മാരുതിക്ക് വെല്ലുവിളി ഉയര്‍ത്താന്‍ പ്യൂഷോ

രാജ്യത്തെ ഏറ്റവും വലിയ വാഹന നിർമാതാക്കളായ മാരുതി സുസുക്കിക്ക് കനത്ത വെല്ലുവിളിയുമായി ഫ്രഞ്ച് വാഹന നിർമാതാക്കളായ പ്യൂഷോ. എസ്‌സി1, എസ്‌സി 2, എസ്‌സി 3 എന്നീ വാഹനങ്ങളാണ് ഇന്ത്യയിലേക്ക് എത്തുന്നത്.

2020–ലെ ഓട്ടോഎക്സ്പോയിൽ ഈ വാഹനങ്ങളെ പ്യൂഷോ അവതരിപ്പിച്ചേക്കുമെന്നാണ് റിപ്പോര്‍ട്ടുകള്‍. മാരുതി സുസുക്കിയുടെ കോംപാക്റ്റ് എസ്‌യുവി വിറ്റാര ബ്രെസ, ഹാച്ച്ബാക്ക് സ്വിഫ്റ്റ്, കോംപാക്റ്റ് സെഡാൻ ഡിസയർ എന്നിവയ്ക്കുള്ള എതിരാളികളായിരിക്കും ഈ വാഹനങ്ങളെന്നും സൂചനകളുണ്ട്.

മൂന്നാംതവണയാണ് പ്യൂഷോ ഇന്ത്യയിലേക്ക് വരുന്നത്. പ്രീമിയം സൗകര്യങ്ങളും കുറഞ്ഞ വിലയുമായിരിക്കും പ്യൂഷോയുടെ പുതിയ വാഹനങ്ങളുടെ പ്രത്യേകതയെന്നാണഅ റിപ്പോര്‍ട്ടുകള്‍. പ്രീമിയർ ഓട്ടമൊബീൽസുമായുള്ള സംയുക്ത സംരംഭവുമായിട്ടായിരുന്നു പി എസ് എ ഗ്രൂപ്പിന്റെ ആദ്യ വരവ്. പ്യൂഷോ 309’ എന്ന ഒറ്റ മോഡലിനു ശേഷം ഇന്ത്യൻ വിപണിയോടു വിട പറഞ്ഞ കമ്പനി രണ്ടാം തവണ പുതിയ പ്ലാന്‍റ് സ്ഥാപിക്കാനായി  2011ൽ ഗുജറാത്തിൽ സ്ഥലം വാങ്ങിയിരുന്നു. പക്ഷേ പിന്നീട് പിന്മാറി.

അടുത്തകാലത്ത് ഹിന്ദുസ്ഥാൻ മോട്ടോഴ്സിൽ നിന്ന് അംബാസി‍ഡർ ബ്രാൻഡ് കമ്പനി പിഎസ്എ സ്വന്തമാക്കിയിരുന്നു. മൂന്നാംവരവില്‍ പ്രധാനമായും ഇന്ത്യൻ വിപണിക്കായി വികസിപ്പിക്കുന്ന കാർ മറ്റ് ആസിയാൻ വിപണികളിലും ആഫ്രിക്കൻ വിപണികളിലും പിഎസ്എ അവതരിപ്പിക്കും.