കാത്തിരുന്നോളൂ, വിപണി ഇളകിമറിയും: വരുന്നത് വമ്പൻ കാറുകൾ! അടുത്ത ഒരു മാസത്തിൽ ഇന്ത്യയിലെത്തുന്നത് ഈ അഞ്ച് മോഡലുകൾ

വരാനിരിക്കുന്ന ഉത്സവ സീസണോടനുബന്ധിച്ച് ഇന്ത്യൻ വാഹന വിപണിയിൽ നിരവധി പുതിയ മോഡലുകൾ എത്തുന്നു. മാരുതി സുസുക്കി, ഹ്യുണ്ടായി, കിയ, എംജി, സ്കോഡ തുടങ്ങിയ നിർമ്മാതാക്കൾ സെഡാനുകൾ, എസ്‌യുവികൾ, ഹൈബ്രിഡ് വാഹനങ്ങൾ എന്നിവയുൾപ്പെടെ അഞ്ച് പ്രധാന പുതിയ കാറുകൾ അടുത്ത ഒരു മാസത്തിനുള്ളിൽ അവതരിപ്പിക്കും.

വരാനിരിക്കുന്ന ഉത്സവ സീസണിന് മുന്നോടിയായി ഇന്ത്യൻ വാഹന വിപണി സജീവമാകുകയാണ്. മാരുതി സുസുക്കി, എംജി, ഹ്യുണ്ടായി തുടങ്ങിയ പ്രമുഖ വാഹന നിർമാതാക്കൾ പുതിയ മോഡലുകളുമായി വിപണിയിലെത്താനുള്ള ഒരുക്കത്തിലാണ്. അടുത്ത ഏതാനും ആഴ്ചകൾക്കുള്ളിൽ നിരവധി പുതിയ കാറുകളും ഫെയ്‌സ്‌ലിഫ്റ്റ് പതിപ്പുകളും ഇന്ത്യയിൽ അവതരിപ്പിക്കുമെന്നാണ് റിപ്പോർട്ടുകൾ. കോംപാക്ട് സെഡാൻ മുതൽ മൂന്ന് നിരകളുള്ള പ്രീമിയം എസ്‌യുവികളും ഹൈബ്രിഡ് വാഹനങ്ങളും വരെ ഈ പട്ടികയിലുണ്ട്. അടുത്ത ഒരു മാസത്തിനുള്ളിൽ ഇന്ത്യയിൽ അവതരിപ്പിക്കാനിരിക്കുന്ന പ്രധാന 5 കാറുകൾ ഏതൊക്കെയെന്ന് നോക്കാം.

പുതിയ സ്കോഡ സ്ലാവിയ

സ്കോഡയുടെ ജനപ്രിയ സെഡാനായ സ്ലാവിയയുടെ പരിഷ്‌കരിച്ച പതിപ്പ് ഓഗസ്റ്റ് 18ന് ഇന്ത്യയിൽ അവതരിപ്പിക്കും. ഏറെക്കാലമായി കാത്തിരിക്കുന്ന മിഡ്-സൈക്കിൾ പരിഷ്‌കരണമാണ് പുതിയ സ്ലാവിയയിൽ വരുന്നത്. പൂർണ എൽഇഡി ഹെഡ്‌ലൈറ്റുകൾ, പിന്നിൽ ഡൈനാമിക് ടേൺ ഇൻഡിക്കേറ്ററുകൾ, 10.25 ഇഞ്ച് പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്റർ തുടങ്ങിയ സവിശേഷതകൾ പുതിയ മോഡലിൽ പ്രതീക്ഷിക്കുന്നു. നവീകരിച്ച എയർ കണ്ടീഷനിങ് സംവിധാനത്തിനൊപ്പം പിൻസീറ്റിൽ മസാജ് സൗകര്യവും ലഭിച്ചേക്കുമെന്നാണ് സൂചന.

എംജി ഹെക്ടർ ഹോക്ക്

ജെഎസ്‍ഡബ്ല്യു എംജി മോട്ടോർ ഓഗസ്റ്റ് 26ന് പുതിയ മൂന്ന് നിര എസ്‌യുവിയായ എംജി ഹെക്ടർ ഹോക്ക് ഇന്ത്യയിൽ അവതരിപ്പിക്കാൻ ഒരുങ്ങുന്നതായാണ് റിപ്പോർട്ട്. വുളിങ് സ്റ്റാർലൈറ്റ് 560ന്റെ പുനർരൂപകൽപ്പന ചെയ്ത പതിപ്പായിരിക്കും ഇത്. എംജി ഹെക്ടർ പ്ലസിന് മുകളിലായി സ്ഥാനം പിടിക്കുന്ന മോഡൽ മഹീന്ദ്രയുടെ എക്സ്യുവി 7എക്സ്ഒ, എക്സ്ഇവി 9എസ് തുടങ്ങിയ മോഡലുകൾക്ക് എതിരാളിയാകും. പ്ലഗ്-ഇൻ ഹൈബ്രിഡ്, പൂർണമായും ഇലക്‍ട്രിക്ക് പതിപ്പ് എന്നീ രണ്ട് പവർട്രെയിൻ ഓപ്ഷനുകളിൽ എസ്‌യുവി ലഭിച്ചേക്കും.

