എസ്‍യുവി വാങ്ങാൻ പ്ലാനുണ്ടോ? ജസ്റ്റ് വെയിറ്റ്, 3 കിടിലൻ എസ്‍യുവികളുമായി ഹോണ്ട

ഇന്ത്യയിൽ ഹോണ്ടയുടെ പുതിയ എസ് യു വികൾ വരുന്നു! 7 സീറ്റർ, ഇലക്ട്രിക്, ഹൈബ്രിഡ് മോഡലുകൾ ഉൾപ്പെടെ വൈവിധ്യമാർന്ന വാഹനങ്ങൾ ഉടൻ പുറത്തിറങ്ങും.

ഇന്ത്യൻ ഉപഭോക്താക്കൾക്കിടയിൽ എസ്‌യുവി വിഭാഗത്തിലെ കാറുകളുടെ ആവശ്യം തുടർച്ചയായി വർദ്ധിച്ചുകൊണ്ടിരിക്കുകയാണ്. നിങ്ങളും സമീപഭാവിയിൽ ഒരു പുതിയ എസ്‌യുവി വാങ്ങാൻ പദ്ധതിയിടുന്നുണ്ടെങ്കിൽ ഈ വാർത്ത നിങ്ങൾക്കുള്ളതാണ്. വരും ദിവസങ്ങളിൽ ജാപ്പനീസ് വാഹന ബ്രൻഡായ ഹോണ്ട ഇന്ത്യ നിരവധി എസ്‌യുവി മോഡലുകൾ പുറത്തിറക്കാൻ പോകുന്നു. ഇവയിൽ ഇലക്ട്രിക്, ഹൈബ്രിഡ് മോഡലുകളും ഉൾപ്പെടുന്നു. വരാനിരിക്കുന്ന 3 ഹോണ്ട എസ്‌യുവികളെക്കുറിച്ച് വിശദമായി അറിയാം.

ഹോണ്ടയുടെ പുതിയ 7 സീറ്റർ എസ്‌യുവി
ഇന്ത്യൻ വിപണിക്കായി ഹോണ്ട ഇന്ത്യ ഒരു പുതിയ ഏഴ് സീറ്റർ എസ്‌യുവി പുറത്തിറക്കാനുള്ള ശ്രമത്തിലാണ്. ഈ ഏഴ് സീറ്റർ 2027 ൽ അരങ്ങേറ്റം കുറിക്കും. ഏഴ് സീറ്റർ എസ്‌യുവിക്ക് 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ ലഭിക്കുമെന്ന് പ്രതീക്ഷിക്കുന്നു.

എലിവേറ്റ് ഇ വി 
എലിവേറ്റ് ഇവിയുടെ ലോഞ്ചോടെയാണ് ഹോണ്ട ഇന്ത്യയിലെ ഇലക്ട്രിക് വാഹന വിഭാഗത്തിൽ അരങ്ങേറ്റം കുറിക്കുന്നത്. എലിവേറ്റ് ഇവി അടുത്ത വർഷം, അതായത് 2026 ൽ കമ്പനി പുറത്തിറക്കിയേക്കും. ഹ്യുണ്ടായി ക്രെറ്റ ഇവി, മാരുതി സുസുക്കി ഇ വിറ്റാര, മഹീന്ദ്ര ബിഇ6, ടാറ്റ കർവ് ഇവി തുടങ്ങിയ എസ്‌യുവികളോട് ഈ എസ്‌യുവി മത്സരിക്കും. ഒറ്റ ചാർജിൽ 400 കിലോമീറ്ററിലധികം ദൂരം സഞ്ചരിക്കാൻ ഇവിക്ക് കഴിയുമെന്ന് വിവിധ റിപ്പോർട്ടുകൾ അവകാശപ്പെടുന്നു.

ഹോണ്ട ZR-V ഹൈബ്രിഡ്
ഇന്ത്യൻ വിപണിയിൽ ZR-V അവതരിപ്പിക്കാൻ ഹോണ്ട ഒരുങ്ങുന്നു. ഈ ഹൈബ്രിഡ് എസ്‌യുവി ഈ വർഷം അവസാനമോ 2026 ന്റെ തുടക്കത്തിലോ നിരത്തുകളിലെത്തിയേക്കാം. എന്നിരുന്നാലും, ഇന്ത്യയിൽ ഇത് പുറത്തിറക്കുന്നതിനെക്കുറിച്ച് ഇതുവരെ അന്തിമ തീരുമാനം എടുത്തിട്ടില്ല. CBU റൂട്ട് വഴിയായിരിക്കും ഹോണ്ട ZR-V ഇന്ത്യയിൽ വിൽക്കുന്നതെന്ന് നമുക്ക് പറയാം. ഡ്യുവൽ മോട്ടോർ ഹൈബ്രിഡ് സജ്ജീകരണവുമായി ജോടിയാക്കിയ 2.0 ലിറ്റർ പെട്രോൾ എഞ്ചിനാണ് എസ്‌യുവിയുടെ കരുത്ത്.