വിസ്‍മയിപ്പിക്കും സുരക്ഷാ ഫീച്ചറുകളുമായി ടാറ്റാ ഹാരിയർ ഇവി ഡീലർഷിപ്പുകളിൽ എത്തിത്തുടങ്ങി

ടാറ്റ മോട്ടോഴ്‌സിന്റെ പുതിയ ഫ്ലാഗ്ഷിപ്പ് ഇലക്ട്രിക് എസ്‌യുവി ഹാരിയർ ഇവിക്ക് ഇന്ത്യൻ വിപണിയിൽ വൻ പ്രതികരണം. 

ടാറ്റ മോട്ടോഴ്‌സിന്റെ പുതിയ ഫ്ലാഗ്ഷിപ്പ് ഇലക്ട്രിക് എസ്‌യുവിയായ ഹാരിയർ ഇവിക്ക് ഇന്ത്യൻ വിപണിയിൽ വൻ പ്രതികരണമാണ് ലഭിക്കുന്നത്. ജൂലൈ രണ്ടുമുതൽ കമ്പനി ഹരിയർ ഇവിയുടെ ബുക്കിംഗ് ആരംഭിച്ചു. വെറും 24 മണിക്കൂറിനുള്ളിൽ 10,000 ത്തിൽ അധികം ബുക്കിംഗുകൾ വാഹനത്തിന് ലഭിച്ചു. 21,000 രൂപയാണ് ബുക്കിംഗ് ടോക്കൺ തുക . ഇപ്പോഴിതാ ഈ എസ്‌യുവി ഡീലർഷിപ്പുകളിൽ എത്തിത്തുടങ്ങി. വരും ദിവസങ്ങളിൽ ഇതിന്റെ ഡെലിവറി ആരംഭിച്ചേക്കും. 21.49 ലക്ഷം രൂപ മുതൽ 30.23 ലക്ഷം രൂപ വരെയാണ് ഹാരിയർ ഇവിയുടെ എക്‌സ്-ഷോറൂം വില. ഒറ്റ ചാർജിൽ 622 കിലോമീറ്റർ സഞ്ചരിക്കാൻ കഴിയുമെന്ന് കമ്പനി അവകാശപ്പെടുന്നു. വമ്പൻ സുരക്ഷാ ഫീച്ചറുകൾ ഉൾപ്പെടെ ന്യൂജെൻ ഫീച്ചറകളുമായി എത്തുന്ന ടാറ്റാ ഹാരിയർ ഇവിയുടെ ചില വിശേഷങ്ങൾ അറിയാം.

ഹരിയർ ഇവിയിലെ പുതിയ 540-ഡിഗ്രി ക്യാമറ ഫംഗ്ഷൻ 360-ഡിഗ്രി സറൗണ്ട് വ്യൂ മോണിറ്റർ സിസ്റ്റത്തിന് ഒരു അധിക ആംഗിൾ ചേർക്കുന്നു. ഇത് കാറിനടിയിലെ കാഴ്ചകളും കാണിക്കുന്നു. ഈ പുതിയ ആംഗിൾ ട്രാൻസ്പരന്റ് മോഡിൽ സജീവമാക്കുന്നു. ഇത് ഡ്രൈവറെ ഓഫ്-റോഡ് ഭൂപ്രദേശങ്ങളെ നേരിടാനും വലിയ കുഴികളിലൂടെ കടന്നുപോകാനും സഹായിക്കുന്നു. മാസ്-മാർക്കറ്റ് സെഗ്‌മെന്റിൽ ഡ്യുവൽ മോട്ടോർ ഓൾ-വീൽ-ഡ്രൈവ് സജ്ജീകരണം ഉൾക്കൊള്ളുന്ന ആദ്യത്തെ ഇലക്ട്രിക് കാറായി ഹാരിയർ ഇവി മാറി. ഓരോ ആക്‌സിലിലും ഒരു ഇലക്ട്രിക് മോട്ടോർ ലഭിക്കുന്നു. ബൂസ്റ്റ് മോഡ് ഉപയോഗിച്ച്, ഹാരിയർ ഇവിക്ക് വെറും 6.3 സെക്കൻഡിനുള്ളിൽ 0-100 കിലോമീറ്റർ വേഗത കൈവരിക്കാൻ കഴിയും.

