പുതിയ ടിവിഎസ് അപ്പാച്ചെ RTR 160 2V, RTR 180 എന്നിവ ഉടൻ എത്തും

ടിവിഎസ് മോട്ടോർ കമ്പനി പുതുക്കിയ അപ്പാച്ചെ RTR 160 2V, അപ്പാച്ചെ RTR 180 മോട്ടോർസൈക്കിളുകൾ പുറത്തിറക്കാൻ ഒരുങ്ങുകയാണ്. ഡ്യുവൽ-ചാനൽ എബിഎസും പുതിയ നിറങ്ങളും പ്രതീക്ഷിക്കുന്നു. വിലയിൽ നേരിയ വർധനവ് ഉണ്ടാകാൻ സാധ്യതയുണ്ട്.

ടിവിഎസ് മോട്ടോർ കമ്പനി പുതുക്കിയ അപ്പാച്ചെ RTR 160 2V, അപ്പാച്ചെ RTR 180 മോട്ടോർസൈക്കിളുകൾ പുറത്തിറക്കാൻ ഒരുങ്ങുകയാണ്. ഔദ്യോഗിക ലോഞ്ച് തീയതി ഇതുവരെ പ്രഖ്യാപിച്ചിട്ടില്ലെങ്കിലും, പുതുക്കിയ മോഡലുകൾ വരും ആഴ്ചകളിൽ ഷോറൂമുകളിൽ എത്താൻ സാധ്യതയുണ്ട്. വിപണിയിലെത്തുന്നതിന് മുമ്പ്, ആഭ്യന്തര ഇരുചക്ര വാഹന നിർമ്മാതാക്കൾ തങ്ങളുടെ സോഷ്യൽ മീഡിയ ഹാൻഡിൽ വരാനിരിക്കുന്ന അപ്പാച്ചെ ബൈക്കുകളെക്കുറിച്ച് സൂചന നൽകി ഒരു പുതിയ ടീസർ പുറത്തിറക്കി.

ശക്തൻ മാത്രമല്ല ആത്മവിശ്വാസത്തോടെ നയിക്കാൻ ഇപ്പോൾ സജ്ജമാണ് എന്ന അടിക്കുറിപ്പ് ടീസർ വീഡിയോയിൽ കാണാം. ഔദ്യോഗിക വിവരങ്ങൾ ഇപ്പോഴും വെളിപ്പെടുത്തിയിട്ടില്ല. എങ്കിലും, അപ്‌ഡേറ്റ് ചെയ്‌ത ടിവിഎസ് അപ്പാച്ചെ ബൈക്കുകൾക്ക് ഡ്യുവൽ-ചാനൽ എബിഎസും (ആന്റി-ലോക്ക് ബ്രേക്കിംഗ് സിസ്റ്റം) പുതിയ നിറങ്ങളും ലഭിക്കുമെന്ന് പ്രതീക്ഷിക്കുന്നു. ഈ കമ്മ്യൂട്ടർ സ്‌പോർട്‌സ് മോട്ടോർസൈക്കിളുകളിൽ നിലവിൽ സിംഗിൾ-ചാനൽ എബിഎസ് സജ്ജീകരിച്ചിരിക്കുന്നു, ഇത് മുൻ ചക്രത്തിൽ മാത്രം പ്രവർത്തിക്കുന്നു. പിൻ ചക്രത്തിൽ എബിഎസ് ഇല്ലാതെ സ്റ്റാൻഡേർഡ് ഡിസ്‍ക് അല്ലെങ്കിൽ ചില വകഭേദങ്ങളിൽ ഡ്രം ഉണ്ട്.

ബൈക്കിൽ മെക്കാനിക്കൽ മാറ്റങ്ങളൊന്നും പ്രതീക്ഷിക്കുന്നില്ല. 2025 ടിവിഎസ് അപ്പാച്ചെ 160 2V 160 സിസി, സിംഗിൾ സിലിണ്ടർ, എയർ-കൂൾഡ് എഞ്ചിനിൽ നിന്ന് പവർ സ്രോതസ്സ് ചെയ്യുന്നത് തുടരും. ഇത് 8,750 ആർ‌പി‌എമ്മിൽ പരമാവധി 16 ബി‌എച്ച്‌പി പവറും 7,000 ആർ‌പി‌എമ്മിൽ 13.85 എൻ‌എം ടോർക്കും പുറപ്പെടുവിക്കും. ടിവിഎസ് അപ്പാച്ചെ ആർ‌ടി‌ആർ 180 നിലവിലുള്ള 177 സിസി എഞ്ചിൻ ഉപയോഗിക്കും, ഇത് 9,000 ആർ‌പി‌എമ്മിൽ 17 ബി‌എച്ച്‌പി പവറും 7,000 ആർ‌പി‌എമ്മിൽ 15.5 എൻ‌എം ടോർക്കും നൽകും.

ഈ അപ്‌ഡേറ്റുകൾക്കൊപ്പം, പുതിയ ടിവിഎസ് അപ്പാച്ചെ ആർടിആർ 160 2വി, അപ്പാച്ചെ ആർടിആർ 180 എന്നിവയുടെ വിലയിൽ 3,000 രൂപ വരെ നേരിയ വർധനവ് ഉണ്ടാകാൻ സാധ്യതയുണ്ട്. നിലവിൽ, ടിവിഎസ് അപ്പാച്ചെ ആർടിആർ 160 2വിയുടെ അടിസ്ഥാന വേരിയന്റിന് 1.21 ലക്ഷം രൂപയും ഉയർന്ന റേസിംഗ് പതിപ്പിന് 1.31 ലക്ഷം രൂപയുമാണ് വില. ഒറ്റ ഡിസ്‌ക് വേരിയന്റിൽ മാത്രം ലഭ്യമാകുന്ന ടിവിഎസ് അപ്പാച്ചെ ആർടിആർ 180 ന്റെ വില 1.35 ലക്ഷം രൂപയാണ്. എല്ലാ വിലകളും എക്‌സ്-ഷോറൂം വിലകൾ ആണ്.