"ഇവിടെ മാത്രമല്ല പിടി.." ആഗോളതലത്തിലും കുതിച്ചുപാഞ്ഞ് ഇന്ത്യയുടെ സ്വന്തം ടാറ്റ!

കമ്പനിയുടെ ആഗോള വിൽപ്പന ജൂലൈ-സെപ്റ്റംബർ പാദത്തിൽ ഏകദേശം 24% വർദ്ധനവ് രേഖപ്പെടുത്തിയതായി ഇന്ത്യാ ടുഡേ റിപ്പോര്‍ട്ട് ചെയ്യുന്നു

ആഗോളതലത്തിലും വമ്പന്‍ നേട്ടവുമായി ഇന്ത്യൻ കമ്പനിയായ ടാറ്റ മോട്ടോഴ്‍സ് (Tata Motors). കമ്പനിയുടെ ആഗോള വിൽപ്പന ജൂലൈ-സെപ്റ്റംബർ പാദത്തിൽ ഏകദേശം 24% വർദ്ധനവ് രേഖപ്പെടുത്തിയതായി ഇന്ത്യാ ടുഡേ റിപ്പോര്‍ട്ട് ചെയ്യുന്നു.

ചിപ്പുകളുടെ അഭാവം ഉണ്ടായിരുന്നിട്ടും, കമ്പനിയുടെ ജാഗ്വാർ ലാൻഡ് റോവർ (ജെഎൽആർ) ഉൾപ്പെടെയുള്ള പല വാഹനങ്ങളുടേയും വിൽപ്പന ഈ കാലയളവിൽ മികച്ചതായിരുന്നു എന്നാണ് റിപ്പോര്‍ട്ടുകള്‍.

കാറുകളും വാണിജ്യ വാഹനങ്ങളും കമ്പനിയുടെ വിൽപ്പന വർദ്ധിപ്പിക്കുന്നതിൽ ഒരു പ്രധാന പങ്ക് വഹിച്ചിട്ടുണ്ട്. ഈ കാലയളവിൽ കമ്പനി 2,51,689 യൂണിറ്റുകളാണ് വിൽപ്പന നടത്തിയത്. കഴിഞ്ഞ വർഷം ഇതേ പാദത്തിൽ കമ്പനി 2,02,873 യൂണിറ്റുകളുടെ വിൽപ്പനയാണ് നടത്തിയത്.

ജൂലൈ-സെപ്റ്റംബർ മാസത്തിൽ കമ്പനി 1,62,634 യൂണിറ്റ് പാസഞ്ചർ വാഹനങ്ങളാണ് വിൽപ്പന നടത്തിയത്. കഴിഞ്ഞ വർഷം ഇതേ കാലയളവിൽ പാസഞ്ചർ വാഹനങ്ങളുടെ മൊത്തം വിൽപ്പനയേക്കാൾ 10% കൂടുതലാണ് ഇത്. അതേ സമയം, ഈ വർഷം ഏപ്രിൽ-ജൂൺ മാസങ്ങളിൽ ടാറ്റ മോട്ടോഴ്സിന്റെ മൊത്തം വിൽപ്പന 2,14,250 യൂണിറ്റായിരുന്നു. 2020 ലെ ഇതേ കാലയളവിനെ അപേക്ഷിച്ച്  17% വർദ്ധനവാണ് ഇത്.

ടാറ്റ മോട്ടോഴ്‍സിന്റെ കീഴിലുള്ള ആഡംബര കാർ യൂണിറ്റായ ജാഗ്വാർ ലാൻഡ് റോവറിന്റെ വിൽപ്പനയും ഈ കാലയളവിൽ മികച്ചതായിരുന്നു. ഈ കാലയളവിൽ കമ്പനി 78,251 ജെഎൽആർ കാറുകളാണ് വിറ്റത് എന്നാണ് കണക്കുകള്‍. ഇതിൽ, ജാഗ്വാറിന്റെ വിൽപ്പന 13,944 യൂണിറ്റുകളും ലാൻഡ് റോവറിന്റെ വിൽപ്പന 64,307 യൂണിറ്റുകളുമാണ്. ചിപ്പുകളുടെ ആഗോള ക്ഷാമത്തിന് ഇടയിലാണ് കമ്പനിയുടെ വിൽപ്പനയിലെ ഈ വളർച്ച എന്നതാണ് ശ്രദ്ധേയം. 

രാജ്യത്തെ ഏറ്റവും വലിയ ഓട്ടോ കമ്പനികളിൽ ഒന്നാണ് ടാറ്റ മോട്ടോഴ്സ്. അടുത്തിടെ, കമ്പനി ഇലക്ട്രിക് വാഹനത്തിലും എസ്‌യുവി വിഭാഗത്തിലും ശക്തിപ്പെട്ടു. രാജ്യത്ത് ഏറ്റവും കൂടുതൽ വിൽക്കപ്പെടുന്ന ഇലക്ട്രിക് വാഹനങ്ങളിൽ ഒന്നാണ് ടാറ്റയുടെ നെക്സോൺ ഇവി.