വരും വർഷങ്ങളിൽ ഇലക്ട്രിക് ഉൽപ്പന്ന പോർട്ട്‌ഫോളിയോ വിപുലീകരിക്കാനുള്ള പദ്ധതി വെളിപ്പെടുത്തിയിരിക്കുകയാണ് 'ലോക ഇവി ദിനത്തിൽ' ടാറ്റ മോട്ടോഴ്‌സ്
വരും വർഷങ്ങളിൽ ഇലക്ട്രിക് ഉൽപ്പന്ന പോർട്ട്‌ഫോളിയോ വിപുലീകരിക്കാനുള്ള പദ്ധതി വെളിപ്പെടുത്തിയിരിക്കുകയാണ് 'ലോക ഇവി ദിനത്തിൽ' ടാറ്റ മോട്ടോഴ്‌സ്. വിവിധ സെഗ്‌മെന്റുകളിലും ബോഡി സ്‌റ്റൈലുകളിലും താങ്ങാനാവുന്ന നിലകളിലുമായി 10 പുതിയ ഇലക്ട്രിക് വാഹനങ്ങൾ (ഇവി) അവതരിപ്പിക്കുമെന്ന് കമ്പനി സ്ഥിരീകരിച്ചു. പുതിയ ടാറ്റ ടിയാഗോ ഇലക്ട്രിക് ഹാച്ച്ബാക്ക് ഉടൻ തന്നെ നിരത്തുകളിലെത്താൻ പോകുന്ന ടാറ്റ ഇവികളിൽ ഒന്നായിരിക്കും. എന്നിരുന്നാലും, കാർ നിർമ്മാതാവ് അതിന്റെ ലോഞ്ച് തീയതി ഇതുവരെ വെളിപ്പെടുത്തിയിട്ടില്ല. ടാറ്റയില്‍ നിന്നുള്ള ഏറ്റവും ചെറിയ ഇലക്ട്രിക് ഓഫറായിരിക്കും ടിയാഗോ ഇവി.
2018 ഡൽഹി ഓട്ടോ എക്‌സ്‌പോയിൽ ആണ് ടാറ്റ ടിയാഗോ ഇലക്ട്രിക് അനാച്ഛാദനം ചെയ്യുന്നത്. അതേസമയം വരാനിരിക്കുന്ന മോഡൽ 2020-ന്റെ തുടക്കത്തിൽ അവതരിപ്പിച്ച ഫെയ്‌സ്‌ലിഫ്റ്റഡ് മോഡലിനെ അടിസ്ഥാനമാക്കിയുള്ളതായിരിക്കും. അതിന്റെ ഔദ്യോഗിക പവർട്രെയിൻ വിശദാംശങ്ങൾ ഇനിയും പ്രഖ്യാപിച്ചിട്ടില്ല. എങ്കിലും ടാറ്റ ടിയാഗോ ഇവിക്ക് 26kWh അല്ലെങ്കിൽ ടിഗോര്‍ ഇവിയിൽ നിന്ന് കടമെടുത്ത 30.2kWh ബാറ്ററി പാക്ക് നല്‍കിയേക്കാം. അല്ലെങ്കിൽ യഥാക്രമം നെക്സോണ്‍ ഇവിയിലെ ബാറ്ററി പാക്ക് ഇടംപടിക്കാനും സാധ്യതയുണ്ട്. ഒറ്റ ചാർജിൽ ഏകദേശം 300 കിലോമീറ്ററാണ് ഇതിന്റെ റേഞ്ച് പ്രതീക്ഷിക്കുന്നത്.
ലിഥിയം-അയൺ ബാറ്ററി പാക്കിനൊപ്പം സ്ഥിരമായ മാഗ്നറ്റ് സിൻക്രണസ് ഇലക്ട്രിക് മോട്ടോറും അടങ്ങുന്ന ടാറ്റയുടെ അഡ്വാൻസ്ഡ് സിപ്‌ട്രോൺ ഹൈ-വോൾട്ടേജ് ആർക്കിടെക്ചറാണ് ഇലക്ട്രിക് ഹാച്ച്ബാക്കിന്റെ സവിശേഷത. ലിഥിയം-അയൺ സെൽ ടിഗോർ ഇവിയിലും നെക്‌സോൺ ഇവിയിലും ചെയ്യുന്നതുപോലെ IP67 വാട്ടർ, ഡസ്റ്റ് പ്രൂഫിംഗ് മാനദണ്ഡങ്ങൾ പാലിക്കും.
ഇവി വിപണിയിൽ 88 ശതമാനം വിഹിതവുമായി കമ്പനി മുന്നേറുന്നുവെന്ന് ടാറ്റ മോട്ടോഴ്‌സ് പാസഞ്ചർ വെഹിക്കിൾസ് ലിമിറ്റഡ്, ടാറ്റ പാസഞ്ചർ ഇലക്ട്രിക് മൊബിലിറ്റി ലിമിറ്റഡ് എംഡി ശൈലേഷ് ചന്ദ്ര പറഞ്ഞു. നിലവിൽ, കാർ നിർമ്മാതാവിന്റെ ഇലക്ട്രിക്ക് വാഹന ഉൽപ്പന്ന നിരയിൽ ടിഗോര്‍ ഇവി, നെക്സോണ്‍ ഇവി എന്നിങ്ങനെ രണ്ട് മോഡലുകൾ ഉൾപ്പെടുന്നു. ഇവി മാർക്കറ്റ് വിപുലീകരണത്തിന്റെ അടുത്ത ഘട്ടത്തിൽ, ആവേശകരവും എന്നാൽ എളുപ്പമുള്ള ഡ്രൈവ്, നിശബ്ദ ക്യാബിൻ, ഉടമസ്ഥാവകാശത്തിന്റെ കുറഞ്ഞ ചിലവ് തുടങ്ങിയവയും ടാറ്റ വാഗ്ദാനം ചെയ്യുന്നു.