ടാറ്റയുടെ അപ്രതീക്ഷിത നീക്കം: പഞ്ച് വിലയിൽ മാറ്റം

ടാറ്റ മോട്ടോഴ്‌സ് തങ്ങളുടെ ജനപ്രിയ മോഡലായ പഞ്ചിന്റെ എല്ലാ വേരിയന്റുകൾക്കും വില വർധിപ്പിച്ചു. പെട്രോൾ, സിഎൻജി, ഇവി മോഡലുകൾക്ക് തിരഞ്ഞെടുത്ത വേരിയന്റുകളിൽ 20,000 രൂപ വരെയാണ് വർധന. ഫീച്ചറുകളിലോ മെക്കാനിക്കൽ സംവിധാനങ്ങളിലോ മാറ്റങ്ങളൊന്നും വരുത്താതെയാണ് ഈ വില വർധന നടപ്പിലാക്കിയിരിക്കുന്നത്.

ഇന്ത്യൻ വിപണിയിൽ ടാറ്റ മോട്ടോഴ്‌സിന്റെ ഏറ്റവും ജനപ്രിയ മോഡലുകളിലൊന്നാണ് പഞ്ച്. പെട്രോൾ, സിഎൻജി പതിപ്പുകൾക്ക് പുറമെ ഇലക്ട്രിക് വാഹന വിപണിയിൽ ടാറ്റയുടെ സാന്നിധ്യം ശക്തമാക്കുന്നതിലും പഞ്ച് ഇവി നിർണായക പങ്കുവഹിക്കുന്നുണ്ട്. ഇപ്പോഴിതാ പഞ്ച് ശ്രേണിയിലെ എല്ലാ മോഡലുകൾക്കും കമ്പനി വില വർധിപ്പിച്ചിരിക്കുകയാണ്. തിരഞ്ഞെടുത്ത വേരിയന്റുകൾക്ക് 20,000 രൂപ വരെയാണ് വില വർധിച്ചിരിക്കുന്നത്. പുതിയ വിലകൾ ഉടൻ പ്രാബല്യത്തിൽ വരും. അതിനാൽ പഞ്ചോ പഞ്ച് ഇവിയോ വാങ്ങാൻ പദ്ധതിയിടുന്നവർ ഇനി പുതുക്കിയ വില അനുസരിച്ച് കൂടുതൽ തുക മുടക്കേണ്ടിവരും.

പഞ്ചിന്റെ വിലയിൽ 10,000 രൂപ വരെ വർധന

പെട്രോൾ എൻജിനുള്ള ടാറ്റ പഞ്ചിന്റെ വിവിധ വേരിയന്റുകൾക്ക് 5,000 രൂപ മുതൽ 10,000 രൂപ വരെയാണ് വില വർധിപ്പിച്ചിരിക്കുന്നത്. വില പരിഷ്‍കരണത്തിന് ശേഷം കോംപാക്ട് എസ്‌യുവിയുടെ എക്സ്-ഷോറൂം വില 5.75 ലക്ഷം രൂപയിൽ ആരംഭിച്ച് ഉയർന്ന വേരിയന്റിന് 10.77 ലക്ഷം രൂപ വരെ എത്തും. പുതിയ വിലകൾ ഉടൻ പ്രാബല്യത്തിൽ വരുന്നതിനാൽ, വാഹനം ബുക്ക് ചെയ്യാൻ ഒരുങ്ങുന്നവർ പുതുക്കിയ വില കണക്കിലെടുക്കേണ്ടിവരും.

പഞ്ച് ഇവിക്ക് 20,000 രൂപ വരെ വില കൂടി

പഞ്ച് ഇവിയുടെ വിവിധ വേരിയന്റുകൾക്കും ടാറ്റ മോട്ടോഴ്‌സ് വില വർധിപ്പിച്ചിട്ടുണ്ട്. സ്‍മാർട്ട്, അഡ്വഞ്ചർ, എംപവേർഡ് എന്നീ പ്രധാന വേരിയന്റ് ശ്രേണികളിലാണ് വാഹനം ലഭിക്കുന്നത്. 30 കിലോവാട്ട്-അവർ, 40 കിലോവാട്ട്-അവർ ബാറ്ററി പാക്ക് ഓപ്ഷനുകളും ലഭ്യമാണ്. 30 കിലോവാട്ട്-അവർ ബാറ്ററിയുള്ള സ്‍മാർട്ട്, സ്‍മാർട്ട് പ്ലസ് വേരിയന്റുകൾക്ക് 10,000 രൂപയാണ് വില വർധിച്ചത്. അതേസമയം 40 കിലോവാട്ട്-അവർ ബാറ്ററിയുള്ള സ്മാർട്ട്, സ്മാർട്ട് പ്ലസ്, അഡ്വഞ്ചർ, എംപവേർഡ്, എംപവേർഡ് പ്ലസ് എസ് വേരിയന്റുകൾക്ക് 20,000 രൂപ വീതം വില കൂടി. വില പരിഷ്‍കരണത്തിന് ശേഷം ടാറ്റ പഞ്ച് ഇവിയുടെ എക്സ്-ഷോറൂം വില 9.79 ലക്ഷം രൂപ മുതൽ 12.99 ലക്ഷം രൂപ വരെയാണ്.

