെയ്യുന്ന ഇന്ധനക്ഷമത.
സ്‍മാര്‍ട് ലിങ്ക് സാങ്കേതികവിദ്യയുടെ പിൻബലമുള്ള 16.51 സെന്റീ മീറ്റർ കളർ ടച് സ്ക്രീൻ ഇൻഫൊടെയ്ൻമെന്റ് സംവിധാനം വാഹനത്തിലുണ്ട്. ക്ലൈമട്രോണിക് ടെക്നോളജിക്കൊപ്പം പിന്നിൽ ക്രമീകരിക്കാവുന്ന വിധത്തിലുള്ള ഇരട്ട എ സി വെന്റും 12 വോൾട്ട് പവർ സോക്കറ്റുമുണ്ട്.
അത്യാധുനിക സാങ്കേതികവിദ്യയുടെ പിൻബലമുള്ള ഒരു ലീറ്റർ ടി എസ് ഐ പെട്രോൾ എൻജിൻ സഹിതമുള്ള പുത്തൻ ‘റാപിഡ്’ ശ്രേണി വിപുലീകരിച്ചു വരികയാണെന്ന് സ്കോഡ ഓട്ടോ ഇന്ത്യ ബ്രാൻഡ് ഡയറക്ടർ സാക് ഹൊളിസ് പറയുന്നു. മികച്ച കരുത്തിന്റെയും തകർപ്പൻ ഇന്ധനക്ഷമതയുടെയും സംഗമമാണ് ഈ പുതിയ എൻജിനെന്നും അദ്ദേഹം വ്യക്തമാക്കി.
കാൻഡി വൈറ്റ്, കാർബൺ സ്റ്റീൽ, ബ്രില്യന്റ് സിൽവർ, ടോഫി ബ്രൗൺ എന്നിങ്ങനെ നാലു നിറങ്ങളിലാണു ‘റാപിഡ് റൈഡർ പ്ലസ്’ വിപണിയില്‍ എത്തുക.