ഇന്ത്യൻ റോഡുകളിൽ പരീക്ഷണത്തിൽ ടാറ്റ സിയറ

ടാറ്റ മോട്ടോഴ്‌സ് സിയറ എന്ന ഐക്കണിക് നെയിംപ്ലേറ്റ് തിരികെ കൊണ്ടുവരുന്നു. പുതിയ സിയറ ഇലക്ട്രിക്, ഐസിഇ പതിപ്പുകളിൽ ലഭ്യമാകും, ആദ്യം ഇലക്ട്രിക് പതിപ്പ് പുറത്തിറങ്ങും.

സിയറ എന്ന ജനപ്രിയ ഐക്കണിക് നെയിംപ്ലേറ്റ് തിരികെ കൊണ്ടുവരാൻ ഒരുങ്ങുകയാണ് ടാറ്റ മോട്ടോഴ്‌സ്. ഇന്ത്യയിലെ പരമ്പരാഗത എസ്‌യുവി പ്രേമികളെയും പുതുതലമുറയിലെ ഇവി ഉപഭോക്താക്കളുടെയും ആവശ്യങ്ങൾ നിറവേറ്റുക എന്ന ലക്ഷ്യത്തോടെ ഗൃഹാതുരത്വവും പുതുമയും സംയോജിപ്പിക്കുന്നതാണ് ടാറ്റ സിയറയുടെ തിരിച്ചുവരവ്. പുതിയ ടാറ്റ സിയറ എസ്‌യുവി, പ്രത്യേകിച്ച് അതിന്‍റെ ഇലക്ട്രിക് പതിപ്പ്, ഇന്ത്യയിൽ റോഡ് പരീക്ഷണങ്ങൾക്ക് വിധേയമാകുന്നത് കണ്ടെത്തിയിട്ടുണ്ട്. പരീക്ഷണത്തിന് ഉപയോഗിച്ച പ്രോട്ടോടൈപ്പ് മോഡൽ വളരെയധികം മറച്ചനിലയിൽ ആയിരുന്നു. എങ്കിലും, അന്തിമ രൂപം എങ്ങനെയായിരിക്കുമെന്ന് അത് ചില വിവരങ്ങൾ നൽകുന്നു.

ഒരു പൂർണ്ണ-ഇലക്ട്രിക് പതിപ്പ്, ഒരു ആന്തരിക ജ്വലന എഞ്ചിൻ എന്നിങ്ങനെ സിയറ രണ്ട് രൂപങ്ങളിലാണ് വികസിപ്പിച്ചുകൊണ്ടിരിക്കുന്നത്. ടാറ്റ ആദ്യം ഇലക്ട്രിക് പതിപ്പ് അവതരിപ്പിക്കുമെന്ന് പ്രതീക്ഷിക്കുന്നു. ഇത് ബ്രാൻഡിന്റെ മുൻനിര ഇവി ആയി എത്തും. കർവ്വ് ഇവി , ഹാരിയർ ഇവി എന്നിവയ്ക്ക് മുകളിലായി സ്ഥാനം പിടിക്കും. സമീപ വർഷങ്ങളിൽ ശക്തമായ വളർച്ച കൈവരിച്ച ടാറ്റയുടെ ഇലക്ട്രിക് വാഹന നിരയെ ഇത് കൂടുതൽ ശക്തിപ്പെടുത്തും.

