വിപണിയെ ഇളക്കിമറിക്കാൻ നിസാന്റെ പുതിയ 7 സീറ്റർ എസ്യുവി വരുന്നു
Synopsis
2027-ന്റെ തുടക്കത്തിൽ നിസ്സാൻ ഇന്ത്യയിൽ ഒരു പുതിയ മൂന്നുവരി ഡി-എസ്യുവി പുറത്തിറക്കാൻ ഒരുങ്ങുന്നു. റെനോ പതിപ്പുമുണ്ടാകുന്ന ഈ എസ്യുവി, ഹൈബ്രിഡ് എഞ്ചിൻ ഓപ്ഷനോടെ വരുമെന്നും ഇന്ത്യയിൽ നിർമ്മിച്ച് കയറ്റുമതി ചെയ്യുമെന്നും പ്രതീക്ഷിക്കുന്നു.
ജാപ്പനീസ് കാർ നിർമ്മാതാക്കളായ നിസ്സാൻ ഇന്ത്യയിലെ എസ്യുവി തന്ത്രം അടുത്ത ഘട്ടത്തിലേക്ക് കൊണ്ടുപോകാൻ ഒരുങ്ങുകയാണ്. 2027 ന്റെ തുടക്കത്തിൽ തങ്ങളുടെ പുതിയ മൂന്ന്-വരി ഡി-എസ്യുവി ഇന്ത്യയിൽ പുറത്തിറക്കുമെന്ന് കമ്പനി സ്ഥിരീകരിച്ചു. നിസ്സാന്റെ ഇന്ത്യയിലെ ഭാവി ലോഞ്ച് പദ്ധതികളുടെ അവസാനവും ഏറ്റവും പ്രധാനപ്പെട്ടതുമായ ഭാഗമായി ഈ എസ്യുവി കണക്കാക്കപ്പെടുന്നു. അതിന്റെ വിശദാംശങ്ങൾ പരിശോധിക്കാം.
2024-ൽ എക്സ്-ട്രെയിൽ എസ്യുവിയുമായി നിസ്സാൻ ഇന്ത്യയിൽ പുതിയ ഘട്ടം ആരംഭിച്ചു. ഇതിനെ തുടർന്ന് മാഗ്നൈറ്റ് ഫെയ്സ്ലിഫ്റ്റ് വന്നു. ഇപ്പോൾ , 2027-ൽ എത്തുന്ന പുതിയ മൂന്നുവരി ഡി-എസ്യുവി നിസാന്റെ മൊത്തത്തിലുള്ള എസ്യുവി തന്ത്രം പൂർത്തിയാക്കും. കമ്പനിയുടെ നിലവിലുള്ളതും വരാനിരിക്കുന്നതുമായ നിരയിൽ ടെക്ടണിന് മുകളിലായിരിക്കും ഈ എസ്യുവി, അതായത് നിസാന്റെ ഇതുവരെയുള്ളതിൽ വച്ച് ഏറ്റവും പ്രീമിയം നിർമ്മിത എസ്യുവിയാണിത്.
രസകരമെന്നു പറയട്ടെ, ഈ നിസ്സാൻ 3-വരി എസ്യുവിയുടെ മറ്റൊരു പതിപ്പ് റെനോ ബ്രാൻഡിന് കീഴിൽ പുറത്തിറക്കും. രണ്ട് കാറുകളും ഒരേ പ്ലാറ്റ്ഫോമിൽ നിർമ്മിക്കപ്പെടുകയും ഏകദേശം ഒരേ സമയം ഇന്ത്യൻ വിപണിയിൽ എത്തുകയും ചെയ്യും. അന്താരാഷ്ട്ര വിപണികളിൽ ലഭ്യമായ ഡാസിയ ബിഗ്സ്റ്റർ അല്ലെങ്കിൽ റെനോ ബോറിയൽ എന്നിവയിൽ നിന്ന് പ്രചോദനം ഉൾക്കൊണ്ടാണ് ഈ എസ്യുവി നിർമ്മിച്ചിരിക്കുന്നതെന്നാണഅ റിപ്പോർട്ടുകൾ. ഇത് അതിന്റെ വലിപ്പം, ശക്തമായ റോഡ് സാന്നിധ്യം, പ്രീമിയം ആകർഷണം എന്നിവയെക്കുറിച്ച് നമുക്ക് ഒരു ധാരണ നൽകുന്നു.
