XUV700 : ട്രക്കിലിടിച്ച് തവിടുപൊടിയായിട്ടും ഈ വണ്ടിയിലെ യാത്രികര്‍ സുരക്ഷിതര്‍!

ഈ വാഹനത്തിന്‍റെ സുരക്ഷ വെറുംവാക്കല്ലെന്ന് വ്യക്തമാക്കുന്ന ഒരു വീഡിയോ ആണിപ്പോള്‍ സോഷ്യല്‍ മീഡിയയില്‍ വൈറലാകുന്നത്

പുതിയ മഹീന്ദ്ര XUV700-ന്റെ (Mahindra XUV700) ജനപ്രീതി പരസ്യമായ രഹസ്യമാണ്. ഗ്ലോബൽ എൻ-ക്യാപ്പിന്റെ (Global N-CAP) പഞ്ചനക്ഷത്ര റേറ്റിംഗ് നേടിയതിന് ശേഷം ഈ വാഹനത്തെ തേടി സുരക്ഷിത കാറുകൾക്കായി തിരയുന്ന രാജ്യത്തെ ധാരാളം ഉപഭോക്താക്കള്‍ എത്തിക്കൊണ്ടിരിക്കുകയാണ്.   XUV700ന്‍റെ സുരക്ഷ വെറുംവാക്കല്ലെന്ന് വ്യക്തമാക്കുന്ന ഒരു വീഡിയോ ആണിപ്പോള്‍ സോഷ്യല്‍ മീഡിയയില്‍ വൈറലാകുന്നത്. ഒരു പുതിയ മഹീന്ദ്ര XUV700 ഒരു ട്രക്കുമായി കൂട്ടിയിച്ചുള്ള അപകടത്തിന്‍റെ വീഡിയോ ആണിതെന്ന് കാര്‍ ടോഖ് റിപ്പോര്‍‌ട്ട് ചെയ്യുന്നു.

രാജസ്ഥാനിലെ ജോധ്പൂരിലാണ് ഞെട്ടിക്കുന്ന അപകടമുണ്ടായതെന്ന് പ്രതീക് സിംഗ് എന്ന വ്ലോഗറെ ഉദ്ദരിച്ച് കാര്‍ ടോഖ് റിപ്പോർട്ട് ചെയ്യുന്നു. ലഭ്യമായ വിവരങ്ങൾ അനുസരിച്ച്, മഹീന്ദ്ര XUV700നെ ഒരു ഫ്ലൈ ഓവറിൽ വച്ച് ഒരു ട്രക്ക് പെട്ടെന്ന് മറികടക്കുകയായിരുന്നു. തുടർന്ന് ട്രക്ക് റോഡിന്റെ മധ്യത്തിൽ പെട്ടെന്ന് ബ്രേക്ക് ചവിട്ടുകയായിരുന്നു.

XUV700 ന്റെ ഡ്രൈവർക്ക് കൃത്യസമയത്ത് പ്രതികരിക്കാൻ കഴിയാതെ വന്നതിനാൽ XUV700 ട്രക്കിന്റെ പിൻഭാഗത്ത് ഇടിക്കുകയായിരുന്നു. ട്രക്കിന് പിന്നിൽ ക്രാഷ്-ഗാർഡ് ഇല്ലായിരുന്നു, ഇത് XUV700 താഴെ വീഴാൻ കാരണമായി. ഒന്നിലധികം ഇംപാക്ട് പോയിന്റുകൾ ഉണ്ട്, XUV700-നുള്ള എ-പില്ലർ ലോഡിംഗ് ബേയ്ക്ക് നേരെ നേരിട്ട് തകർന്നു. തുടർന്നുള്ള സംഭവങ്ങളാണ് ചിത്രങ്ങൾ കാണിക്കുന്നത്. അപകടത്തിൽ വാഹനത്തിന്റെ ബോണറ്റ് തകരുകയും വാഹനത്തിന്റെ മുൻവശം സാരമായി തകരുകയും ചെയ്‍തു. അപകടത്തെത്തുടർന്ന് മുന്‍ഭാഗം പൂര്‍ണമായും തകര്‍ന്ന XUV700നെ മുന്നിൽ നിന്ന് തിരിച്ചറിയാന്‍ സാധിക്കുന്നില്ല.

