ഒക്ടോബറിൽ റെനോയുടെ തലവര മാറ്റിയ ആ താരം

2025 ഒക്ടോബറിൽ റെനോ 4,672 യൂണിറ്റുകൾ വിറ്റഴിച്ച് 21 ശതമാനം വാർഷിക വളർച്ച രേഖപ്പെടുത്തി. റെനോ ട്രൈബർ 3,170 യൂണിറ്റുകളുമായി വിൽപ്പനയുടെ പകുതിയിലധികം സംഭാവന നൽകി മികച്ച പ്രകടനം കാഴ്ചവെച്ചപ്പോൾ, കിഗറിന്റെയും ക്വിഡിന്റെയും വിൽപ്പനയിൽ ഇടിവുണ്ടായി.

2025 ഒക്ടോബർ ഫ്രഞ്ച് വാഹന ബ്രാൻഡായ റെനോയ്ക്ക് ഒരു മികച്ച മാസമായിരുന്നു. ഈ മാസം കമ്പനി 4,672 യൂണിറ്റുകൾ വിറ്റഴിച്ചു, കഴിഞ്ഞ വർഷത്തെ അപേക്ഷിച്ച് 21 ശതമാനം വളർച്ച രേഖപ്പെടുത്തി. കൂടാതെ, സെപ്റ്റംബറിനെ അപേക്ഷിച്ച് റെനോയുടെ വിൽപ്പനയിൽ 10 ശതമാനം (MoM) വർധനവുണ്ടായി. കമ്പനിയുടെ ഗെയിം ചേഞ്ചർ വാഹനം റെനോ ട്രൈബർ ആയിരുന്നു. റെനോയുടെ വിൽപ്പനയുടെ പകുതിയിലധികവും ട്രൈബ‍ർ മാത്രമായിരുന്നു എന്നതാണ് ശ്രദ്ധേയം. 

അതിന്റെ വിശദാംശങ്ങൾ വിശദമായി പരിശോധിക്കാം. ഇന്ത്യൻ വാഹന വിപണിയിൽ കഴിഞ്ഞ വർഷത്തെ പോലെ തന്നെ 1.1 ശതമാനം വിപണി വിഹിതവുമായി റെനോ പത്താം സ്ഥാനത്താണ് . അതേസമയം കഴിഞ്ഞ വർഷത്തെ പോലെ തന്നെ 0.6 ശതമാനം വിപണി വിഹിതവുമായി നിസാൻ പന്ത്രണ്ടാം സ്ഥാനത്താണ്. നിലവിൽ ട്രൈബർ, കിഗർ, ക്വിഡ് എന്നിവയാണ് റെനോയുടെ നിരയിൽ ഉൾപ്പെടുന്നത്.

അതേസമയം റെനോ വലിയൊരു വിപ്ലവത്തിന് തയ്യാറെടുക്കുകയാണ്. പുതിയ ഡസ്റ്റർ 2026 ജനുവരി 26 ന് പുറത്തിറങ്ങും. ഇത് വീണ്ടും എസ്‌യുവി വിപണിയെ ഇളക്കിമറിക്കുമെന്ന് പ്രതീക്ഷിക്കുന്നു. 2025 ഒക്ടോബറിൽ മൂന്ന് റെനോ കാറുകളുടെയും പ്രകടനം വ്യത്യസ്‍തമായിരുന്നു. ട്രൈബർ ഒരു റെക്കോർഡ് സൃഷ്‍ടിച്ചപ്പോൾ, കിഗറും ക്വിഡും നിരാശപ്പെടുത്തി.

റെനോ ട്രൈബർ 3,170 യൂണിറ്റ് വിൽപ്പന കൈവരിച്ചു, ഇത് വാർഷികാടിസ്ഥാനത്തിൽ 50 ശതമാനം വളർച്ചയും പ്രതിമാസ വിൽപ്പനയിൽ 23 ശതമാനം വളർച്ചയുമാണ്. ട്രൈബർ മികച്ച പ്രകടനം കാഴ്ചവച്ചു. വാർഷികാടിസ്ഥാനത്തിലും പ്രതിമാസ വിൽപ്പനയിലും പോസിറ്റീവ് വളർച്ച കൈവരിച്ച ഒരേയൊരു റെനോ കാറായിരുന്നു ഇത്.

അതേസമയം റെനോ കിഗറിന്റെ വിൽപ്പനയിൽ തുടർച്ചയായ ഇടിവ് സംഭവിച്ചു. കഴിഞ്ഞ മാസം വിൽപ്പന 948 യൂണിറ്റായിരുന്നു. പ്രതിവർഷം 10 ശതമാനം കുറവും പ്രതിമാസം 19 ശതമാനം കുറവും സംഭവിച്ചു. റെനോ ക്വിഡിന്റെ വിൽപ്പന 554 യൂണിറ്റുകൾ ആയിരുന്നു. കഴിഞ്ഞ വർഷത്തെ അപേക്ഷിച്ച് 22 ശതമാനം ഇടിവ്. എങ്കിലും പ്രതിമാസ (MoM) അടിസ്ഥാനത്തിൽ എട്ട് ശതമാനം നേരിയ വീണ്ടെടുക്കൽ ഉണ്ടായി. മൈക്രോ-ഹാച്ച്ബാക്ക് വിപണിയിലെ ഡിമാൻഡ് കുറയുന്നത് ക്വിഡിന്റെ വിൽപ്പനയിൽ വ്യക്തമായി കാണാം.