ഫീച്ചറുകളിലും പവർട്രെയിനിലും മാറ്റമില്ല

വില വർധിപ്പിച്ചെങ്കിലും പഞ്ചിലോ പഞ്ച് ഇവിയിലോ പ്രധാന ഫീച്ചറുകളിലോ മെക്കാനിക്കൽ സംവിധാനങ്ങളിലോ മാറ്റങ്ങളൊന്നും വരുത്തിയിട്ടില്ലെന്നതാണ് ശ്രദ്ധേയം. അതായത് നിലവിലുള്ള ഫീച്ചറുകളും പവർട്രെയിൻ സംവിധാനവും തുടരും. 30 കിലോവാട്ട്-അവർ ബാറ്ററി പാക്കിനൊപ്പം 88 പിഎസ് കരുത്തുള്ള ഇലക്ട്രിക് മോട്ടോറാണ് പഞ്ച് ഇവിയുടെ അടിസ്ഥാന പതിപ്പിലുള്ളത്. വലിയ 40 കിലോവാട്ട്-അവർ ബാറ്ററി പാക്കിനൊപ്പം 130 പിഎസ് കരുത്തുള്ള മോട്ടോറും ലഭിക്കും. കമ്പനിയുടെ അവകാശവാദമനുസരിച്ച് 30 കിലോവാട്ട്-അവർ പതിപ്പിന് ഒറ്റ ചാർജിൽ 375 കിലോമീറ്റർ വരെ സഞ്ചരിക്കാനാകും. 40 കിലോവാട്ട്-അവർ പതിപ്പിന് 468 കിലോമീറ്റർ വരെ റേഞ്ചാണ് ലഭിക്കുക.

പെട്രോൾ, സിഎൻജി പതിപ്പുകളും

ഇലക്ട്രിക് വാഹനത്തിലേക്ക് മാറാൻ താൽപര്യമില്ലാത്ത ഉപഭോക്താക്കൾക്ക് പെട്രോൾ, സിഎൻജി പതിപ്പുകളിലും പഞ്ച് സ്വന്തമാക്കാം. വേരിയന്റിനെ ആശ്രയിച്ച് മാനുവൽ, എഎംടി ഗിയർബോക്സ് ഓപ്ഷനുകളും ലഭ്യമാണ്.

ഇലക്ട്രിക് വാഹന വിപണിയിൽ ടാറ്റ മുന്നിൽ

ഇന്ത്യയിലെ ഇലക്ട്രിക് വാഹന വിപണിയിൽ ടാറ്റ മോട്ടോഴ്‌സിന്റെ ശക്തമായ സാന്നിധ്യം തുടരുകയാണ്. 2026 ഓഗസ്റ്റിലെ ഇലക്ട്രിക് കാർ രജിസ്ട്രേഷൻ കണക്കുകളിലും ടാറ്റ മുന്നിലെത്തി. ഫെഡറേഷൻ ഓഫ് ഓട്ടോമൊബൈൽ ഡീലേഴ്‌സ് അസോസിയേഷൻസിന്റെ കണക്കുകൾ പ്രകാരം 2026 ഓഗസ്റ്റിൽ രാജ്യത്ത് ആകെ 30,686 ഇലക്ട്രിക് കാറുകളാണ് രജിസ്റ്റർ ചെയ്തത്. മുൻ വർഷത്തെ ഇതേ കാലയളവിനെ അപേക്ഷിച്ച് 52 ശതമാനം വർധനയാണിത്.

ടാറ്റയ്ക്ക് 43 ശതമാനം വിപണി വിഹിതം

ഓഗസ്റ്റിൽ 13,158 ഇലക്ട്രിക് കാറുകളുടെ രജിസ്ട്രേഷനുമായി ടാറ്റ മോട്ടോഴ്‌സ് ഒന്നാം സ്ഥാനത്ത് തുടർന്നു. പഞ്ച് ഇവിയും നെക്സോൺ ഇവിയും കമ്പനിയുടെ ഇലക്ട്രിക് വാഹന വിൽപ്പനയിൽ വലിയ സംഭാവന നൽകി. ഏകദേശം 43 ശതമാനം ഇലക്ട്രിക് വാഹന വിപണി വിഹിതമാണ് ടാറ്റ മോട്ടോഴ്‌സിനുണ്ടായിരുന്നത്. 6,464 രജിസ്ട്രേഷനുകളുമായി മഹീന്ദ്ര രണ്ടാം സ്ഥാനത്തും 4,622 യൂണിറ്റുകളുമായി ജെഎസ്ഡബ്ല്യു എംജി മോട്ടോർ മൂന്നാം സ്ഥാനത്തുമെത്തി. ഓഗസ്റ്റിലെ രാജ്യത്തെ മൊത്തം ഇലക്ട്രിക് കാർ വിൽപ്പനയുടെ ഏകദേശം 64 ശതമാനവും ടാറ്റ മോട്ടോഴ്‌സും മഹീന്ദ്രയും ചേർന്നാണ് നേടിയത്. ഇന്ത്യയിലെ ഇലക്ട്രിക് വാഹന വിപണിയിൽ ടാറ്റയുടെ ആധിപത്യം തുടരുന്നതിന്റെ സൂചന കൂടിയാണിത്.