ഹോണ്ടയുടെ ത്രിമൂർത്തികൾ; വിപണി പിടിക്കാൻ മൂന്ന് പുതിയ താരങ്ങൾ

ഇന്ത്യൻ വിപണിയിൽ സാന്നിധ്യം ശക്തമാക്കാൻ ഹോണ്ട മൂന്ന് പുതിയ മോഡലുകൾ അവതരിപ്പിക്കുന്നു. എലിവേറ്റ് എസ്‌യുവിയുടെ ഫെയ്‌സ്‌ലിഫ്റ്റ്, ആൽഫ എന്ന പുതിയ ഇലക്ട്രിക് എസ്‌യുവി, പ്രെലൂഡ് ഹൈബ്രിഡ് കൂപ്പെ എന്നിവയാണ് വരും വർഷങ്ങളിൽ പുറത്തിറങ്ങാൻ ഒരുങ്ങുന്നത്.

ഇന്ത്യൻ വാഹന വിപണിയിൽ സാന്നിധ്യം ശക്തിപ്പെടുത്താൻ പുതിയ ഉൽപ്പന്ന നിരയുമായി ഹോണ്ട. വിൽപ്പന വർധിപ്പിക്കുന്നതിനും എസ്‌യുവി, ഇലക്ട്രിക് വാഹന വിഭാഗങ്ങളിലെ മത്സരത്തിൽ കൂടുതൽ കരുത്താർജിക്കുന്നതിനുമായി കമ്പനി മൂന്ന് പുതിയ മോഡലുകൾ അവതരിപ്പിക്കാൻ ഒരുങ്ങുകയാണ്. എലിവേറ്റ് ഫെയ്‌സ്‌ലിഫ്റ്റ്, ആൽഫ ഇലക്ട്രിക് എസ്‌യുവി, പ്രെലൂഡ് ഹൈബ്രിഡ് കൂപ്പെ എന്നിവയാണ് അടുത്ത ഏതാനും വർഷങ്ങൾക്കുള്ളിൽ ഇന്ത്യൻ വിപണിയിലെത്താൻ സാധ്യതയുള്ള പ്രധാന മോഡലുകൾ.

എലിവേറ്റ് ഫെയ്‌സ്‌ലിഫ്റ്റിന് പുതുമുഖം

 നിലവിൽ ഇന്ത്യയിൽ ഹോണ്ടയുടെ ഏക എസ്‌യുവിയാണ് എലിവേറ്റ്. 2023-ലാണ് ഈ മോഡൽ വിപണിയിലെത്തിയത്. എന്നാൽ ഇടത്തരം എസ്‌യുവി വിഭാഗത്തിലെ മത്സരം ശക്തമായതോടെ വാഹനത്തിന് സമഗ്രമായ പുതുക്കൽ നൽകാനാണ് കമ്പനിയുടെ തീരുമാനം. പുതിയ എലിവേറ്റിന്റെ അടിസ്ഥാന രൂപകൽപ്പന നിലവിലെ മോഡലിന് സമാനമായിരിക്കുമെങ്കിലും മുൻഭാഗത്തും പിൻഭാഗത്തും ശ്രദ്ധേയമായ മാറ്റങ്ങൾ പ്രതീക്ഷിക്കാം. പുതിയ ഫ്രണ്ട് ഗ്രിൽ, പുതുക്കിയ ബമ്പർ, ആധുനിക ലൈറ്റിങ് സംവിധാനം എന്നിവ വാഹനത്തിന് കൂടുതൽ ആകർഷകമായ രൂപം നൽകും.

അകത്തളത്തിലും നിരവധി മാറ്റങ്ങൾ വരുമെന്നാണ് റിപ്പോർട്ടുകൾ. അടുത്തിടെ പുതുക്കിയ സിറ്റി സെഡാനിൽ നൽകിയതുപോലെ വെന്റിലേറ്റഡ് മുൻസീറ്റുകൾ ഉൾപ്പെടെ കൂടുതൽ പ്രീമിയം സൗകര്യങ്ങൾ ലഭിച്ചേക്കും. ഫീച്ചർ പട്ടികയും കൂടുതൽ സമ്പന്നമാക്കും. എൻജിനിൽ മാറ്റമുണ്ടാകാൻ സാധ്യത കുറവാണ്. നിലവിലുള്ള 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എൻജിൻ തന്നെയാകും തുടർന്നും ഉപയോഗിക്കുക.

