അമ്പരപ്പിക്കുന്നൊരു വാഹനവുമായി മാരുതി
Synopsis
ദില്ലി: ഫെബ്രുവരിയില് നടക്കുന്ന ദില്ലി ഓട്ടോ ഷോയില് മാരുതി സുസുക്കിയുടെ താരം അമ്പരപ്പിക്കുന്ന രൂപമുള്ള ഒരു വാഹനമായിരിക്കുമെന്ന് റിപ്പോര്ട്ടുകള്. 2017ല് ടോക്കിയോ ഓട്ടോ ഷോയില് അവതരിപ്പിച്ച ഇ സര്വൈവര് ആയിരിക്കുമതെന്നാണ് സൂചന.
ഓഫ് റോഡര് എസ്യുവി സെഗ്മെന്റിലേക്ക് ഇ-സര്വൈവറിനെ 45- ആമത് ടോക്കിയോ മോട്ടോര് ഷോയിലാണ് സുസുക്കി അവതരിപ്പിച്ചത്. പൂര്ണമായും ഇലക്ട്രിക് കരുത്തിലുള്ള വാഹനത്തിന്റെ കോണ്സപ്റ്റ് മോഡലാണ് ഇപ്പോള് വാഹനലോകത്തെ ചര്ച്ച.
ഉയര്ന്ന ഗ്രൗണ്ട് ക്ലിയറന്സ്, വലിയ വീല് ആര്ക്ക്, വ്യത്യസ്തമായ അകത്തളം എന്നിവ ഇ-സര്വൈവറിനെ വേറിട്ടതാക്കുന്നു. നിരത്തിലെ ദൃശ്യങ്ങള് ഡ്രൈവറുടെ മുന്നിലെത്തിക്കുന്നത് റിയര്വ്യൂ മിററിന് പകരം ക്യാമറകളാണ്. ഭാരം വളരെ കുറഞ്ഞ മോഡലാണ് ഇ-സര്വൈവര്. ഇതുവഴി പെര്ഫോമെന്സ് വര്ധിപ്പിക്കാന് സാധിക്കുമെന്നാണ് കമ്പനിയുടെ കണക്കുകൂട്ടല്.
രണ്ടു പേര്ക്ക് മാത്രമേ ഈ ഓപ്പണ് റൂഫ് വാഹനത്തില് യാത്ര ചെയ്യാന് സാധിക്കുകയുള്ളൂ. നൂറ് വര്ഷങ്ങള്ക്ക് ശേഷമുള്ള ലോകം മുന്നില് കണ്ടാണ് വാഹനത്തിന്റെ ഡിസൈനെന്നാണ് കമ്പനിയുടെ അവകാശവാദം. തൊണ്ണൂറുകളില് സുസുക്കി വാഹന നിരയിലെ പ്രബലരായിരുന്ന X90, ജിംനി, വിറ്റാര എന്നീ മോഡലുകളുടെ ഡിസൈനില് നിന്ന് പ്രചോദനം ഉള്ക്കൊണ്ടാണ് പുതിയ വാഹനത്തിന്റെ രൂപകല്പന.
ഉടന് വിപണിയിലെത്തുമെന്ന് പ്രതീക്ഷിക്കുന്ന പുതുതലമുറ ജിംനിക്ക് സമാനമായി ലാഡര് ഫ്രെയിമിലാണ് വാഹനത്തിന്റെ നിര്മാണം. 2020-ല് കമ്പനിയുടെ നൂറാം വാര്ഷികാഘോഷ വേളയില് ഇ-സര്വൈവര് പ്രൊഡക്ഷന് സ്പെക്കിന്റെ നിര്മാണം ആരംഭിക്കും. അതിനാല് ബിഎംഡബ്യു വിഷന് 100 കോണ്സെപ്റ്റിന് സമാനമായി സുസുക്കിയുടെ നൂറാം വാര്ഷിക സ്പെഷ്യല് പതിപ്പായി ഇ-സര്വൈര് പുറത്തിറക്കിയേക്കുമെന്നാണ് പ്രതീക്ഷിക്കുന്നത്. ഈ ഇലക്ട്രിക് കൺസെപ്റ്റ് മോഡലിനൊപ്പം മൂന്നാം തലമുറ സ്വിഫ്റ്റ് ഉൾപ്പടെ 14 ഓളം വാഹനങ്ങളാണ് ഓട്ടോ എക്സ്പോയിൽ മാരുതിയുടെ പവലിയനിലെത്തുകയെന്നാണ് റിപ്പോര്ട്ടുകള്.
ഏറ്റവും പുതിയ Automobile News, ഏറ്റവും പുതിയ Newly launched cars reviews in Malayalam തുടങ്ങിയവ മലയാളത്തിൽ അറിയാൻ Asianet News Malayalam. കാറുകൾ, ബൈക്കുകൾ, ഇലക്ട്രിക് വാഹനങ്ങൾ, ഓട്ടോ ടെക്നോളജി തുടങ്ങിയ മേഖലകളിലെ പുതിയ ട്രെൻഡുകളും അപ്ഡേറ്റുകളും ഒരൊറ്റ ക്ലിക്കിൽ.