കുറഞ്ഞ വിലയിൽ സിമ്പിൾ എനർജിയുടെ പുതിയ ഫാമിലി ഇലക്ട്രിക് സ്‍കൂട്ടർ

ബെംഗളൂരു ആസ്ഥാനമായ സിമ്പിൾ എനർജി 2026 സെപ്റ്റംബർ 2-ന് പുതിയ ഫാമിലി ഇലക്ട്രിക് സ്‍കൂട്ടർ പുറത്തിറക്കുന്നു. ഉയർന്ന പ്രകടനശേഷിയുള്ള മോഡലുകളിൽ നിന്ന് വ്യത്യസ്‍തമായി, ഈ സ്‍കൂട്ടർ സാധാരണ കുടുംബങ്ങളെയും ദൈനംദിന യാത്രക്കാരെയും ലക്ഷ്യമിട്ട് സൗകര്യത്തിനും പ്രായോഗികതയ്ക്കും മുൻഗണന നൽകുന്നു.

ഇന്ത്യയിലെ ഇലക്ട്രിക് വാഹന വിപണിയിൽ പുതിയ മോഡലുമായി സാന്നിധ്യം ശക്തമാക്കാൻ ഒരുങ്ങുകയാണ് ബെംഗളൂരു ആസ്ഥാനമായ സിമ്പിൾ എനർജി. കമ്പനിയുടെ ആദ്യത്തെ ഫാമിലി ഇലക്ട്രിക് സ്‍കൂട്ടർ 2026 സെപ്റ്റംബർ 2ന് പുറത്തിറക്കുമെന്ന് സിമ്പിൾ എനർജി പ്രഖ്യാപിച്ചു.

ഉയർന്ന പ്രകടന ശേഷിയുള്ള ഇലക്ട്രിക് സ്‍കൂട്ടറുകൾക്ക് പേരുകേട്ട കമ്പനിയാണ് സിമ്പിൾ എനർജി. എന്നാൽ പുതിയ മോഡൽ സാധാരണ കുടുംബ ഉപഭോക്താക്കളെയും ദൈനംദിന യാത്രക്കാരെയും ലക്ഷ്യമിട്ടാണ് വികസിപ്പിക്കുന്നത്. ഓഫീസ് യാത്ര, സ്‍കൂൾ യാത്ര, മാർക്കറ്റ് ആവശ്യങ്ങൾ തുടങ്ങിയ പ്രതിദിന ഉപയോഗങ്ങൾക്കായി കൂടുതൽ പ്രായോഗികമായ ഒരു ഇലക്ട്രിക് സ്‍കൂട്ടറായിരിക്കും ഇത്. മികച്ച യാത്രാസുഖം, എളുപ്പത്തിലുള്ള ഉപയോഗം, ആധുനിക സാങ്കേതികവിദ്യ എന്നിവയുടെ സംയോജനമാണ് പുതിയ മോഡലിലൂടെ കമ്പനി ലക്ഷ്യമിടുന്നത്.

പുതിയ സ്‍കൂട്ടറിന്റെ പ്രത്യേകതകൾ എന്തെല്ലാം?

പുതിയ ഫാമിലി സ്‍കൂട്ടറിന്റെ പേര്, ബാറ്ററി ശേഷി, റേഞ്ച്, വില തുടങ്ങിയ വിവരങ്ങൾ കമ്പനി ഇതുവരെ പുറത്തുവിട്ടിട്ടില്ല. എന്നാൽ വർഷങ്ങളായുള്ള ഗവേഷണത്തിന്റെയും എൻജിനീയറിങ് പ്രവർത്തനങ്ങളുടെയും ഫലമായാണ് ഈ മോഡൽ വികസിപ്പിച്ചതെന്ന് സിമ്പിൾ എനർജി വ്യക്തമാക്കി.

ഇന്ത്യൻ ഉപഭോക്താക്കളുടെ ആവശ്യങ്ങൾ മുൻനിർത്തി തുടക്കം മുതൽ രൂപകൽപ്പന ചെയ്തിരിക്കുന്ന സ്‍കൂട്ടറായിരിക്കും ഇത്. ദൈനംദിന ഉപയോഗത്തിന് ആവശ്യമായ സൗകര്യങ്ങൾ, പുതിയ സാങ്കേതികവിദ്യ, ആകർഷകമായ ഡിസൈൻ എന്നിവ വാഹനത്തിൽ ഉൾപ്പെടുത്തുമെന്ന് കമ്പനി അറിയിച്ചു. സ്വന്തം സോഫ്റ്റ്‌വെയർ, വാഹന സാങ്കേതികവിദ്യകൾ എന്നിവയുടെ വികസനത്തിൽ കമ്പനി വലിയ നിക്ഷേപം നടത്തിയിട്ടുണ്ട്. കൂടാതെ, ഭാരമേറിയതും അപൂർവ ഭൂമിമൂലകങ്ങൾ ഉപയോഗിക്കാത്തതുമായ ഇലക്ട്രിക് മോട്ടോർ വാണിജ്യാടിസ്ഥാനത്തിൽ നിർമിച്ച ആദ്യ ഇന്ത്യൻ വാഹന നിർമാതാക്കളിൽ ഒന്നായും സിമ്പിൾ എനർജി മാറിയിട്ടുണ്ട്.

