Tata Motors : ഔറംഗബാദ് മിഷൻ ഗ്രീൻ മൊബിലിറ്റിയിൽ നിന്ന് ടാറ്റയ്ക്ക് 250 ഇവി ഓർഡറുകള്‍

ഔറംഗബാദ് മിഷൻ ഗ്രീൻ മൊബിലിറ്റിയിൽ (Aurangabad Mission Green Mobility) 250 ഇവികൾ വിതരണം ചെയ്യുന്നതിനുള്ള ഓർഡർ ലഭിച്ചതായി ടാറ്റ മോട്ടോഴ്‌സ് (Tata Motors) അറിയിച്ചു. ഇതിൽ ആകെ 175 നെക്സോണ്‍ ഇവികളും 75 ടിഗോര്‍ ഇവികളും ഉൾപ്പെടുന്നു. ഓർഡർ ഡെലിവറി ചെയ്യുന്നതിന്റെ ആദ്യ ഘട്ടത്തിൽ ടാറ്റ മോട്ടോഴ്‌സ് 70 നെക്‌സോൺ ഇവികളും 31 ടിഗോർ ഇവികളും ഡെലിവറി ചെയ്‍തിട്ടുണ്ട്. ശേഷിക്കുന്ന വാഹനങ്ങൾ രണ്ടാം ഘട്ടത്തിൽ എത്തിക്കാനാണ് ലക്ഷ്യമിടുന്നത് എന്നാണ് റിപ്പോര്‍ട്ടുകള്‍. 

30.2kWh ലിഥിയം -അയൺ ബാറ്ററി പായ്ക്കാണ് ടാറ്റ നെക്സോണ്‍ ഇവിക്ക് കരുത്തേകുന്നത്. വാഹനത്തിന് 312 കിലോമീറ്റർ റേഞ്ച് ലഭിക്കും. അതേസമയം, ടാറ്റ ടിഗോർ EV 26kWh ബാറ്ററി പാക്കിൽ നിന്ന് പവർ എടുക്കുന്നു. കൂടാതെ 306 കിലോമീറ്റർ സർട്ടിഫൈഡ് റേഞ്ചുമുണ്ട്. 

ഔറംഗബാദ് മിഷൻ ഗ്രീൻ മൊബിലിറ്റി (AMGM) അംഗങ്ങൾ വ്യക്തിഗത സംഭാവന ചെയ്യുന്നവർ എന്ന നിലയിൽ മാത്രമല്ല, ഹരിതവും ശുദ്ധവുമായ ഭാവി സ്വീകരിക്കുന്നത് സന്തോഷകരമാണെന്ന് ചടങ്ങിൽ സംസാരിച്ച ടാറ്റ മോട്ടോഴ്‌സ് പാസഞ്ചർ വെഹിക്കിൾസ് ലിമിറ്റഡിന്റെയും ടാറ്റ പാസഞ്ചർ ഇലക്ട്രിക് മൊബിലിറ്റി ലിമിറ്റഡിന്റെയും മാനേജിംഗ് ഡയറക്ടർ ശൈലേഷ് ചന്ദ്ര പറഞ്ഞു. എ‌എം‌ജി‌എമ്മുമായി സഹകരിക്കുന്നതിൽ തങ്ങൾക്ക് അഭിമാനമുണ്ട് എന്നും കൂടുതൽ നല്ല ലക്ഷ്യങ്ങൾക്കായി പ്രവർത്തിക്കുമെന്നും അദ്ദേഹം വ്യക്തമാക്കി. 

"250 ടാറ്റ ഇവികളുടെ ഓർഡറിന് എഎംജിഎമ്മിനെ അഭിനന്ദിക്കാനും നന്ദി പറയാനും ഞാൻ ആഗ്രഹിക്കുന്നു. ഇത് മറ്റ് സംസ്ഥാനങ്ങൾക്കും മാതൃകയാകും. ഇന്ത്യയിൽ ഇലക്‌ട്രിക് മൊബിലിറ്റിയുടെ ലഭ്യത വർദ്ധിപ്പിക്കുന്നതിനും മറ്റുമായി ടാറ്റ മോട്ടോഴ്‌സ് നിരന്തരം പ്രവർത്തിക്കുന്നു. രാജ്യത്തെ ഇലക്ട്രിക്കിലേക്ക് അണിനിരത്തുമ്പോൾ കൂടുതൽ ആളുകൾ ഈ ഹരിത തരംഗത്തിൽ ചേരുമെന്ന് ഞങ്ങൾ പ്രതീക്ഷിക്കുന്നു.." അദ്ദേഹം കൂട്ടിച്ചേര്‍ത്തു.

നെക്സോണ്‍ ഇവിയുടെ വില കൂട്ടി ടാറ്റ; ഇതാ പുതിയ വിലവിവര പട്ടിക

ടാറ്റ മോട്ടോഴ്‌സ് (Tata Motors) നെക്സോണ്‍ ഇവിയുടെ (Nexon EV) വില കൂട്ടി. 25,000 രൂപയോളമാണ് കൂട്ടിയതെന്ന് കാര്‍ വാലെ റിപ്പോര്‍ട്ട് ചെയ്യുന്നു. മാത്രമല്ല, കമ്പനി അതിന്റെ ഉൽപ്പന്ന ശ്രേണിയിലെ മറ്റ് തിരഞ്ഞെടുത്ത മോഡലുകളുടെയും വേരിയന്റുകളുടെയും വില വർധിപ്പിച്ചിട്ടുണ്ട് എന്നാണ് റിപ്പോര്‍ട്ടുകള്‍.

