കിയ കാരെൻസ് ക്ലാവിസ് ഇവി ജൂലൈ 15 ന് ലോഞ്ച് ചെയ്യും

കിയ കാരെൻസ് ക്ലാവിസ് ഇവി 2025 ജൂലൈ 15 ന് ഔദ്യോഗികമായി അവതരിപ്പിക്കും. ഏകദേശം 18 ലക്ഷം രൂപ മുതൽ 27 ലക്ഷം രൂപ വരെയാണ് വില പ്രതീക്ഷിക്കുന്നത്. ഹ്യുണ്ടായി ക്രെറ്റ ഇലക്ട്രിക്കിൽ നിന്നുള്ള ബാറ്ററി പായ്ക്കുകൾ ഇതിൽ ഉപയോഗിച്ചേക്കാം.

കിയ കാരെൻസ് ക്ലാവിസ് ഇവിയുടെ ഔദ്യോഗിക അരങ്ങേറ്റം 2025 ജൂലൈ 15 ന് നടക്കും . അതേ ദിവസം തന്നെ ഔദ്യോഗിക വില പ്രഖ്യാപനവും നടക്കും. എംജി വിൻഡ്‌സർ ഇവിയുടെ ഉയർന്ന വകഭേദങ്ങളോട് മത്സരിക്കാൻ ലക്ഷ്യമിട്ടുള്ള കാരെൻസ് ക്ലാവിസ് ഇവിയുടെ എൻട്രി ലെവൽ വേരിയന്റിന് ഏകദേശം 18 ലക്ഷം രൂപ വില പ്രതീക്ഷിക്കുന്നു. വാഹനത്തിന്‍റെ ഉയർന്ന വകഭേദങ്ങൾക്ക് ഏകദേശം 26 ലക്ഷം മുതൽ 27 ലക്ഷം രൂപ വരെയും വില പ്രതീക്ഷിക്കുന്നു. 26.90 ലക്ഷം മുതൽ 29.90 ലക്ഷം രൂപ വരെ വില പരിധിയിൽ ലഭ്യമായ ബിവൈഡി ഇ-മാക്സ് 7 നെ ഈ മോഡൽ നേരിടും.

വാഹനത്തിന്‍റെ പവർട്രെയിൻ സ്പെസിഫിക്കേഷനുകൾ ഇപ്പോഴും വ്യക്തമല്ല. എങ്കിലും കിയ കാരെൻസ് ക്ലാവിസ് ഇവി ഹ്യുണ്ടായി ക്രെറ്റ ഇലക്ട്രിക്കിൽ നിന്ന് 42kWh, 51.4kWh ബാറ്ററി പായ്ക്കുകൾ കടമെടുക്കാൻ സാധ്യതയുണ്ട്. ചെറിയ ബാറ്ററി 390 കിലോമീറ്റർ അവകാശപ്പെടുന്ന എംഐഡിസി റേഞ്ച് വാഗ്‍ദാനം ചെയ്യുന്നു. അതേസമയം വലിയ ബാറ്ററി പായ്ക്ക് പൂർണ്ണമായി ചാർജ് ചെയ്താൽ 473 കിലോമീറ്റർ സഞ്ചരിക്കും. ഭാരമേറിയ ബോഡി-ബിൽറ്റ് കാരണം കാരെൻസ് ക്ലാവിസ് ഇവിയുടെ റേഞ്ച് കണക്കുകൾ വ്യത്യാസപ്പെടാം. വെഹിക്കിൾ-ടു-വെഹിക്കിൾ (V2V), വെഹിക്കിൾ-ടു-ലോഡ് (V2L) ചാർജിംഗ് പ്രവർത്തനങ്ങളെ ഇത് പിന്തുണയ്ക്കാനും സാധ്യതയുണ്ട്.

കാഴ്ചയിൽ, കിയ കാരെൻസ് ക്ലാവിസ് ഇവി അതിന്റെ ഐസിഇ എതിരാളിയുമായി ശക്തമായ സാമ്യം പങ്കിടും. എങ്കിലും ചില ഇവി നിർദ്ദിഷ്‍ട കോസ്മെറ്റിക് മാറ്റങ്ങൾ രണ്ട് മോഡലുകളെയും വ്യത്യസ്‍തമാക്കും. ഇവിയിൽ മുൻവശത്ത് ഒരു ചാർജിംഗ് പോർട്ടും, കറുത്ത നിറത്തിലുള്ള ഗ്രിൽ, പരിഷ്‍കരിച്ച ബമ്പർ, ആംഗുലർ എൽഇഡി ഹെഡ്‌ലാമ്പുകൾ എന്നിവ ഉണ്ടായിരിക്കും എന്നാണ് സ്പൈ ചിത്രങ്ങൾ കാണിക്കുന്നത് . അതിന്റെ ഐസിഇ പതിപ്പിൽ നിന്ന് വ്യത്യസ്‍തമായി, ഇലക്ട്രിക് കാരെൻസ് ക്ലാവിസിൽ എയറോ-ഒപ്റ്റിമൈസ് ചെയ്ത പുതിയ അലോയി വീലുകളും ഉണ്ടാകും.

ക്യാബിനുള്ളിൽ, ഇലക്ട്രിക് കാരൻസ് ക്ലാവിസിന് പുതിയ ഇന്റീരിയർ കളർ തീം ലഭിച്ചേക്കാം. അതോടൊപ്പം ബോസ് മോഡ് ഉള്ള പവർ അഡ്ജസ്റ്റ് ചെയ്യാവുന്ന കോ-ഡ്രൈവർ സീറ്റ്, ഡിജിറ്റൽ കീ, വെന്റിലേറ്റഡ് രണ്ടാം നിര ക്യാപ്റ്റൻ സീറ്റുകൾ തുടങ്ങിയ ചില അധിക സവിശേഷതകളും ലഭിച്ചേക്കാം. ഡ്യുവൽ സ്‌ക്രീൻ സജ്ജീകരണം, വെന്റിലേറ്റഡ് ഫ്രണ്ട് സീറ്റുകൾ, പനോരമിക് സൺറൂഫ്, 8-സ്പീക്കർ ബോസ് സൗണ്ട് സിസ്റ്റം, ആംബിയന്റ് ലൈറ്റിംഗ് സിസ്റ്റം, 360 ഡിഗ്രി ക്യാമറ, എഡിഎഎസ് സ്യൂട്ട്, ആറ് എയർബാഗുകൾ തുടങ്ങി ഐസിഇ പതിപ്പിൽ പ്രവർത്തിക്കുന്ന പതിപ്പിൽ നിന്ന് ബാക്കി സവിശേഷതകൾ തുടരാൻ സാധ്യതയുണ്ട് എന്നാണ് റിപ്പോർട്ടുകൾ.