Maruti Suzuki : മാരുതി സുസുക്കി കാറുകളുടെ കാത്തിരിപ്പ് കാലയളവ് വിശദാംശങ്ങൾ
Synopsis
മാരുതി സുസുക്കിയുടെ വിവിധ കാര് മോഡലുകളുടെ കാത്തിരിപ്പ് കാലയളവിനെക്കുറിച്ച് വിശദമായി
ഏറെക്കാലമായി വാഹന ലോകത്തെ പ്രതിസന്ധിയില് ആഴ്ത്തിയിരുന്നു സെമി കണ്ടക്ടര് ചിപ്പുകളുടെ ക്ഷാമം. എന്നാല് കഴിഞ്ഞ കുറച്ച് മാസങ്ങളായി സെമി കണ്ടക്ടര് ചിപ്പുകളുടെ വിതരണ നിയന്ത്രണങ്ങൾ ക്രമേണ മെച്ചപ്പെട്ടുവരികയാണ്. ഇന്ത്യയിലെ ഏറ്റവും വലിയ പാസഞ്ചർ കാർ നിർമ്മാതാക്കളായ മാരുതി സുസുക്കി 2022 ഫെബ്രുവരിയിൽ ഏകദേശം 90 ശതമാനം ഔട്ട്പുട്ട് മെച്ചപ്പെടുത്തി. എന്നിരുന്നാലും, നിർണായക എഞ്ചിൻ ഘടകങ്ങളിലേക്കും അർദ്ധചാലക ചിപ്പുകളിലേക്കും അസംസ്കൃത വസ്തുക്കളുടെ പ്രധാന സംഭാവനകൾ നല്കുന്ന രാജ്യങ്ങളായ റഷ്യയും ഉക്രെയിനും തമ്മിലുള്ള യുദ്ധം ഓട്ടോമൊബൈൽ വ്യവസായത്തിൽ അനിശ്ചിതത്വം വർദ്ധിപ്പിച്ചു. വിതരണ ശൃംഖലയിലെ തടസം മാരുതി സുസുക്കിയുടെ ഉൽപ്പാദന പദ്ധതികളെ വീണ്ടും ബാധിച്ചു. ഇത് വീണ്ടും ഉയർന്ന കാത്തിരിപ്പ് കാലയളവിന് കാരണമായി.
മാരുതി സുസുക്കിയുടെ സിഎൻജി മോഡലുകളും ഓട്ടോമാറ്റിക് വകഭേദങ്ങളും 2-3 മാസത്തെ ഉയർന്ന കാത്തിരിപ്പിന് സാക്ഷ്യം വഹിക്കുന്നു. ആൾട്ടോ 800 രണ്ടു മുതൽ ആറ് ആഴ്ച വരെയുള്ള ഏറ്റവും കുറഞ്ഞ കാത്തിരിപ്പ് കാലയളവ് നൽകുമ്പോൾ, ഏറ്റവും ഉയർന്ന കാത്തിരിപ്പ് കാലയളവിലാണ് എർട്ടിഗ എംപിവി. 36 മുതൽ 40 ആഴ്ച വരെയാണ് എര്ട്ടിഗയ്ക്കുള്ള കാത്തിരിപ്പ്. സിഎൻജി കാറുകളെക്കുറിച്ച് പറയുകയാണെങ്കിൽ, 2021 ഡിസംബറിൽ കമ്പനിക്ക് 1.2 ലക്ഷം സിഎൻജി വാഹനങ്ങളുടെ ബുക്കിംഗ് ഉണ്ടായിരുന്നു. എർട്ടിഗ സിഎൻജി, വാഗൺആർ സിഎൻജി വേരിയന്റുകൾക്ക് യഥാക്രമം 36 മുതല് 40 ആഴ്ചയും 14 മുതല് 20 ആഴ്ചയും വരെ കാത്തിരിപ്പ് കാലാവധിയുണ്ട്. ഈക്കോ, എസ്-പ്രെസോ സിഎന്ജി എന്നിവയുടെ കാത്തിരിപ്പ് കാലയളവ് 12 മുതല് 16 ആഴ്ച വരെയാണ്. മാരുതി സുസുക്കിയുടെ വിവിധ കാറുകളുടെ കാത്തിരിപ്പ് കാലയളവിനെക്കുറിച്ച് വിശദമായി അറിയാം.
