വോൾവോ XC40 റീചാർജ് ഇന്ത്യയിൽ അസംബിൾ ചെയ്യും; അടുത്ത മാസം ലോഞ്ച്

ഈ കോംപാക്ട് ലക്ഷ്വറി ഇലക്ട്രിക് എസ്‌യുവി കർണാടകയിലെ ബെംഗളൂരുവിനടുത്തുള്ള കമ്പനിയുടെ ഹൊസകോട്ട് പ്ലാന്റിൽ അസംബിൾ ചെയ്യും എന്നും ഫിനാന്‍ഷ്യല്‍ എക്സ്‍പ്രസ് ഡ്രൈവ് റിപ്പോര്‍ട്ട് ചെയ്യുന്നു.  

സ്വീഡിഷ് വാഹന നിര്‍മ്മാതാക്കളായ വോൾവോ കാർ ഇന്ത്യ തങ്ങളുടെ ആദ്യത്തെ ഇലക്ട്രിക് വാഹനം രാജ്യത്ത് അവതരിപ്പിക്കാനുള്ള ഒരുക്കത്തിലാണ്. പുതിയ വോൾവോ XC40 റീചാർജ് അടുത്ത മാസം, അതായത് 2022 ജൂലൈയിൽ ഇന്ത്യൻ വിപണിയിൽ ലോഞ്ച് ചെയ്യും. കൂടാതെ, ഇന്ത്യയിൽ പ്രാദേശികമായി അസംബിൾ ചെയ്‍ത ഇലകട്രിക്ക് വാഹനം വാഗ്ദാനം ചെയ്യുന്ന ആദ്യത്തെ ആഡംബര ബ്രാൻഡും വോൾവോ ആയിരിക്കും. ഈ കോംപാക്ട് ലക്ഷ്വറി ഇലക്ട്രിക് എസ്‌യുവി കർണാടകയിലെ ബെംഗളൂരുവിനടുത്തുള്ള കമ്പനിയുടെ ഹൊസകോട്ട് പ്ലാന്റിൽ അസംബിൾ ചെയ്യും എന്നും ഫിനാന്‍ഷ്യല്‍ എക്സ്‍പ്രസ് ഡ്രൈവ് റിപ്പോര്‍ട്ട് ചെയ്യുന്നു.

വോൾവോ XC40 റീചാർജ് 2021 മാർച്ചിൽ ആണ് ഇന്ത്യയിൽ അവതരിപ്പിച്ചത്. കഴിഞ്ഞ വർഷം ജൂണിൽ ഇതിനുള്ള പ്രീ-ബുക്കിംഗ് ആരംഭിച്ചു. രൂപകൽപ്പനയുടെ കാര്യത്തിൽ, ഇത് അതിന്റെ ICE കൗണ്ടർപാർട്ടിനോട് സാമ്യമുള്ളതായി കാണപ്പെടുന്നു, മാത്രമല്ല അതേ കോം‌പാക്റ്റ് മോഡുലാർ ആർക്കിടെക്ചർ (CMA) പ്ലാറ്റ്‌ഫോമിലാണ് ഇത് നിർമ്മിച്ചിരിക്കുന്നത്. 408 bhp കരുത്തും 660 Nm torque ഉം ഉത്പാദിപ്പിക്കുന്ന രണ്ട് ഇലക്ട്രിക് മോട്ടോറുകളാണ് ഇതിന് കരുത്തേകുന്നത്. 

ഈ സ്വീഡിഷ് ഇലക്ട്രിക് എസ്‌യുവിയിൽ 78kWh ലിഥിയം-അയൺ ബാറ്ററി പായ്ക്ക് ഉണ്ട്. ഒറ്റ ചാർജിൽ ഏകദേശം 400 കിലോമീറ്റർ റേഞ്ച് നൽകാമെന്നും 150kW DC ഫാസ്റ്റ് ചാർജർ ഉപയോഗിച്ച് 40 മിനിറ്റിനുള്ളിൽ 0 മുതൽ 80 ശതമാനം വരെ വർധിപ്പിക്കാമെന്നും വോൾവോ അവകാശപ്പെടുന്നു. പുതിയ വോൾവോ XC40 റീചാർജ് അടുത്ത മാസം ഇന്ത്യയിൽ അവതരിപ്പിക്കും, അതേസമയം ഡെലിവറികൾ 2022 ഒക്ടോബറിൽ ആരംഭിക്കും. 

ഇന്ത്യൻ വിപണിയിൽ വളരാൻ പ്രതിജ്ഞാബദ്ധരാണെന്നും ഏറ്റവും പുതിയ ഓഫറായ എക്‌സ്‌സി 40 റീച്ചാർജ്ജ് ബെംഗളുരുവിലെ പ്ലാന്റിൽ കൂട്ടിച്ചേർക്കാനുള്ള പദ്ധതികൾ ഈ ദൃഢനിശ്ചയത്തിന്റെ പ്രതിഫലനമാണെന്നും വോൾവോ കാർ ഇന്ത്യ മാനേജിംഗ് ഡയറക്ടർ ജ്യോതി മൽഹോത്ര പറഞ്ഞു. മൊബിലിറ്റിയുടെ ഭാവി ഇലക്ട്രിക് ആണ് എന്നും ഒരു കമ്പനി എന്ന നിലയിൽ, 2030-ഓടെ വോള്‍വോ ഒരു ഓൾ-ഇലക്‌ട്രിക് കാർ കമ്പനിയാകുമെന്നും ലോക്കൽ അസംബ്ലിംഗ് ഈ ദിശയിലേക്കുള്ള ഒരു ചുവടുവയ്പ്പാണ് എന്നും അദ്ദേഹം വ്യക്തമാക്കി. 

"ഞങ്ങളുടെ നിലവിലെ ഇന്റേണൽ കംബസ്ഷൻ എഞ്ചിൻ കാറുകൾ ഹൊസകോട്ട് പ്ലാന്റിൽ നിന്ന് വോൾവോ അറിയപ്പെടുന്ന കൃത്യമായ സുരക്ഷയും ഗുണനിലവാരമുള്ള ആഗോള മാനദണ്ഡങ്ങളിലേക്കും ഇതിനകം തന്നെ പുറത്തിറക്കിക്കൊണ്ടിരിക്കുകയാണ്,"  ജ്യോതി മൽഹോത്ര കൂട്ടിച്ചേർത്തു. അടുത്ത മാസം XC40 റീചാർജ് അവതരിപ്പിച്ചുകൊണ്ട്, എല്ലാ വർഷവും ഒരു പുതിയ ഓൾ-ഇലക്‌ട്രിക് മോഡൽ അവതരിപ്പിക്കാനാണ് വോൾവോ കാർ ഇന്ത്യ ലക്ഷ്യമിടുന്നത്. ആഗോളതലത്തിൽ 2030-ഓടെ വോൾവോ ഇലക്ട്രിക് കാറുകൾ മാത്രം നിർമ്മിക്കുമെന്നും കമ്പനി പ്രഖ്യാപിച്ചതായാണ് റിപ്പോര്‍ട്ടുകള്‍.