കാമഫ്ലേജ് ഉപയോഗിച്ച് മറച്ച നിലയിൽ ആയിരുന്നെങ്കിലും ടെസ്റ്റ് പതിപ്പ് ചില വേറിട്ട ഡിസൈൻ ഘടകങ്ങളെക്കുറിച്ച് സൂചന നൽകുന്നു. ഉയർന്നതും പരന്നതുമായ മുൻഭാഗം, ലംബമായി ക്രമീകരിച്ചിരിക്കുന്ന ചതുരാകൃതിയിലുള്ള എൽഇഡി ഹെഡ്‌ലാമ്പുകൾ, എഡിഎഎസ് സവിശേഷതകൾക്കായി ഒരു വലിയ എയർ ഇൻടേക്ക് ഏരിയ ഹൗസിംഗ് സെൻസറുകൾ തുടങ്ങിയവ ഇതിൽ ഉൾപ്പെടുന്നു. ഫ്ലഷ്-മൗണ്ടഡ് ഡോർ ഹാൻഡിലുകൾ, ഇന്‍റഗ്രേറ്റഡ് നമ്പർ പ്ലേറ്റ് ഹോൾഡറുള്ള ഒരു പിൻ ബമ്പർ, റാപ്പ് എറൗണ്ട് എൽഇഡി ടെയിൽ ലാമ്പുകൾ തുടങ്ങിയവയാണ് മറ്റ് ശ്രദ്ധേയമായ സ്റ്റൈലിംഗ് സൂചനകൾ. ഓട്ടോ എക്സ്പോ 2025 ൽ പ്രദർശിപ്പിച്ച കൺസെപ്റ്റിൽ നിന്ന് ഡിസൈൻ പരിണമിച്ചതായി തോന്നുന്നു. എയ്‌റോ-സ്റ്റൈൽ അലോയി വീലുകൾ, റൂഫ്-മൗണ്ടഡ് സ്‌പോയിലർ, ഒരു ഷാർക്ക് ഫിൻ ആന്‍റിന തുടങ്ങിയവ വേറിട്ടുനിൽക്കുന്നു.

സിയറ ഇവിയുടെ ക്യാബിൻ സാങ്കേതികവിദ്യകളാൽ സമ്പന്നമായ ഒരു അനുഭവം പ്രദാനം ചെയ്യാൻ സാധ്യതയുണ്ട്. വയർലെസ് കണക്റ്റിവിറ്റിയുള്ള വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, പൂർണ്ണമായും ഡിജിറ്റൽ ഡ്രൈവർ ഡിസ്‌പ്ലേ, പനോരമിക് സൺറൂഫ്, ഫ്ലോട്ടിംഗ്-സ്റ്റൈൽ സെന്‍റർ കൺസോൾ തുടങ്ങിയവ വാഹനത്തിൽ ലഭിക്കുമെന്ന് പ്രതീക്ഷിക്കാാം. സ്റ്റിയറിംഗ് വീലിൽ പുതിയ ടാറ്റ ഡിസൈൻ തീം സ്വീകരിക്കാൻ സാധ്യതയുണ്ട്. അതിൽ പ്രകാശിതമായ ലോഗോയും ഹാപി‍റ്റിക് ടച്ച് നിയന്ത്രണങ്ങളും ഉൾപ്പെടുന്നു. അധിക പ്രീമിയം സവിശേഷതകളിൽ വെന്‍റിലേറ്റഡ് ഫ്രണ്ട് സീറ്റുകൾ, 360-ഡിഗ്രി ക്യാമറ സിസ്റ്റം, അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റങ്ങളുടെ (ADAS) പൂർണ്ണ സ്യൂട്ട് എന്നിവ ഉൾപ്പെടാം.

സിയറ ഇവിക്ക് പൂർണ്ണ ചാർജിൽ ഏകദേശം 500 കിലോമീറ്റർ ദൂരം സഞ്ചരിക്കാൻ കഴിയുമെന്ന് പ്രതീക്ഷിക്കുന്നു. അതേസമയം ഐസിഇ പതിപ്പിന് 2.0 ലിറ്റർ ഡീസൽ എഞ്ചിനും 1.5 ലിറ്റർ ടർബോ-പെട്രോൾ ഓപ്ഷനും നൽകാൻ സാധ്യതയുണ്ട്. ഇവ രണ്ടും മാനുവൽ, ഓട്ടോമാറ്റിക് ട്രാൻസ്‍മിഷനുകളുമായി ഘടിപ്പിച്ചിരിക്കുന്നു.