സ്റ്റാൻഡേർഡ് ഹാരിയറിൽ നോർമൽ, റഫ്, വെറ്റ് എന്നിങ്ങനെ മൂന്ന് ടെറൈൻ മോഡുകൾ മാത്രമേയുള്ളൂ. ഇലക്ട്രിക് ഹാരിയറിൽ ടാറ്റ മോട്ടോഴ്‌സ് നോർമൽ, മഡ് റട്ട്‌സ്, റോക്ക് ക്രാൾ, സാൻഡ്, സ്നോ/ഗ്രാസ്, കസ്റ്റം മോഡ് എന്നിവയുൾപ്പെടെ ആറ് മൾട്ടി-ടെറൈൻ മോഡുകൾ വാഗ്ദാനം ചെയ്തിട്ടുണ്ട്. ഈ മോഡുകൾ പവർ ഡെലിവറി, ട്രാക്ഷൻ കൺട്രോൾ സിസ്റ്റം, ത്രോട്ടിൽ റെസ്‌പോൺസ് എന്നിവ മാറ്റുന്നതിലൂടെ എസ്‌യുവിക്ക് ബുദ്ധിമുട്ടുള്ള ഭൂപ്രദേശങ്ങളെ നേരിടാൻ കഴിയും.

ടാറ്റ മോട്ടോഴ്‌സ് പുതിയ 14.5 ഇഞ്ച് ഇൻഫോടെയ്ൻമെന്റ് സിസ്റ്റം ഹാരിയർ ഇവിയിൽ നൽകി. ഇത് ടാറ്റ കാറുകളിൽ ഏറ്റവും വലുതാണ്. സാംസങ് നിർമ്മിച്ച ഒരു നിയോ ക്യുഎൽഇഡി ഡിസ്‌പ്ലേയാണിത്, ഇത് ഉപഭോക്താക്കൾക്ക് ഷാർപ്പായിട്ടുള്ളതും വ്യക്തവുമായ കാഴ്ചാനുഭവം നൽകുന്നു. ഹാരിയർ ഇവിയിൽ ഷാർക്ക് ഫിൻ ആന്റിനയിൽ ഒരു അധിക ക്യാമറയുണ്ട്. ഈ ക്യാമറയിൽ നിന്ന് വരുന്ന ഫീഡ് ഡിജിറ്റൽ ഐആർവിഎമ്മിൽ ദൃശ്യമാകുന്നത് കാറിന് പിന്നിലുള്ളത് എന്താണെന്ന് വ്യക്തമായ ചിത്രം നൽകുന്നു. ഇതിന് ഒരു റെക്കോർഡിംഗ് ഫംഗ്ഷനും ഉണ്ട്, കൂടാതെ മികച്ച സുരക്ഷയ്ക്കായി ഒരു ഡാഷ്‌ക്യാമായും പ്രവർത്തിക്കുന്നു.

ഭാരത് NCAP-യിൽ ഇതിന് 5-സ്റ്റാർ സുരക്ഷാ റേറ്റിംഗ് ലഭിച്ചു. മുതിർന്നവരുടെ സംരക്ഷണത്തിൽ 32/32 ഉം കുട്ടികളുടെ സംരക്ഷണത്തിൽ 45/49 ഉം സ്കോർ ചെയ്തു. ടാറ്റ ഹാരിയർ ഇവി കമ്പനി നിരവധി ദുഷ്‍കരമായ സാഹചര്യങ്ങളിൽ പരീക്ഷിച്ചു. വയനാട്ടി എലിഫെന്‍റി റോക്ക് പാറക്കെട്ടുകളിലൂടെയുള്ള വാഹനത്തിന്‍റെ ഓഫ്‌റോഡിംഗ് വീഡിയോ വൈറലായിരുന്നു. ഹാരിയർ ഇവി ടാങ്ക് വലിക്കുന്നതും കുത്തനെയുള്ള കുന്നിൻ മുകളിലും ചെളിയും വെള്ളവും നിറഞ്ഞ റോഡുകളിലും അനായാസം സഞ്ചരിക്കുന്നതുമായി വീഡിയോകളും പുറത്തുവന്നിരുന്നു. മൊത്തത്തിൽ, ഒരു ഇലക്ട്രിക് കാറിന് ചെയ്യാൻ എളുപ്പമല്ലാത്ത നേട്ടങ്ങളുമായാണ് ഹാരിയർ ഇവി എത്തുന്നത്.