"പണമെന്തുചെയ്യും? പത്തുവിധം ചെയ്യും.." 21 കോടിയുടെ കാര്‍ കയറ്റാന്‍ 17 കോടിയുടെ കാരവാന്‍!

ആഡംബരത്തിന്‍റെ ആറാട്ട്.  21 കോടിയുടെ കാര്‍ കയറ്റി 17 കോടിയുടെ കാരവാന്‍. വീഡിയോ വൈറല്‍

കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയയില്‍  വൈറലായിരിക്കുകയാണ് ഒരു കാരവാന്‍. ജർമ്മൻ മോട്ടോർഹോം സ്പെഷ്യലിസ്​റ്റായ വോൾക്​നർ ഡിസൈന്‍ ചെയ്‍ത ഈ കാരവാനിന്‍റെ പ്രത്യേകത എന്തെന്നല്ലേ?​ കാര്‍സ്‍കൂപ്പ്‍സ് ഡോട്ട് കോം റിപ്പോര്‍ട്ട് ചെയ്യുന്നത് അനുസരിച്ച് അത്യാഡംബരം നിറഞ്ഞ ഈ കാരവന്‍റെ വില 17 കോടി രൂപയാണ് എന്നാണ്. എന്നാല്‍ ഈ വില മാത്രമല്ല  ഈ കാരവാനിനെ സോഷ്യല്‍ മീഡിയയില്‍ വൈറലാക്കുന്നത്. അതെന്താണെന്നല്ലേ?

ഈ കാരവാന്‍റെ ലഗേജ്​ സ്​പെയ്​സ്​ കാണിക്കാൻ വ്യത്യസ്​തമായൊരു പരസ്യം കഴിഞ്ഞദിവസം​ വോൾക്​നർ പുറത്തുവിട്ടു. ഈ കാരവനിൽ 21 കോടിയില്‍ അധികം രൂപ വിലവരുന്ന ഹൈപ്പർ കാറായ ബ്യൂഗാട്ടി ഷിറോൺ കയറ്റുന്ന വീഡിയോ ആയിരുന്നു​ കമ്പനി പുറത്തുവിട്ടത്​. 17 കോടിയുടെ വണ്ടിയുടെ അകത്ത് 21 കോടിയുടെ കാറുമായി സഞ്ചരിക്കുന്നതിലെ ആഡംബംരം ഒന്നാലോചിച്ചു നോക്കൂ! പിന്നെങ്ങനെ സോഷ്യല്‍ മീഡിയയും വാഹന ലോകവും ഞെട്ടാതിരിക്കും?

ഇനി ഈ അത്യാഡബംര കാരവാന്‍റെ വിശേഷങ്ങള്‍ അറിയാം. മൊബീൽ പെർഫോമൻസ് എസ് എന്നാണ് ഈ​ കാരവന് നിര്‍മ്മാതാക്കളായ​ വോൾക്​നർ നല്‍കിയിരിക്കുന്ന പേര്. ലോകത്ത്​ എവിടേക്കും സെവൻസ്​റ്റാർ ആഡംബരവുമായി സഞ്ചരിക്കാന്‍ സാധിക്കും എന്നതാണ്​ ഈ ആഡംബര കൊട്ടാരത്തിന്‍റെ പ്രത്യേകത. 

കാരവ​ന്‍റെ അകത്തളത്തില്‍ ആഡംബരത്തി​ന്‍റെ ആറാട്ടാണ്. തുകൽ ഫിനിഷാണ്​ എവിടെയും. ക്രീം നിറമുള്ള പെയിന്റും ലെതർ അപ്ഹോൾസ്റ്ററിയും ചേർന്നതാണ് മോട്ടോർഹോമിന് ആഡംബരത്തികവ് നൽകുന്നത്.  354,000 ഡോളർ വിലയുള്ള പ്രീമിയം ബർമെസ്റ്റർ ഓഡിയോ സിസ്റ്റമാണ്​ മറ്റൊരു പ്രത്യേകത. ബിൽറ്റ്-ഇൻ കോഫി മെഷീൻ, എൽ ആകൃതിയിലുള്ള അടുക്കള, വലിയ കുളിമുറി തുടങ്ങിയവ വാഹനത്തില്‍ ഉണ്ട്. 

ഇൻഡക്ഷൻ കുക്ക്‌ടോപ്പ്, മൈക്രോവേവ്, ഓവൻ, വൈൻ കാബിനറ്റ് എന്നിവയുൾപ്പെടെ ഉപഭോക്താക്കൾക്ക് അവർ ആഗ്രഹിക്കുന്ന എല്ലാ സൗകര്യങ്ങളും കാരവാനില്‍ ഉണ്ട്. ഇൻഡക്ഷൻ കുക്​ടോപ്പിനും മൈക്രോവേവ് ഓവനും കൂടാതെ വൈൻ കാബിനറ്റ് എന്നിവയും മറ്റ് സവിശേഷതകളിൽ ഉൾപ്പെടുന്നു. തീര്‍ന്നില്ല, ഒരു മൾട്ടി-സോൺ എയർകണ്ടീഷൻ സംവിധാനവും വാഹനത്തിലുണ്ട്​.  

430 എച്ച്​.പി പവർട്രെയിനാണ് ഈ കാരവന്‍റെ ഹൃദയം. 2,000 വാട്ട് സോളാർ സിസ്റ്റത്തിൽ നിന്നാണ് വാഹനത്തിന്​ ആവശ്യമായ വൈദ്യുതി ലഭിക്കുന്നത്​. ഒരു കാറിനെ ഉൾക്കൊള്ളാൻ കഴിയുന്ന അണ്ടർബോഡി സ്റ്റോറേജ് തന്നെയാണ് വാഹനത്തി​ന്‍റെ മുഖ്യ പ്രത്യേകത. എളുപ്പത്തിൽ സ്ലൈഡ് ചെയ്​ത്​ പുറത്തുവരുന്ന പ്ലാറ്റ്ഫോമും  സ്​റ്റോറേജിൽ ഉൾപ്പെടുത്തിയിട്ടുണ്ട്​.

ഈ സ്റ്റോറേജ് സ്‍പേസിലേക്ക് ബുഗാട്ടി ഷിറോണ്‍ കയറ്റുന്ന വീഡിയോ ആണ് വൈറലാകുന്നത്. ഈ കാരവാന്‍ സ്വന്തമാക്കി വിനോദ സഞ്ചാരത്തിനു പോകുന്ന ശതകോടീശ്വരന്മാര്‍ക്ക് തങ്ങളുടെ കോടികള്‍ വിലയുള്ള കാറും ഒപ്പം കൊണ്ടുപോകാമെന്ന് ചുരുക്കം.

കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും.  #BreakTheChain #ANCares #IndiaFightsCorona