കാറിന്റെ മുൻ എയർബാഗുകൾ തുറന്നിരിക്കുന്നതും ചിത്രങ്ങൾ കാണിക്കുന്നു. ആഘാതത്തില്‍ വാഹനത്തിന്‍റെ എ-പില്ലർ തകര്‍ന്നു. വാഹനത്തിന് ഒരു ADAS ഫീച്ചർ ഇല്ലായിരുന്നുവെന്ന് തോന്നുന്നു, അല്ലെങ്കിൽ ഓട്ടോമാറ്റിക് എമർജൻസി ബ്രേക്കിംഗ് ഈ കൂട്ടിയിടിയിൽ നിന്ന് കാറിനെ രക്ഷിക്കുമായിരുന്നു. അതേസമയം വാഹനത്തിലുണ്ടായിരുന്ന രണ്ട് യാത്രക്കാർ സുരക്ഷിതരാണ്. ഇവർക്ക് ചെറിയ ചില പരിക്കുകൾ പറ്റുകയും ആശുപത്രിയിൽ പ്രവേശിപ്പിക്കുകയും ചെയ്‍തിരുന്നു. രണ്ടുപേരെയും ഇപ്പോൾ ഡിസ്ചാർജ് ചെയ്‍തു എന്നാണ് റിപ്പോര്‍ട്ടുകള്‍.  മിക്ക ഇന്ത്യൻ ട്രക്കുകളിലും അണ്ടർറൺ ബാറുകൾ ഇല്ല എന്നതും ഈ സാഹചര്യത്തില്‍ ശ്രദ്ധിക്കേണ്ട കാര്യമാണ്. 

ഉയരമുള്ള വാഹനമായതിനാൽ വാഹനത്തിന്റെ ഉയരം കണക്കിലെടുത്ത് കേടുപാടുകൾ പരിമിതമായിരുന്നു. സമാനമായ അപകടത്തിൽ ഒരു സെഡാൻ അല്ലെങ്കിൽ ഹാച്ച്ബാക്ക് ആയിരുന്നു എങ്കില്‍ വളരെ മോശമായ പ്രത്യാഘാതങ്ങൾ നേരിടേണ്ടി വന്നേക്കാം. ട്രക്കുകൾക്ക് വളരെ ഉയരവും വിശാലമായ സ്ഥലവും ഉള്ളതിനാൽ, അത്തരം അപകടങ്ങളിൽ നിന്ന് കാറുകളെ രക്ഷിക്കാൻ അണ്ടർറൺ ബാറുകൾ സ്ഥാപിക്കേണ്ടത് ലോകമെമ്പാടുമുള്ള നിരവധി രാജ്യങ്ങളിൽ നിർബന്ധമാണ്.

പല രാജ്യങ്ങളിലും ഈ ബാറുകൾ നിർബന്ധമാണ്. എന്നാൽ ഇന്ത്യയിൽ അത്തരമൊരു നിയമം നിലവില്‍ ഇല്ല. അപകടത്തിൽ ചെറുവാഹനങ്ങളുടെ ബമ്പര്‍ ട്രക്കുമായി ആദ്യം ഇടിച്ചുനില്‍ക്കും എന്ന് ഈ അണ്ടർറൺ ബാറുകൾ ഉറപ്പാക്കുന്നു. ഇത് എയർബാഗുകളെ പ്രവർത്തനക്ഷമമാക്കുകയും ക്രമ്പിൾ സോണുകൾ പ്രവർത്തനക്ഷമമാക്കുന്നതിലൂടെ ആഘാതം ആഗിരണം ചെയ്യാൻ കാറിനെ അനുവദിക്കുകയും ചെയ്യുന്നു.

പഞ്ചനക്ഷത്ര സുരക്ഷാ റേറ്റ് നേടിയ XUV700
മൊത്തം 17 പോയിന്റിൽ 16.03 പോയിന്റ് മഹീന്ദ്ര XUV700 നേടിയതിന് ശേഷം ഗ്ലോബൽ NCAP അടുത്തിടെ മഹീന്ദ്ര XUV700ന് പഞ്ചനക്ഷത്ര റേറ്റിംഗ് നൽകിയിരുന്നു. കാറിന്റെ ഘടനയും സ്ഥിരതയുള്ളതായി വിലയിരുത്തപ്പെടുന്നു. ക്രാഷ് ടെസ്റ്റിൽ മുൻ യാത്രക്കാർക്കും ഉണ്ടാകാൻ സാധ്യതയുള്ള പരിക്കുകൾ വളരെ കുറവാണെന്നും ഈ ഇടി പരീക്ഷണത്തില്‍  കണ്ടെത്തിയിരുന്നു. കുട്ടികളുടെ സുരക്ഷാ റേറ്റിംഗിൽ എക്കാലത്തെയും ഉയർന്ന പോയിന്റുകളും ഈ കാറിന് ലഭിച്ചു. ഇത് പരമാവധി 49-ൽ 41.66 സ്കോർ ചെയ്‍തു.  ഇത് ഇതുവരെയുള്ള ഏതൊരു നിർമ്മിത ഇന്ത്യ കാറിനെ സംബന്ഘധിച്ചും ഏറ്റവും ഉയർന്ന നേട്ടമാണ്.