ടാറ്റ  നെക്സോണ്‍ ഇവിയുടെ വേരിയൻറ് ലൈനപ്പിലുടനീളം 25,000 രൂപയുടെ ഏകീകൃത വില വർദ്ധനവ് ബാധകമാണ് . XM, XZ+, XZ+ Lux, XZ+ Dark Edition, XZ+ Lux Dark എഡിഷൻ എന്നിവയുൾപ്പെടെ അഞ്ച് വേരിയന്റുകളിൽ മോഡൽ നിലവിൽ ലഭ്യമാണ്. 

30.2kWh ബാറ്ററി പാക്കാണ് ടാറ്റ നെക്‌സോൺ ഇവിയുടെ ഹൃദയം. പരമാവധി 125bhp പവർ ഔട്ട്‌പുട്ടും 245Nm ടോർക്കും ഈ എഞ്ചിന്‍ ഉത്പാദിപ്പിക്കുന്നു. ഡാർക്ക് എഡിഷൻ പതിപ്പിന് പുറമെ ടീൽ ബ്ലൂ, ഗ്ലേസിയർ വൈറ്റ്, മിഡ്‌നൈറ്റ് ബ്ലാക്ക് എന്നിവ ഉൾപ്പെടുന്ന മൂന്ന് നിറങ്ങളിൽ മോഡൽ വാഗ്‍ദാനം ചെയ്യുന്നു. 

നെക്സോണ്‍ ഇവിയുടെ (എക്സ്-ഷോറൂം) പുതിയ വേരിയൻറ് തിരിച്ചുള്ള വിലകൾ ഇവയാണ്:

Nexon EV XM: 14.54 ലക്ഷം രൂപ

Nexon EV XZ+: 15.95 ലക്ഷം രൂപ

Nexon EV XZ+ Lux: Rs 16.95 lakh

Nexon EV XZ+ Dark edition: Rs 16.29 lakh

Nexon EV XZ+ Lux Dark edition: Rs 17.15 lakh

രാജ്യത്തെ ഇലക്ട്രിക് വാഹന ശ്രേണിയിൽ വിപ്ലവം സൃഷ്‍ടിച്ചുകൊണ്ട് 2020 ജനുവരിയിലാണ് ടാറ്റ നെക്സോണ്‍ ഇവി ഇന്ത്യന്‍ വിപണിയില്‍ എത്തുന്നത്. തുടക്കം മുതല്‍ വിപണിയില്‍ മികച്ച പ്രതികരണമുള്ള വാഹനം 2020 ജനുവരിയിൽ ലോഞ്ച് ചെയ്‍തതിന് ശേഷം ഇന്ത്യയിൽ 13,500 യൂണിറ്റുകള്‍ വിറ്റഴിച്ചതായി 2022 ജനുവരയില്‍ ടാറ്റ മോട്ടോഴ്‌സ് പ്രഖ്യാപിച്ചിരുന്നു. 

വിപണിയിൽ അവതരിപ്പിച്ചതുമുതൽ, നെക്സോണ്‍ ഇവി ഇന്ത്യയിലെ ഏറ്റവും താങ്ങാനാവുന്ന ഇലക്ട്രിക് എസ്‌യുവിയാണ്. വിവിധ ഇന്ത്യൻ സംസ്ഥാനങ്ങൾ വാഗ്‍ദാനം ചെയ്യുന്ന ഒന്നിലധികം സബ്‌സിഡികളും ആനുകൂല്യങ്ങളും കൂടി ലഭിച്ചതോടെ എസ്‌യുവി ഇവി വിപണിയിൽ ശക്തമായ മുന്നേറ്റമാണ് വാഹനം നേടിയത്. നെക്സോണ്‍ ഇവിയുടെ മിക്ക വകഭേദങ്ങളും നിലവിൽ നിരവധി സ്ഥലങ്ങളിൽ ആറ് മാസത്തിലധികം കാത്തിരിപ്പ് കാലയളവ് നൽകുന്നുണ്ടെന്ന് ഡീലർമാരെ ഉദ്ദരിച്ച് ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നു. ഭൂരിഭാഗം ബുക്കിംഗുകളും മഹാരാഷ്ട്രയിൽ നിന്നാണ് എന്നാണ് റിപ്പോര്‍ട്ടുകള്‍. സംസ്ഥാന സര്‍ക്കാര്‍ ഇലക്ട്രിക്ക് വാഹനങ്ങള്‍ക്കായി പ്രഖ്യാപിച്ച സബ്‍സിഡികളും മറ്റുമാണ് ഈ വില്‍പ്പനയ്ക്ക് കാരണം എന്നാണ് റിപ്പോര്‍ട്ടുകള്‍.  ആനുകൂല്യങ്ങൾ 2021 ഡിസംബർ 31-ന് അവസാനിക്കാനിരിക്കെ, അവ 2022 മാർച്ച് 31 വരെ നീട്ടാൻ സംസ്ഥാന സർക്കാർ തീരുമാനിച്ചു. ഇത് നെക്‌സോൺ ഇവിയുടെ കാത്തിരിപ്പ് കാലയളവ് വീണ്ടും വർദ്ധിപ്പിച്ചു.

Source : Car Wale