360 ഡിഗ്രി ക്യാമറ, ആംബിയന്‍റ് ലൈറ്റിംഗ് തുടങ്ങിയവയുമായി ഹോണ്ട എലിവേറ്റ് എലൈറ്റ് പായ്ക്ക്

ഹോണ്ട എലിവേറ്റ് എസ്‌യുവിക്ക് പുതിയ എലൈറ്റ് പായ്ക്ക് അവതരിപ്പിച്ചു, 360-ഡിഗ്രി ക്യാമറ, 7-കളർ ആംബിയന്റ് ലൈറ്റിംഗ് തുടങ്ങിയ സവിശേഷതകൾ ചേർത്ത്. ഈ പുതിയ ഫീച്ചറുകൾ അധിക ചെലവില്ലാതെ ലഭ്യമാകും.

ജാപ്പനീസ് വാഹന ബ്രാൻഡായ ഹോണ്ട കാർസ് ഇന്ത്യ തങ്ങളുടെ ജനപ്രിയ എസ്‌യുവി എലിവേറ്റിനായി ഒരു പുതിയ എലൈറ്റ് പായ്ക്ക് അവതരിപ്പിച്ചു. 360-ഡിഗ്രി ക്യാമറ, 7-കളർ ആംബിയന്റ് ലൈറ്റിംഗ് തുടങ്ങിയ ചില പ്രത്യേക സവിശേഷതകൾ ഈ പുതിയ പായ്ക്കിൽ ചേർത്തിട്ടുണ്ട്. കൂടാതെ ഈ രണ്ട് സവിശേഷതകളും അധിക ചെലവില്ലാതെ വാഗ്ദാനം ചെയ്യുന്നു എന്നതാണ് പ്രത്യേകത. ഹോണ്ടയുടെ ദി ഗ്രേറ്റ് ഹോണ്ട ഫെസ്റ്റ് കാമ്പെയ്‌നിന്റെ ഭാഗമാണ് ഈ ഓഫർ. 12 ലക്ഷം രൂപയിൽ താഴെയാണ് ഇന്ത്യയിലെ ഹോണ്ട എലിവേറ്റ് എസ്‌യുവിയുടെ പ്രാരംഭ എക്‌സ്-ഷോറൂം വില ആരംഭിക്കുന്നത്.

360-ഡിഗ്രി ക്യാമറ ഇനി എലിവേറ്റ്, അമേസ് മോഡലുകൾക്ക് ഒരു ആക്സസറിയായി ലഭ്യമാകുമെന്ന് ഹോണ്ട അറിയിച്ചു. ഒരു ഉപഭോക്താവിന് ഈ സവിശേഷത കാറിൽ വെവ്വേറെ ഇൻസ്റ്റാൾ ചെയ്യാൻ താൽപ്പര്യമുണ്ടെങ്കിൽ അത് ഡീലർഷിപ്പിൽ ഇൻസ്റ്റാൾ ചെയ്യാവുന്നതാണ്. ഈ ക്യാമറ ഒരു മൂന്നാം കക്ഷി കമ്പനിയാണ് നൽകുന്നത്. കൂടാതെ വാങ്ങുന്ന തീയതി മുതൽ ബാധകമാകുന്ന രണ്ട് വർഷത്തെ വാറന്‍റിയും ഇതിനുണ്ടാകും.

ഹോണ്ട എലിവേറ്റ് ഉപഭോക്താക്കൾ വളരെക്കാലമായി 360 ഡിഗ്രി ക്യാമറ ആവശ്യപ്പെട്ടിരുന്നു. ഇതുവരെ, ഈ എസ്‌യുവിയുടെ ചില ഉയർന്ന വേരിയന്റുകളിൽ കമ്പനി ലെയ്ൻ വാച്ച് ക്യാമറ നൽകിയിരുന്നു. എന്നാൽ ഇനിൾ ഈ പുതിയ ഫീച്ചർ കാരണം, കാറിന്റെ സുരക്ഷയും ഡ്രൈവിംഗ് അനുഭവവും മെച്ചപ്പെടും. ഇത് പുതിയ കാർ വാങ്ങുന്നവർക്ക് എലിവേറ്റിനെ കൂടുതൽ ആകർഷകമായ ഓപ്ഷനാക്കി മാറ്റും.

ഗ്രേറ്റ് ഹോണ്ട ഫെസ്റ്റിലൂടെ, ഈ സീസൺ ഞങ്ങളുടെ ഉപഭോക്താക്കൾക്ക് കൂടുതൽ സവിശേഷമാക്കാൻ ഞങ്ങൾ ആഗ്രഹിക്കുന്നുവെന്ന് ഹോണ്ട കാർസ് ഇന്ത്യയുടെ മാർക്കറ്റിംഗ് & സെയിൽസ് വൈസ് പ്രസിഡന്റ് കുനാൽ ബഹൽ പറഞ്ഞു. ഈ വർഷം ഹോണ്ട കാറുകളിൽ മികച്ച ഓഫറുകളും സ്‍കീമുകളും കൊണ്ടുവരിക മാത്രമല്ല, എലിവേറ്റിനും അമേസിനും വേണ്ടിയുള്ള ആക്‌സസറീസ് നിരയിലേക്ക് പുതിയ സാങ്കേതികവിദ്യ ചേർക്കുകയും ചെയ്യുന്നുവെന്നും ഇത് ഓരോ ഡ്രൈവിനും കൂടുതൽ മൂല്യവും സുഖവും സുരക്ഷയും നൽകുമെന്നും അദ്ദേഹം പറഞ്ഞു.

ഈ ഉത്സവകാല കാമ്പെയ്‌നിന്റെ ഭാഗമായി , ഹോണ്ട അതിന്റെ മൂന്ന് പ്രധാന കാറുകളായ അമേസ്, സിറ്റി, എലിവേറ്റ് എന്നിവയിൽ നിരവധി പ്രത്യേക പദ്ധതികളും ആനുകൂല്യങ്ങളും വാഗ്ദാനം ചെയ്തിട്ടുണ്ട്. എന്നിരുന്നാലും, ഈ പദ്ധതികളുടെ പൂർണ്ണ വിവരങ്ങൾ കമ്പനി ഇതുവരെ പരസ്യമാക്കിയിട്ടില്ല. രാജ്യത്തുടനീളമുള്ള അംഗീകൃത ഹോണ്ട ഡീലർഷിപ്പുകളിൽ ഈ ഓഫറുകളെല്ലാം ലഭ്യമാകും. മികച്ച ഡീലിനായി നിങ്ങളുടെ പ്രാദേശിക ഹോണ്ട ഷോറൂമുകളുമായി ബന്ധപ്പെടുക.