മോഡൽ കാത്തിരിപ്പ് കാലയളവ് എന്ന ക്രമത്തില്
- വാഗൺആർ എംടി 4-8 ആഴ്ച
- വാഗൺആർ എഎംടി 14-16 ആഴ്ച
- വാഗൺആർ സിഎൻജി 14-20 ആഴ്ച
- സ്വിഫ്റ്റ് എം.ടി 4-10 ആഴ്ച
- സ്വിഫ്റ്റ് എഎംടി 12-18 ആഴ്ച
- എസ്-പ്രസ്സോ എം.ടി 10-12 ആഴ്ച
- എസ്-പ്രസ്സോ എഎംടി 10-12 ആഴ്ച
- എസ്-പ്രസ്സോ സിഎൻജി 12-16 ആഴ്ച
- ഡിസയർ എം.ടി 6-12 ആഴ്ച
- ഡിസയർ എഎംടി 12-14 ആഴ്ച
- വിറ്റാര ബ്രെസ്സ എം.ടി 4-10 ആഴ്ച
- വിറ്റാര ബ്രെസ്സ എഎംടി 8-10 ആഴ്ച
- എർട്ടിഗ എം.ടി 2-10 ആഴ്ച
- എർട്ടിഗ എഎംടി 8-10 ആഴ്ച
- എർട്ടിഗ സിഎൻജി 36-40 ആഴ്ച
മാരുതി വിറ്റാര ബ്രെസയുടെയും എർട്ടിഗയുടെയും ഓട്ടോമാറ്റിക് വേരിയന്റുകൾക്ക് 8 മുതല് 10 ആഴ്ച വരെ കാത്തിരിപ്പ് കാലയളവ് നൽകുമ്പോൾ, അവയുടെ മാനുവൽ മോഡലുകൾക്ക് യഥാക്രമം 4-10 ആഴ്ചയും 2-10 ആഴ്ചയും കാത്തിരിപ്പ് കാലാവധിയുണ്ട്. അതുപോലെ, വാഗൺആർ എഎംടിയും മാനുവൽ മോഡലുകളും യഥാക്രമം 14-16 ആഴ്ചകളിലും 4-8 ആഴ്ചകളിലും സ്വന്തമാക്കാം. മാരുതി എസ്-പ്രസ്സോ എഎംടിയും മാനുവൽ വകഭേദങ്ങളും 10-12 ആഴ്ച കാത്തിരിപ്പ് കാലയളവ് ഉണ്ടെന്നാണ് റിപ്പോര്ട്ടുകള്.
മാരുതി സുസുക്കിയുടെ വളരെ ജനപ്രിയമായ സ്വിഫ്റ്റ് ഹാച്ച്ബാക്കും ഡിസയർ കോംപാക്റ്റ് സെഡാനും മാനുവൽ വേരിയന്റുകൾക്ക് 4-10 ആഴ്ചയും 6-12 ആഴ്ചയും കാത്തിരിപ്പ് കാലയളവ് നൽകുന്നു. സ്വിഫ്റ്റ് എഎംടിക്ക് 12-18 ആഴ്ചയും ഡിസയർ എഎംടിക്ക് നിലവിൽ 12-14 ആഴ്ചയും കാത്തിരിപ്പ് കാലയളവ് ഉണ്ട്.
പുതിയ അപ്ഡേറ്റുകളിൽ, മാരുതി സുസുക്കി അതിന്റെ അറീന, നെക്സ മോഡലുകളുടെ സിഎൻജി പതിപ്പുകൾ അവതരിപ്പിക്കാൻ പദ്ധതിയിടുന്നു. റിപ്പോർട്ടുകൾ വിശ്വസിക്കാമെങ്കിൽ, ബലേനോ, സിയാസ്, ബ്രെസ്സ, എർട്ടിഗ സിഎൻജി വകഭേദങ്ങൾ 2022 അവസാനത്തോടെ ഷോറൂമുകളിൽ എത്തും.
Source : India Car News