ഈ എസ്യുവി ഇന്ത്യയിൽ തന്നെ നിർമ്മിക്കുമെന്ന് നിസാൻ വ്യക്തമാക്കി. പ്രധാനമായി, ഇത് ആർഎച്ച്ഡി (റൈറ്റ് ഹാൻഡ് ഡ്രൈവ്), എൽഎച്ച്ഡി (ലെഫ്റ്റ് ഹാൻഡ് ഡ്രൈവ്) വിപണികളിലേക്ക് കയറ്റുമതി ചെയ്യും. ഇത് നിസ്സാന്റെ ഇന്ത്യൻ പ്ലാന്റുകളെ ആഗോള കേന്ദ്രങ്ങളായി വികസിപ്പിക്കാനുള്ള ഉദ്ദേശ്യത്തെ വ്യക്തമാക്കുന്നു. പുതിയ നിസാൻ മൂന്നുവരി ഡി-എസ്യുവിയിൽ ഒരു ഹൈബ്രിഡ് എഞ്ചിൻ ഓപ്ഷൻ ഉണ്ടാകാൻ സാധ്യതയുണ്ട്. മെച്ചപ്പെട്ട ഇന്ധനക്ഷമത, കുറഞ്ഞ മലിനീകരണം, ശക്തമായ പ്രകടനം എന്നിവ ഇത് ലക്ഷ്യമിടുന്നു. മികച്ച പവർ, സ്ഥലം, ഇന്ധനക്ഷമത എന്നിവ ആഗ്രഹിക്കുന്ന ഉപഭോക്താക്കളെ ഈ എസ്യുവി ലക്ഷ്യമിടുന്നു.
പുറത്തിറങ്ങുമ്പോൾ, ഈ നിസ്സാൻ എസ്യുവി അൽകാസർ, കാരൻസ് ആൻഡ് ക്ലാവിസ്, XUV700, എംജി ഹെക്ടർ പ്ലസ് തുടങ്ങിയ ജനപ്രിയ എസ്യുവികളുമായി നേരിട്ട് മത്സരിക്കും. അതായത്, ഇന്ത്യയിലെ ഏറ്റവും ചൂടേറിയതും അതിവേഗം വളരുന്നതുമായ 3-വരി എസ്യുവി സെഗ്മെന്റിൽ മത്സരം നേരിട്ട് ഉണ്ടാകും. മാരുതി, ഹ്യുണ്ടായ്, ടാറ്റ, കിയ തുടങ്ങിയ കമ്പനികൾ നാലു മീറ്ററിൽ താഴെയുള്ള അല്ലെങ്കിൽ കോംപാക്റ്റ് എസ്യുവികളിൽ കൂടുതൽ സവിശേഷതകൾ ചേർക്കുന്നതിൽ ശ്രദ്ധ കേന്ദ്രീകരിക്കുമ്പോൾ, നിസ്സാൻ-റെനോ സഖ്യം നേരിട്ട് പ്രീമിയം, വലിയ എസ്യുവി വിഭാഗത്തെ ലക്ഷ്യമിടുന്നു. ചെറിയ എസ്യുവികൾക്കപ്പുറം പൂർണ്ണ വലുപ്പത്തിലുള്ള, കുടുംബ സൗഹൃദ, ശക്തമായ എസ്യുവികൾ ഇപ്പോൾ തിരയുന്ന ഉപഭോക്താക്കളെ ആകർഷിക്കുക എന്നതാണ് ഈ തന്ത്രത്തിന്റെ ലക്ഷ്യം.
വില സംബന്ധിച്ച് ഇതുവരെ ഔദ്യോഗിക വിവരങ്ങളൊന്നും ലഭിച്ചിട്ടില്ല. എങ്കിലും നിസാന്റെ ഈ മൂന്നുവരി ഡി-എസ്യുവി 18 ലക്ഷം മുതൽ 25 ലക്ഷം രൂപ വരെ എക്സ്-ഷോറൂം വിലയിൽ വിപണിയിൽ അവതരിപ്പിച്ചേക്കും എന്നാണ് റിപ്പോർട്ടുകൾ.