ഇന്ത്യൻ കമ്പനികളുടെ സഹായത്തോടെ തകർച്ചയെ അതിജീവിച്ച ചില ലോകോത്തര വാഹന ബ്രാൻഡുകൾ

ഇന്ത്യയുടെ ഓട്ടോമൊബൈൽ വ്യവസായം ആഗോളതലത്തിൽ ശക്തി തെളിയിക്കുകയാണ്. ടാറ്റ മോട്ടോഴ്‌സ് ജാഗ്വാർ ലാൻഡ് റോവറിനെയും, ബജാജ് ഓട്ടോ കെടിഎമ്മിനെയും, ഐഷർ മോട്ടോഴ്‌സ് റോയൽ എൻഫീൽഡിനെയും പോലുള്ള അന്താരാഷ്ട്ര ബ്രാൻഡുകളെ ഏറ്റെടുത്ത കഥയാണിത്. 

ഇന്ത്യയുടെ ഓട്ടോമൊബൈൽ വ്യവസായം ലോകത്തിലെ മൂന്നാമത്തെ വലിയ വിപണിയായി മാറുകയാണ്. ഇതിനെക്കുറിച്ച് സംസാരിക്കുമ്പോൾ സാധാരണയായി ശ്രദ്ധ കേന്ദ്രീകരിക്കുന്നത് അതിന്റെ അതിവേഗം വളരുന്ന വിൽപ്പനയിലും വികസനത്തിലുമാണ്. എന്നാൽ ഈ ഘട്ടത്തിൽ രാജ്യത്തെ മാത്രമല്ല, ആഗോളതലത്തിൽ പ്രധാന ബ്രാൻഡുകളെയും പുനർനിർവചിക്കുന്ന ഇന്ത്യൻ ഓട്ടോ കമ്പനികളെക്കുറിച്ച് പരാമർശിക്കേണ്ടതും പ്രധാനമാണ്. ആഗോള വിപണിയിൽ ഇന്ത്യയുടെ ശക്തിയുടെയും സാങ്കേതിക വൈദഗ്ധ്യത്തിന്റെയും ഉദാഹരണങ്ങളായി ഈ കമ്പനികൾ ഇപ്പോൾ മാറിയിരിക്കുന്നു. ഇതാ ഇന്ത്യൻ കമ്പനികളുടെ പിന്തുണയോടെ തക‍ർച്ചയിൽ നിന്നും രക്ഷപ്പെടുകയും ശക്തിനേടുകയും ചെയ്ത അത്തരം അഞ്ച് അന്താരാഷ്ട്ര ബ്രാൻഡുകളെക്കുറിച്ച് അറിയാം.

ജാഗ്വാർ ലാൻഡ് റോവർ - ടാറ്റ മോട്ടോഴ്‌സ്

2008-ൽ ബ്രിട്ടീഷ് ആഡംബര കാർ നിർമ്മാതാക്കളായ ജാഗ്വാർ ലാൻഡ് റോവറിനെ ( JLR) ടാറ്റ മോട്ടോഴ്‌സ് ഏറ്റെടുത്തതാണ് ഇന്ത്യയിലെ ഓട്ടോമൊബൈൽ ലോകത്തിലെ ഏറ്റവും പ്രശസ്‍തമായ ഏറ്റെടുക്കലുകളിൽ ഒന്ന്. അതിനുശേഷം, ടാറ്റ ഗ്രൂപ്പിന്റെ ശിക്ഷണത്തിൽ ആഡംബര ബ്രാൻഡ് ശക്തിയിൽ നിന്ന് ശക്തിയിലേക്ക് വളർന്നു. ഇപ്പോൾ 2025-ൽ, അത് പൂർണ്ണമായും സംയോജിതവും വിജയകരവുമായ ഒരു ബ്രാൻഡായി പ്രവർത്തിക്കുന്നു.

കെടിഎമ്മും ഹസ്‌ക്‌വർണയും : ബജാജ് ഓട്ടോ

യൂറോപ്യൻ ഇരുചക്ര വാഹന കമ്പനികളായ കെടിഎമ്മും ഹസ്‌ക്‌വർണയും സ്‌പോർട്‌സ് ബൈക്കുകൾക്ക് ലോകമെമ്പാടും പ്രശസ്തമാണ് . മുമ്പ് കെടിഎമ്മിൽ ബജാജ് ഓട്ടോയ്ക്ക് ഏതാണ്ട് തുല്യമായ ഓഹരി പങ്കാളിത്തമുണ്ടായിരുന്നു. എന്നാൽ 2025 മെയ് മാസത്തിൽ, പിയറർ ബജാജ് എജി (പിബിഎജി) യിൽ ബജാജ് നിയന്ത്രണ ഓഹരി സ്വന്തമാക്കി . കെടിഎം, ഹസ്‌ക്‌വർണ, ഗ്യാസ്‌ഗാസ് ബ്രാൻഡുകൾ ബജാജ് സ്വന്തമാക്കി . ഇന്ന് ഈ രണ്ട് ബ്രാൻഡുകൾക്കുമായി ബജാജ് ഓട്ടോ മിക്ക ബൈക്കുകളും ഇന്ത്യയിൽ നിർമ്മിക്കുകയും ലോകമെമ്പാടുമുള്ള നിരവധി രാജ്യങ്ങളിലേക്ക് കയറ്റുമതി ചെയ്യുകയും ചെയ്യുന്നു.

