പുതിയ ബുള്ളറ്റ് 650 റോയൽ എൻഫീൽഡ് പുറത്തിറക്കുന്നു

റോയൽ എൻഫീൽഡ് തങ്ങളുടെ ഐക്കണിക്ക് മോഡലായ ബുള്ളറ്റിന്റെ പുതിയ 650 സിസി പതിപ്പ് അവതരിപ്പിക്കാൻ ഒരുങ്ങുന്നു. ക്ലാസിക് ഡിസൈൻ നിലനിർത്തിക്കൊണ്ട്, ഇന്റർസെപ്റ്റർ 650-ൽ കാണുന്ന ശക്തമായ പാരലൽ-ട്വിൻ എഞ്ചിനാണ് ഈ പുതിയ ബൈക്കിന് കരുത്തേകുന്നത്. 

ഇന്ത്യയിലെ ഏറ്റവും ജനപ്രിയ ഐക്കണിക്ക് മോട്ടോർസൈക്കിൾ കമ്പനിയായ റോയൽ എൻഫീൽഡ് പുതിയ ബുള്ളറ്റ് നാളെ അതായത് നവംബർ 4 ന് അവതരിപ്പിക്കും. കമ്പനി തങ്ങളുടെ ഏറ്റവും പഴക്കം ചെന്നതും ഏറ്റവും ഐക്കണിക് മോഡൽ നിരയുമായ ബുള്ളറ്റിനെ ഒരു പുതിയ അവതാരത്തിൽ അവതരിപ്പിക്കും. റോയൽ എൻഫീൽഡ് ബുള്ളറ്റ് 650 ആണ് അവതരിപ്പിക്കുന്നത്. ഇറ്റലിയിലെ മിലാനിൽ നടക്കുന്ന ലോകത്തിലെ ഏറ്റവും വലിയ മോട്ടോർസൈക്കിൾ ഷോയായ ഇഐസിഎംഎ 2025 ൽ ഈ പുതിയ ബൈക്ക് ആഗോളതലത്തിൽ അരങ്ങേറ്റം കുറിക്കും.

ടീസർ വീഡിയോ

പുതിയ ബുള്ളറ്റ് 650ന്‍റെ ഒരു ടീസർ വീഡിയോ റോയൽ എൻഫീൽഡ് പുറത്തിറക്കി. പഴയതും പുതിയതുമായ ഒരു മികച്ച സംയോജനമാണ് പുതിയ ബുള്ളറ്റ് 650 വാഗ്ദാനം ചെയ്യുന്നത്. പതിറ്റാണ്ടുകളായി ബുള്ളറ്റിന് അതിന്റെ ഐഡന്റിറ്റി നൽകിയ എല്ലാ സിഗ്നേച്ചർ ഡിസൈൻ ഘടകങ്ങളും കമ്പനി നിലനിർത്തിയിട്ടുണ്ട്. ക്രോം ഹെഡ്‌ലൈറ്റ് നെക്കൽ, കൈകൊണ്ട് വരച്ച പിൻസ്ട്രിപ്പുകൾ, മെറ്റൽ ടാങ്ക് ബാഡ്‍ജുകൾ തുടങ്ങിയവ ലഭിക്കുന്നു.

ടീസറിൽ കാണിച്ചിരിക്കുന്ന ഇൻസ്ട്രുമെന്റ് കൺസോൾ ക്ലാസിക് 650-ൽ കാണപ്പെടുന്നതിന് സമാനമായ ഒരു ഡിജിറ്റൽ-അനലോഗ് യൂണിറ്റാണെന്നാണ് റിപ്പോർട്ടുകൾ. ഓഡോമീറ്റർ, ഇന്ധന ഗേജ് പോലുള്ള വിവരങ്ങൾ പ്രദർശിപ്പിക്കുന്ന ഒരു ചെറിയ ഡിജിറ്റൽ സ്‌ക്രീനിനൊപ്പം ഒരു അനലോഗ് സ്പീഡോമീറ്ററും ഇതിൽ ഉണ്ടായിരിക്കും. ക്രമീകരിക്കാവുന്ന ബ്രേക്ക്, ക്ലച്ച് ലിവറുകൾ എന്നിവയും ഇതിലുണ്ട്. ടേൺ-ബൈ-ടേൺ നാവിഗേഷനായി ട്രിപ്പർ നാവിഗേഷൻ പോഡ് ഒരു ഓപ്ഷണൽ ആക്സസറിയായി പ്രതീക്ഷിക്കുന്നു.

ഏറ്റവും വലിയ മാറ്റം എഞ്ചിനാണ്. റോയൽ എൻഫീൽഡിന്റെ ജനപ്രിയ 650 സിസി പാരലൽ-ട്വിൻ എഞ്ചിനാണ് ബുള്ളറ്റ് 650-ലും ഉപയോഗിക്കുന്നത്. ഇന്റർസെപ്റ്റർ 650, കോണ്ടിനെന്റൽ ജിടി 650, ഷോട്ട്ഗൺ 650, ക്ലാസിക് 650 തുടങ്ങിയ മോഡലുകൾക്ക് ഈ എഞ്ചിൻ ഇതിനകം തന്നെ കരുത്ത് പകരുന്നു.

ഈ എഞ്ചിൻ ഏകദേശം 47 കുതിരശക്തി (hp) ഉം 52.3 Nm ടോർക്കും ഉത്പാദിപ്പിക്കുന്നു. 6-സ്പീഡ് ഗിയർബോക്സും സ്ലിപ്പർ-അസിസ്റ്റ് ക്ലച്ചും ഇതിൽ ഘടിപ്പിച്ചിരിക്കുന്നതിനാൽ ഗിയർ ഷിഫ്റ്റുകൾ സുഗമമായി മാറുന്നു. എങ്കിലും, ബുള്ളറ്റിന്റെ ശാന്തവും പഴയതുമായ റൈഡിംഗ് സ്വഭാവത്തിന് അനുയോജ്യമായ രീതിയിൽ എഞ്ചിൻ അൽപ്പം മൃദുവായി ട്യൂൺ ചെയ്യാവുന്നതാണ്. ബുള്ളറ്റിന്റെ ക്ലാസിക് ലുക്കുകൾ ഇഷ്ടപ്പെടുന്നവർക്കും, ശക്തമായ 650 സിസി ട്വിൻ സിലിണ്ടർ എഞ്ചിന്റെ കരുത്ത് ആഗ്രഹിക്കുന്നവർക്കും ഈ പുതിയ ബൈക്ക് ഒരു മികച്ച ഓപ്‍ഷൻ ആയിരിക്കും.