ആൽഫ ഇലക്ട്രിക് എസ്‌യുവിയുമായി ഹോണ്ടയുടെ പുതിയ ചുവടുവെപ്പ്

ഇന്ത്യൻ ഇലക്ട്രിക് വാഹന വിപണിയിലേക്കുള്ള ഹോണ്ടയുടെ വലിയ ചുവടുവെപ്പായിരിക്കും പുതിയ ആൽഫ ഇലക്ട്രിക് എസ്‌യുവി. ഇതിനായി കമ്പനി രാജ്യത്ത് റോഡ് പരീക്ഷണങ്ങൾ ആരംഭിച്ചുകഴിഞ്ഞു. വിവിധ പ്രദേശങ്ങളിലെയും കാലാവസ്ഥാ സാഹചര്യങ്ങളിലെയും പരീക്ഷണങ്ങൾ പുരോഗമിക്കുകയാണ്. ഇലക്ട്രിക് വാഹനങ്ങൾക്കായി പ്രത്യേകം വികസിപ്പിച്ച പ്ലാറ്റ്‌ഫോമിലാണ് ഈ എസ്‌യുവി നിർമിക്കുന്നത്. ബോക്‌സി രൂപകൽപ്പനയും ഭാവിയെ ഓർമിപ്പിക്കുന്ന സ്റ്റൈലിംഗുമാണ് വാഹനത്തിന്റെ പ്രധാന ആകർഷണം. വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സംവിധാനം, പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്റർ, വെന്റിലേറ്റഡ് സീറ്റുകൾ, ലെതററ്റ് അപ്ഹോൾസ്റ്ററി, പനോരമിക് സൺറൂഫ് അല്ലെങ്കിൽ ഗ്ലാസ് റൂഫ് ഉൾപ്പെടെ നിരവധി പ്രീമിയം സൗകര്യങ്ങൾ വാഹനത്തിൽ ലഭിക്കുമെന്നാണ് പ്രതീക്ഷ.

65 കിലോവാട്ട്-മണിക്കൂറും 75 കിലോവാട്ട്-മണിക്കൂറും ശേഷിയുള്ള ലിഥിയം അയൺ ഫോസ്ഫേറ്റ് ബാറ്ററി പായ്ക്കുകളാണ് വാഹനത്തിൽ ഉപയോഗിക്കാനിടയുള്ളത്. ഒറ്റ ചാർജിൽ ഏകദേശം 450 മുതൽ 500 കിലോമീറ്റർ വരെ യഥാർഥ ഡ്രൈവിംഗ് റേഞ്ച് നൽകുക എന്നതാണ് കമ്പനിയുടെ ലക്ഷ്യം.

പ്രെലൂഡ് ഹൈബ്രിഡ് കൂപ്പെയും ഇന്ത്യയിലേക്ക്

 ഹോണ്ടയുടെ ഐതിഹാസിക മോഡലായ പ്രെലൂഡ് ഇന്ത്യൻ വിപണിയിലും എത്താൻ ഒരുങ്ങുകയാണ്. രണ്ട് ഡോറുകളുള്ള ഈ പ്രീമിയം സ്പോർട്സ് കൂപ്പെ ഹൈബ്രിഡ് സാങ്കേതികവിദ്യയോടെയാകും അവതരിപ്പിക്കുക. 2.0 ലിറ്റർ പെട്രോൾ എൻജിനും ഹൈബ്രിഡ് സംവിധാനവും ചേർന്നുള്ള കരുത്തിൽ ഏകദേശം 200 പി.എസ്. ശക്തിയും 315 എൻ.എം. ടോർക്കും വാഹനത്തിന് ലഭിക്കുമെന്നാണ് റിപ്പോർട്ടുകൾ.

വിപണിയിലെത്തിയാൽ ഇന്ത്യയിൽ ഹോണ്ടയുടെ ഏറ്റവും വേഗതയേറിയതും ഏറ്റവും പ്രീമിയം വിലയുള്ളതുമായ മോഡലായി പ്രെലൂഡ് മാറും. ബ്രാൻഡിന്റെ പ്രീമിയം ഇമേജ് കൂടുതൽ ശക്തിപ്പെടുത്താൻ ലക്ഷ്യമിട്ടുള്ള 'ഹാലോ' മോഡലായിരിക്കും ഇത്. അതിനാൽ തന്നെ, ഹോണ്ടയുടെ ആഗോള എസ്‌യുവിയായ ഇസഡ്.ആർ.-വിയേക്കാൾ ഉയർന്ന വിലയിലായിരിക്കും പ്രെലൂഡ് ഇന്ത്യയിൽ അവതരിപ്പിക്കപ്പെടുക എന്നാണ് വിപണി വിലയിരുത്തൽ.

ഈ മൂന്ന് മോഡലുകളിലൂടെ എസ്‌യുവി, ഇലക്ട്രിക് വാഹന, പ്രീമിയം പെർഫോമൻസ് കാർ വിഭാഗങ്ങളിലൊക്കെ ഒരേസമയം സാന്നിധ്യം ശക്തമാക്കാനാണ് ഹോണ്ടയുടെ ലക്ഷ്യം. വിപണിയിലെ കനത്ത മത്സരത്തിനിടയിൽ കമ്പനിയുടെ പുതിയ ഉൽപ്പന്ന തന്ത്രത്തിന്റെ ഭാഗമായാണ് ഈ വാഹനങ്ങൾ എത്തുന്നത്.