റോയൽ എൻഫീൽഡ് - ഐഷർ മോട്ടോഴ്‌സ്

ഐഷർ മോട്ടോഴ്‌സ് , ഒരുകാലത്ത് ബ്രിട്ടീഷ് ബ്രാൻഡായിരുന്ന റോയൽ എൻഫീൽഡ് ബ്രാൻഡിനെ പുനരുജ്ജീവിപ്പിക്കുകയും ഇന്ന് അതിനെ ലോകപ്രശസ്ത ബ്രാൻഡാക്കി മാറ്റുകയും ചെയ്തു. റോയൽ എൻഫീൽഡ് നിലവിൽ ആഗോള ഇടത്തരം മോട്ടോർസൈക്കിൾ വിപണിയിലെ ഒരു പ്രധാന കമ്പനിയാണ്. ഓരോ മോട്ടോർസൈക്കിളും ചെന്നൈയിൽ നിർമ്മിച്ച് യൂറോപ്പിലേക്കും വടക്കേ അമേരിക്കയിലേക്കും കയറ്റുമതി ചെയ്യുന്നു. 1994 ൽ നടന്ന ഈ ഏറ്റെടുക്കൽ ഇന്നും വളർന്നുകൊണ്ടിരിക്കുന്നു.

ജാവ , യെസ്‍ഡി , ബിഎസ്എ- മഹീന്ദ്രയുടെ പിന്തുണയുള്ള ക്ലാസിക് ലെജൻഡ്‌സിന് കീഴിൽ

ജാവ , യെസ്ഡി , ബിഎസ്എ തുടങ്ങിയ പഴയതും എന്നാൽ ഐക്കണിക് മോട്ടോർസൈക്കിൾ ബ്രാൻഡുകളെ പുനരുജ്ജീവിപ്പിക്കുക എന്ന ലക്ഷ്യത്തോടെ 2015 ൽ ക്ലാസിക് ലെജൻഡ്‌സ് സ്ഥാപിതമായി. ഒരു വർഷത്തിനുശേഷം, 2016 ൽ, മഹീന്ദ്ര & മഹീന്ദ്ര കമ്പനിയിൽ 60 ശതമാനം ഓഹരികൾ സ്വന്തമാക്കുകയും നിയന്ത്രണം ഏറ്റെടുക്കുകയും ചെയ്തു . ഈ നീക്കം മഹീന്ദ്രയെ രാജ്യത്ത് അതിവേഗം വളരുന്ന റെട്രോ ബൈക്ക് വിപണിയിൽ പ്രവേശിക്കാൻ അനുവദിച്ചു . അതിനുശേഷം, ക്ലാസിക് ലെജൻഡ്‌സ് ഈ മൂന്ന് ബ്രാൻഡുകളും ഇന്ത്യ, യുകെ , മറ്റ് യൂറോപ്യൻ വിപണികളിൽ വിജയകരമായി പുനരാരംഭിച്ചു.

നോർട്ടൺ മോട്ടോർസൈക്കിൾ കമ്പനി – ടിവിഎസ് മോട്ടോർ കമ്പനി

2020 ൽ ബ്രിട്ടീഷ് മോട്ടോർസൈക്കിൾ കമ്പനിയായ നോർട്ടൺ കടക്കെണിയിലായപ്പോൾ , ഇന്ത്യൻ ഇരുചക്ര വാഹന ഭീമനായ ടിവിഎസ് മോട്ടോർ കമ്പനി അവരെ രക്ഷപ്പെടുത്തി 16 മില്യൺ പൗണ്ടിന് ( അന്ന് 153 കോടി രൂപ) സ്വന്തമാക്കി . അതിനുശേഷം, നോർട്ടണും ടിവിഎസും നിരവധി മോഡലുകളുടെ പണിപ്പുരയിലാണ്. ആഗോളതലത്തിൽ ഒരു പുതിയ മാസ് - മാർക്കറ്റ് മോട്ടോർസൈക്കിൾ ലോഞ്ച് ഉടൻ നടക്കും.