ടൈഗൺ ഫെയ്‌സ്‌ലിഫ്റ്റ് ടീസർ; കാത്തിരിക്കുന്നത് വൻ മാറ്റങ്ങൾ

വരാനിരിക്കുന്ന ഫോക്‌സ്‌വാഗൺ ടൈഗൺ ഫെയ്‌സ്‌ലിഫ്റ്റിന്റെ ആദ്യ ടീസർ പുറത്തിറങ്ങി, 2026 ഏപ്രിൽ 9-ന് വാഹനം വിപണിയിലെത്തുമെന്ന് സ്ഥിരീകരിച്ചു. കോസ്മെറ്റിക്, ഫീച്ചർ അപ്‌ഗ്രേഡുകൾക്കൊപ്പം, 1.0L എഞ്ചിന് പുതിയ 8-സ്പീഡ് ഓട്ടോമാറ്റിക് ട്രാൻസ്മിഷൻ ലഭിക്കുമെന്നതാണ് പ്രധാന ആകർഷണം 

വരാനിരിക്കുന്ന ഫോക്‌സ്‌വാഗൺ ടൈഗൺ ഫെയ്‌സ്‌ലിഫ്റ്റിന്റെ ആദ്യ ടീസർ പുറത്തുവന്നു. 2026 ഏപ്രിൽ 9 ന് ഈ മിഡ് സൈസ് എസ്‌യുവി വിൽപ്പനയ്‌ക്കെത്തുമെന്ന് കമ്പനി സ്ഥിരീകരിച്ചു. ഡിസൈൻ വിശദാംശങ്ങൾ വ്യക്തം അല്ല എങ്കിലും നിലവിലുള്ള മോഡലിന് സമാനമായി കാണപ്പെടുന്ന അതിന്റെ സിലൗറ്റ് ടീസർ പ്രദർശിപ്പിച്ചിരിക്കുന്നു. പുതിയ ഫോക്‌സ്‌വാഗൺ ടൈഗൺ 2026 ഫെയ്‌സ്‌ലിഫ്റ്റിന് പുതിയ സ്കോഡ കുഷാക്കിൽ കാണുന്നതുപോലെയുള്ള കോസ്‌മെറ്റിക്, ഫീച്ചർ അപ്‌ഗ്രേഡുകൾ ലഭിക്കുമെന്നും 8-സ്പീഡ് ഓട്ടോമാറ്റിക് ട്രാൻസ്‍മിഷൻ കൂട്ടിച്ചേർക്കുമെന്നും പ്രതീക്ഷിക്കുന്നു.

മുൻപ് പുറത്തുവന്ന സ്പൈ ചിത്രങ്ങൾ സൂചിപ്പിക്കുന്നത് അപ്ഡേറ്റ് ചെയ്ത ടൈഗണിൽ എൽഇഡി ലൈറ്റ് ബാറും മധ്യഭാഗത്ത് ഒരു പ്രകാശിത ഫോക്സ്‌വാഗൺ ബാഡ്‍ജും ഉള്ള ചെറുതായി പരിഷ്‍കരിച്ച ഫ്രണ്ട് ഗ്രില്ലും ഉണ്ടായിരിക്കുമെന്നാണ്. പുനർരൂപകൽപ്പന ചെയ്ത എൽഇഡി ഹെഡ്‌ലാമ്പുകളും ടെയിൽലാമ്പുകളും ലഭിക്കാനും സാധ്യതയുണ്ട്. പുതിയ സെറ്റ് അലോയ് വീലുകൾക്കൊപ്പം ഫോഗ് ലാമ്പുകളും അപ്‌ഡേറ്റ് ചെയ്തേക്കാം.

അളവുകളും നിറങ്ങളും അളവുകളുടെ കാര്യത്തിൽ, 2026 ഫോക്‌സ്‌വാഗൺ ടൈഗൺ മാറ്റമില്ലാതെ തുടരുമെന്ന് പ്രതീക്ഷിക്കുന്നു. ഇടത്തരം എസ്‌യുവിക്ക് 4,221 എംഎം നീളവും 1,760 എംഎം വീതിയും 1,612 എംഎം ഉയരവും ഉണ്ട്. വീൽബേസ് 2,651 എംഎം ആണ്. ഇതിന് 188 എംഎം (ലോഡുചെയ്യാതെ) ഗ്രൗണ്ട് ക്ലിയറൻസും 385 ലിറ്റർ ബൂട്ട് സ്‌പേസും ഉണ്ട്, ഇത് 1,450 ലിറ്ററായി വികസിപ്പിക്കാനാകും. പുതിയ എക്സ്റ്റീരിയർ കളർ ഓപ്ഷനുകളിൽ ഫോക്‌സ്‌വാഗൺ ഫെയ്‌സ്‌ലിഫ്റ്റ് ചെയ്ത ലൈനപ്പ് അവതരിപ്പിച്ചേക്കാം.

കൂടുതൽ സവിശേഷതകൾ ഇന്റീരിയർ ലേഔട്ട് മാറ്റമില്ലാതെ തുടരും. എങ്കിലും പുതിയ ടൈഗണിൽ പുതിയ 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ, 10.2 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, ഓട്ടോമാറ്റിക് ക്ലൈമറ്റ് കൺട്രോൾ, വയർലെസ് ഫോൺ ചാർജർ, മസാജിംഗ് ഫംഗ്ഷനോടുകൂടിയ പിൻ സീറ്റുകൾ എന്നിവ ലഭിക്കാൻ സാധ്യതയുണ്ട്.

ഒരു പുതിയ പവർട്രെയിൻ ഓപ്ഷൻ? പുതിയ ഫോക്‌സ്‌വാഗൺ ടൈഗൺ 2026 ഫെയ്‌സ്‌ലിഫ്റ്റ് നിലവിലുള്ള 1.0L ടർബോ, 1.5L ടർബോ പെട്രോൾ എഞ്ചിൻ ഓപ്ഷനുകളുമായി വരുമെന്ന് പ്രതീക്ഷിക്കുന്നു. 1.0L TSI എഞ്ചിൻ പരമാവധി 115bhp പവർ നൽകുന്നു, അതേസമയം 1.5L TSI യൂണിറ്റ് 150bhp പവർ നൽകുന്നു. 1.0L ടർബോചാർജ്ഡ് പെട്രോൾ എഞ്ചിന് പുതിയ 8-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് ലഭിക്കും. അതേസമയം 1.5L ടർബോ മോട്ടോർ 7-സ്പീഡ് ഡിസിടി ഓട്ടോമാറ്റിക് ട്രാൻസ്മിഷനുമായി വാഗ്ദാനം ചെയ്യുന്നത് തുടരും.