കിയ സോറന്റോ

കിയയുടെ ഏറെ പ്രതീക്ഷയോടെ കാത്തിരിക്കുന്ന പ്രീമിയം എസ്‌യുവിയായ സോറന്റോ സെപ്റ്റംബർ 4ന് ഇന്ത്യയിൽ അവതരിപ്പിക്കുമെന്നാണ് റിപ്പോർട്ടുകൾ. ഹ്യുണ്ടായി സാന്റാ ഫെയുമായി പങ്കിടുന്ന പ്ലാറ്റ്‌ഫോമിനെ അടിസ്ഥാനമാക്കിയായിരിക്കും സോറന്റോ എത്തുക. സ്കോഡ കൊഡിയാക്, ഫോക്‌സ്‌വാഗൺ ടെയ്‌റോൺ തുടങ്ങിയ പ്രീമിയം എസ്‌യുവികളുമായാകും ഇന്ത്യയിൽ മത്സരം. മൂന്ന് നിര സീറ്റിങ് സംവിധാനമുള്ളതിനാൽ വലിയ കുടുംബങ്ങൾക്കും ദീർഘദൂര യാത്രകൾക്കും അനുയോജ്യമായ മോഡലായി സോറന്‍റോ മാറിയേക്കും.

പുതിയ മാരുതി സുസുക്കി ഫ്രോങ്ക്സ്

2023ൽ ഇന്ത്യയിൽ അവതരിപ്പിച്ച മാരുതി സുസുക്കി ഫ്രോങ്ക്സ് മികച്ച വിൽപ്പന നേടിയ മോഡലാണ്. രാജ്യത്ത് ഇതിനകം 500,000 യൂണിറ്റുകളുടെ വിൽപ്പന പിന്നിട്ട ഫ്രോങ്ക്സിന്റെ പരിഷ്‌കരിച്ച പതിപ്പ് സെപ്റ്റംബർ 5ന് അവതരിപ്പിക്കുമെന്നാണ് സൂചന. പുതിയ ബമ്പറുകൾ, പരിഷ്‌കരിച്ച ഹെഡ്‌ലൈറ്റുകൾ, പുതിയ ക്യാബിൻ ട്രിം, പുതുക്കിയ അപ്ഹോൾസ്റ്ററി തുടങ്ങിയ മാറ്റങ്ങൾ പുതിയ ഫ്രോങ്ക്സിൽ പ്രതീക്ഷിക്കുന്നു. മാരുതി സുസുക്കി സീരീസ് ഹൈബ്രിഡ് എൻജിൻ വികസിപ്പിക്കുന്നതായും റിപ്പോർട്ടുകളുണ്ട്. എന്നാൽ ഈ സാങ്കേതികവിദ്യ ഫ്രോങ്ക്സിൽ എത്താൻ അടുത്ത വർഷം വരെ കാത്തിരിക്കേണ്ടി വന്നേക്കും.

പുതുതലമുറ ഹ്യുണ്ടായി ബയോൺ

ഇന്ത്യൻ വിപണിയിൽ രണ്ടാമത്തെ മിഡ്-സൈസ് എസ്‌യുവി അവതരിപ്പിക്കാനുള്ള ഒരുക്കത്തിലാണ് ഹ്യുണ്ടായി. പുതുതലമുറ ബയോൺ സെപ്റ്റംബറിൽ ഇന്ത്യയിലെത്തുമെന്നാണ് പ്രതീക്ഷിക്കുന്നത്. ജനപ്രിയ ക്രെറ്റയ്ക്ക് തൊട്ടുതാഴെയായി സ്ഥാനം പിടിക്കുന്ന ബയോൺ മാരുതി സുസുക്കി വിക്ടോറിസിനോട് മത്സരിക്കും. പെട്രോൾ, സിഎൻജി പതിപ്പുകളിൽ വാഹനം ലഭിച്ചേക്കും. 1.5 ലിറ്റർ നാച്ചുറലി ആസ്പിറേറ്റഡ് 4 സിലിണ്ടർ എൻജിനായിരിക്കും ബയോണിന് കരുത്തേകുകയെന്നാണ് റിപ്പോർട്ടുകൾ. പുതിയ മോഡലിന്റെ വിലയും മറ്റ് സവിശേഷതകളും ലോഞ്ചിനോട് അടുത്ത് മാത്രമേ കൂടുതൽ വ്യക്തമാകുകയുള്ളൂ.