പെഞഫോമൻസിന് പകരം സൗകര്യത്തിന് മുൻഗണന

നിലവിലെ സിമ്പിൾ വൺ, സിമ്പിൾ അൾട്ര തുടങ്ങിയ മോഡലുകൾ മികച്ച പ്രകടനത്തിനും വേഗതയ്ക്കും പേരുകേട്ടവയാണ്. എന്നാൽ പുതിയ ഫാമിലി സ്‍കൂട്ടറിൽ കമ്പനി കൂടുതൽ ശ്രദ്ധ നൽകുന്നത് സുഖകരമായ യാത്ര, ഉപയോഗ സൗകര്യം, പ്രായോഗിക ഫീച്ചറുകൾ എന്നിവയ്ക്കായിരിക്കും. കുടുംബങ്ങൾ, വിദ്യാർഥികൾ, ജോലി ചെയ്യുന്നവർ, നഗരങ്ങളിലെ സ്ഥിരം യാത്രക്കാർ എന്നിവരെ ലക്ഷ്യമിട്ടായിരിക്കും പുതിയ മോഡൽ എത്തുക. ഉയർന്ന പ്രകടനത്തേക്കാൾ ദിവസേന ഉപയോഗിക്കാൻ അനുയോജ്യമായ വിശ്വാസ്യതയും സൗകര്യങ്ങളുമാകും വാഹനത്തിന്റെ പ്രധാന ആകർഷണം.

സിംപിൾ അൾട്രയ്ക്ക് മികച്ച സവിശേഷതകൾ

സിമ്പിൾ എനർജിയുടെ പോർട്ട്ഫോളിയോയിൽ നിലവിൽ ഏറ്റവും ശ്രദ്ധേയമായ മോഡലാണ് സിമ്പിൾ അൾട്ര. ഈ വർഷമാണ് കമ്പനി ഈ ഫ്ലാഗ്ഷിപ്പ് ഇലക്ട്രിക് സ്‍കൂട്ടർ പുറത്തിറക്കിയത്. 6.5 കിലോവാട്ട് അവറിന്റെ ബാറ്ററി പാക്കാണ് സിമ്പിൾ അൾട്രയിൽ നൽകിയിരിക്കുന്നത്. ഒറ്റ ചാർജിൽ 400 കിലോമീറ്റർ വരെ സഞ്ചരിക്കാൻ കഴിയുമെന്നാണ് കമ്പനിയുടെ അവകാശവാദം. നിലവിൽ ഇന്ത്യയിലെ ഏറ്റവും കൂടുതൽ റേഞ്ച് വാഗ്ദാനം ചെയ്യുന്ന ഇലക്ട്രിക് സ്‍കൂട്ടറുകളിൽ ഒന്നാണിത്. മണിക്കൂറിൽ 115 കിലോമീറ്ററാണ് പരമാവധി വേഗത. പൂജ്യത്തിൽ നിന്ന് 40 കിലോമീറ്റർ വേഗത കൈവരിക്കാൻ 2.77 സെക്കൻഡ് മാത്രം മതിയെന്നും കമ്പനി അവകാശപ്പെടുന്നു. 7 ഇഞ്ച് ടി.എഫ്.ടി ഡിസ്പ്ലേ, മൾട്ടി-ലെവൽ ട്രാക്ഷൻ കൺട്രോൾ തുടങ്ങിയ ആധുനിക ഫീച്ചറുകളും സിമ്പിൾ അൾട്രയിൽ ഉൾപ്പെടുത്തിയിട്ടുണ്ട്. പുതിയ ഫാമിലി സ്‍കൂട്ടറിലൂടെ പ്രകടന വിഭാഗത്തിൽ നിന്ന് കൂടുതൽ ജനകീയമായ ഇലക്ട്രിക് സ്‍കൂട്ടർ വിപണിയിലേക്ക് പ്രവേശിക്കുകയാണ് സിമ്പിൾ എനർജി ലക്ഷ്യമിടുന്നത്.