ബിഎംഡബ്ല്യു ജി 310 ആർആർ ഇന്ത്യയിൽ

ഇന്ത്യൻ വിപണിയിൽ 10,000 യൂണിറ്റ് വിൽപ്പന പിന്നിട്ടതിൻ്റെ ഭാഗമായി ബിഎംഡബ്ല്യു മോട്ടോറാഡ്, ജി 310 ആർആർ ലിമിറ്റഡ് എഡിഷൻ പുറത്തിറക്കി. കറുപ്പും വെളുപ്പും നിറങ്ങളിൽ സവിശേഷമായ ഗ്രാഫിക്സുകളോടെ എത്തുന്ന ഈ മോഡലിന് 2.99 ലക്ഷം രൂപയാണ് എക്സ്-ഷോറൂം വില. 

ഇന്ത്യൻ വിപണിയിൽ ബിഎംഡബ്ല്യു മോട്ടോറാഡ് 10,000 യൂണിറ്റ് വിൽപ്പന എന്ന നാഴികക്കല്ല് കമ്പനി മറികടന്നു. പിന്നാലെ കമ്പനി ലിമിറ്റഡ് എഡിഷൻ ജി 310 ആർആർ ഇന്ത്യയിൽ പുറത്തിറക്കി. ഈ മോട്ടോർസൈക്കിൾ പരിമിതമായ യൂണിറ്റുകളിൽ ലഭ്യമാകും, കൂടാതെ രാജ്യത്തുടനീളമുള്ള ഏത് ബിഎംഡബ്ല്യു മോട്ടോറാഡ് ഡീലർഷിപ്പിൽ നിന്നും വാങ്ങാം. കമ്പനി അതിന്റെ പ്രാരംഭ എക്സ്-ഷോറൂം വില 2.99 ലക്ഷം രൂപയായി നിശ്ചയിച്ചിട്ടുണ്ട്. ഇത് സ്റ്റാൻഡേർഡ് മോഡലിനേക്കാൾ 18,000 രൂപ കൂടുതൽ ആണ്.

ഇത് മോട്ടോർസൈക്കിളിന്റെ വ്യത്യസ്‍തമായി കാണപ്പെടുന്ന ഒരു പതിപ്പാണ്. കറുപ്പും വെളുപ്പും എന്നീ രണ്ട് നിറങ്ങളിൽ ഇത് വാഗ്ദാനം ചെയ്യുന്നു. രണ്ട് ട്രിമ്മുകളിലും ഫ്രണ്ട് ഫെൻഡറുകളിൽ തിളങ്ങുന്ന നീലയും ചുവപ്പും ഗ്രാഫിക്സും ഇന്ധന ടാങ്കിന്റെ ഒരു ഭാഗം മൂടുന്ന ഫെയറിംഗും ഉണ്ട്. രണ്ട് ചക്രങ്ങൾക്കുമുള്ള വീൽ റിം സാങ്കേതികവിദ്യ സ്‍പോട്ടി രൂപം നൽകുന്നു. '1/310' ബാഡ്ജിംഗ് ഈ പതിപ്പിന്റെ പ്രത്യേകതയെ സൂചിപ്പിക്കുന്നു.

ലിമിറ്റഡ് എഡിഷൻ ബിഎംഡബ്ല്യു ജി 310 ആർആറിന്റെ സാങ്കേതിക സവിശേഷതകൾ സ്റ്റാൻഡേർഡ് മോഡലിന് സമാനമാണ്. 312.2 സിസി, സിംഗിൾ സിലിണ്ടർ, ലിക്വിഡ്-കൂൾഡ് എഞ്ചിൻ നൽകുന്ന ഇത് 34 ബിഎച്ച്പി പവറും 27 എൻഎം ടോർക്കും ഉത്പാദിപ്പിക്കുന്നു. എഞ്ചിൻ 6-സ്പീഡ് ഗിയർബോക്സുമായി ഘടിപ്പിച്ചിരിക്കുന്നു. 110/70 ഫ്രണ്ട്, 150/60 റിയർ മിഷേലിൻ ടയറുകളുള്ള 17 ഇഞ്ച് അലോയ് വീലുകളിലാണ് ഇത് ഓടുന്നത്.

യുഎസ്ഡി ടെലിസ്കോപ്പിക് ഫ്രണ്ട് ഫോർക്കുകളും മോണോഷോക്ക് സജ്ജീകരണവുമാണ് സസ്പെൻഷൻ ഡ്യൂട്ടികൾ കൈകാര്യം ചെയ്യുന്നത്. ബ്രേക്കിംഗ് ഹാർഡ്‌വെയറിൽ രണ്ട് അറ്റത്തും സിംഗിൾ ഡിസ്കുകളും ഡ്യുവൽ-ചാനൽ എബിഎസും ഉൾപ്പെടുന്നു. ബൈക്കിന്റെ ഇന്ധന ടാങ്ക് ശേഷി 11 ലിറ്ററാണ്, മൊത്തം ഭാരം 174 കിലോഗ്രാം ആണ്. എൽഇഡി ഹെഡ്‌ലൈറ്റ്, എൽഇഡി ടേൺ ഇൻഡിക്കേറ്ററുകൾ, എൽഇഡി ടെയിൽലൈറ്റ്, റൈഡിംഗ് മോഡുകൾ, പൂർണ്ണമായും ഡിജിറ്റൽ ഇൻസ്ട്രുമെന്റ് കൺസോൾ എന്നിവയാണ് സവിശേഷതകളിൽ ഉൾപ്പെടുന്നത്.